Svona er auðvelt að gera vinnuna rosalega skemmtilega

  Stundum heyrist fólk segja að það hlakki til frídaga frá vinnu.  Það er eins og sumum leiðist í vinnunni.  Einkum þeim sem vinna einhæfa vinnu.  Þetta er óþarfi.  Það er svo auðvelt að þykja gaman í vinnunni.  Hér er gott ráð sem hefur þann kost að það endist og endist.

  Flestum þykir mánudagurinn leiðinlegasti dagur vikunnar.  Þess vegna er upplagt að fjörga upp á fyrsta virkan mánudag hvers mánaðar (sem er til að mynda annar mánudagur ágústsmánaðar).  Leikurinn gengur út á það að þann mánudag klæðist ALLIR starfsmenn einhverju sem þeir annars klæðast ekki að öllu jafnaði. 

  Einn kaldan vetrarmánudag mæta allir með húfu.  Það má vera hvernig húfa sem er en ekki hattur eða derhúfa.

  Heitan sumarmánudag mæta allir í stuttbuxum.  Einnig er upplagt á sólríkum degi að allir beri röðulskyggjur (sólgleraugu).

  Einn mánudaginn setja allir upp hálsbindi,  konur jafnt sem karlar.

  Annan mánudag til eru allir með grifflur.  Það er hægt að kaupa ódýra vettlinga og klippa framan af þeim.

  Þannig mætti áfram telja.  Það má líka útfæra þetta þannig að einn mánudag næli allir á sig glaðlegt barmmerki:  Broskall, eða merki með glaðlegum boðskap af hvaða tagi sem er. 

  Til að þetta gangi upp og veki skemmtun er að ganga ekki of langt í fíflagangi.  Þetta sé eitthvað sem allir geti sætt sig við.  Þetta má ekki kosta mikla fyrirhöfn né fjárhagsleg útgjöld.  Upplagt er að miða við að hægt sé að kaupa eitthvað svona í ódýrum verslunum á borð við Megastore eða Tiger.  Þar kosta hlutir bara 200-og-eitthvað kall eða svo.  Að minnsta kosti í Megastore.  Tiger er kannski örlítið dýriari svo litlu munar.

  Svona uppátæki krydda vinnuna rækilega 12 sinnum á ári.  Til að allir séu virkir þátttakendur skiptast vinnufélagar á uppástungu um næsta mánudagssprell.  Heppilegt getur verið að röðin ráðist af nöfnum viðkomandi eftir stafrófsröð. 

  Ég get lofað ykkur því að þetta mun breyta mánudögum í tilhlökkunarefni og hressa rækilega upp á vinnuandann.

  Ef einhver skorast undan má leggja hann í nett einelti þann daginn.  Bara gæta þess að það sé ekki kynferðisleg einelti.  Reyndar er lítil hætta á því að fýlupokar taki ekki þátt í leiknum.  Þetta er svo gaman.  Líka fyrir viðskiptavini fyrirtækisins.  Þegar fram í sækir getur þetta bætt móralinn á þann hátt að það vinni gegn einelti á vinnustað.  Jafnframt brúar þetta bil á milli yfirmanna og undirmanna á vinnustað.

    

Athugasemdir

[Steingrímur Helgason, 22.6.2011 kl. 22:57]

Ég tók meðvitaða ákvörðun um það fyrir aldarfjóðrúngi zíðan, að gerazt 'mánudagzmannezkja'.
Mætti klukkutíma fyrr í vinnuna, búinn að fara í zund & kom við í bakaríinu & keypti bakkelzi handa mizfúlum mánudagzmorgunfúlum zamverkalýð mínum á zkrifztofunni.

Merkjanlegar aukníngar á meintum vinzældum mínum meðal vinnufélagana, voru ómerkilegri en örverur í andnauð...

[Ásthildur Cesil Þórðardóttir, 23.6.2011 kl. 11:55]

Flottar hugmyndir.  Ég hef einsett mér í mörg ár að gera vinnuna meðvitað ánægjulega, það gengur bara vel, ég hef líka prédikað yfir krökkum sem hafa unnið hjá mér undanfarin mörg ár að vinnan sé aldrei leiðinleg bara mismunandi skemmtileg, það er bara að finna eitthvað til að gera hvert verk meira spennandi, eða taka verkin skipulega eins og maður sé að raða einhverju skemmtilegu upp. Þetta svínvirkar.

[Gunnar (IP-tala skráð) 23.6.2011 kl. 21:32]

Mánudagar eru víst ekki verstir. Það var gerð víðamikil könnun fyrir nokkrum árum og þá kom í ljóst að lang flestum leiðist mest á þriðjudögum, því að þá eru flestir hættir að tala um síðast liðnu helgina

[Jens Guð, 26.6.2011 kl. 23:55]

  Steingrímur,  þetta er glæsilegt framtak hjá þér.  Ég var einmitt að ræða við einn sem er afskaplega vinsæll á sínum vinnustað.  Hann sagðist glíma við vanda öfugan við þann sem háir mörgum sem hafa vanið sig á að mæta of seint til vinnu,  á fundi,  í kvikmyndahús og annan mannfagnað.  Hann mætir alltaf og alls staðar löngu fyrir tilsettan tíma.  Á vinnustað dundar hann sér við að hella upp á kaffi og taka til morgunsnarl til að drepa tímann.  Það telur.  

[Jens Guð, 26.6.2011 kl. 23:59]

  Ásthildur Cesil,  þetta er rétta afstaðan.  Ég er svo heppinn að hafa alltaf þótt gaman í vinnu.  Eflaust hef ég verið heppinn með vinnustaði og klárlega heppinn með skemmtilega vinnufélaga.  Samt hef ég unnið með fólki sem hefur látið ýmislegt á vinnustað fara í að óþörfu í pirrurnar á sér.  Ég hef haft húmor fyrir því fólki þannig að það er bara skemmtilegt líka.   

[Jens Guð, 27.6.2011 kl. 00:00]

  Gunnar,  takk fyrir þennan fróðleiksmola.

[Ásthildur Cesil Þórðardóttir, 27.6.2011 kl. 19:21]

Já einmitt, það er það sem er skemmtilegast við vinnuna, að sjá út hvernig er hægt að gera hana ennþá skemmtilegri og meira spennandi.