Færeyskir söngvar í 1. sæti í Danmörku og Bandaríkjunum

 

   Í fyrradag upplýsti ég á þessum vettvangi að splunkuný plata færeysku víkingarokkssveitarinnar Týs,  The Lay of Thrym,  hefði vippað sér úr 31. sæti í 1. sæti bandaríska rokklistans,  CMJ Loud.  Listinn byggir á útvarpsspilun í Bandaríkjunum og Kanada.  Í þessum skrifuðu orðum var plata með lagi Eivarar,  Tröllabundin,  að hreiðra um sig á ný í 1. sæti danska plötusölulistans.  Lagið er á plötunni  Engle eller Dæmoner  með danska rappdúóinu Nik & Jay. 

  Platan fór var í toppsætið fyrir 6 vikum,  hélt því næstu vikuna og seig síðar örlítið.  Var í 4. sæti fyrir viku.  Nú hefur platan aftur náð 1. sætinu.  Að margra mati í og með vegna  Tröllabundin.  Það lag er af gagnrýnendum og almenningi talið vera besta lag plötunnar.  Reyndar er það flottara með Eivöru einni.  En samt gaman að heyra hvernig Nik & Jay afgreiða það (sjá hér neðst).

  Þetta er í fyrsta skipti sem færeyskir söngvar eru samtímis í 1. sæti í Danmörku og í Bandaríkjunum. 

  CMJ stendur fyrir það sem hérlendis hefur verið kallað bandarískt háskólaútvarp (Collage Music Journal).  Það mætti þó kalla það norður-amerískt framhaldsskólaútvarp vegna þess að það nær einnig yfir kanadískar framhaldsskólaútvarpsstöðvar.  CMJ heldur utan um vinsældalista þessara útvarpsstöðva,  er vikutímarit og stendur einnig fyrir hljómleikahaldi og alls konar.  Tímaritinu fylgir geisladiskur með mest spennandi rokklögum hverju sinni.  Ég var áskrifandi að CMJ alveg þangað til krónan kolféll 2008 og uppgötvaði í gegnum það margt af því besta sem þá var í umferð í rokkinu.  Þegar ég skoða í dag þær plötur sem fylgdu tímaritinu sé ég að flestir flytjendur urðu síðar stórveldi.  CMJ er með puttann á púlsinum.  Vinsældalistar CMJ mæla það sem spilað er í norður-amerískum framhaldsskólaútvarpsstövum.  Þetta eru þær útvarpsstöðvar sem maður stillir á þegar maður er í Bandaríkjunum.  Það er ævintýri líkast að Týr sé þar í 1. sæti.  Verulega óvænt verð ég að segja. Norrænt víkingarokk hefur hingað til ekki átt upp á pallborð á þessum vettvangi.  Þetta þýðir rosalega spilun á plötu Týs í þessum útvarpsstöðvum.  Týr hefur stimplað sig rækilega inn á norður-ameríska markaðinn.  Og Eivör inn á þann danska.

1

4

6

NIK & JAY ENGLE ELLER DÆMONER

2

3

19

ADELE 21

3

1

2

LADY GAGA BORN THIS WAY

4

2

23

RIHANNA LOUD

5

5

35

AGNES OBEL PHILHARMONICS

6

6

22

BRUNO MARS DOO-WOPS & HOOLIGANS

7

13

37

FALLULAH THE BLACK CAT NEIGHBOURHOO

8

10

52

BURHAN G BURHAN G

9

9

9

KATO DISCOLIZED 2.0

10

1

EDDIE VEDDER UKULELE SONGS

Athugasemdir

[Ásta systir Rúnars (IP-tala skráð) 11.6.2011 kl. 23:40]

Frábært að heyra lög sem mamma ( 89 ára ) söng í gamla daga í "þungsrokksútgáfu"

[Jens Guð, 12.6.2011 kl. 00:00]

  Ásta,  þetta eru einmitt lög sem ég heyrði heima hjá ykkur fyrir 40 árum!

[Sigurjón, 12.6.2011 kl. 00:52]

Sælir.  Takk fyrir þetta. Ég er glaður að heyra þessi lög og er engin furða að þau skuli vera efst á listum víða um heim...

Kv. Sigurjón

[Jens Guð, 12.6.2011 kl. 01:43]

  Sigurjón,  þetta er gaman.

[Björn Emilsson, 12.6.2011 kl. 03:01]

Kærar þakkir fyrir konsertinn, stúlkan er stórkostleg .

[Jens Guð, 12.6.2011 kl. 03:26]

  Björn,  hún er alltaf stórkostleg.

[Siggi Lee Lewis, 12.6.2011 kl. 09:24]

Var að hlusta á lagið með Eivör. Þetta er einhverskonar indjána söngur hjá henni.

[Óskar Þorkelsson, 12.6.2011 kl. 15:37]

hafðu þökk fyrir þessa áhugaverðu færslu Jens

[Jens Guð, 12.6.2011 kl. 15:48]

  Ziggi Lee,  það er indíánakeimur af þessu.

[Jens Guð, 12.6.2011 kl. 15:48]

  Óskar,  bara um að gera að leyfa fólki að fylgjast með frama færeyskra tónlistarmanna.