Leyndarmál borðstofustólsins

  Vestræn börn hafa þyngst undanfarin ár.  Ástæðan er ekki aðeins áköf og aukin sókn í ruslfæði (pizzur,  hamborgara,  djúpsteikta kjúklingabita,  franskar kartöflur og þess háttar viðbjóð) og gosdrykki.  Önnur ástæða vegur einnig þungt í bókstaflegri merkingu.  Það skiptir nefnilega máli á hverju blessuð börnin sitja þegar þau slafra í sig gumsinu.  Mjúkar sessur eru óvinur í þessu tilfelli.  Verst er þegar matast er í stofusófanum. 

.

  Börn og fullorðnir eiga að matast á grjóthörðum eldhússtólum.  Það er galdurinn.  Þar situr fólk stíft og beint í baki.  Þetta hefur með meltinguna að gera.

.

  Fólk er almennt ekki meðvitað um þetta mikilvæga atriði.  Samt hefur fólk - ómeðvitað - alla tíð sótt í harða borðstofustóla.  Heimsendingar á pizzum og öðrum óþverra hafa hinsvegar fært allt of marga matmálstíma inn í stofusófann.  Manneskjan er ekki bara það sem hún borðar.  Manneskjan er einnig það sem hún situr á er hún matast.

  Nýverið bloggaði ég um nýendurinnréttað húsnæði breska þungarokkarans Ozzy Osbournes.  Þar er allt kalt og hart og eiginlega óvistlegt.  En eldhússtólarnir eru til fyrirmyndar.  Sjá:

.

Athugasemdir

[Jón Steinar Ragnarsson, 27.6.2011 kl. 03:18]

Ekki er nú Osbornefamelían að styðja þessa kenningu þína Jens. Öll eins og veðurbelgir í Goth átfitti.

[Jón Steinar Ragnarsson, 27.6.2011 kl. 03:24]

Kelly greyið varð eins og hún hefði sest á loftpressustút, ekki ósvipuð og útblásinn gúmmíhanski í laginu. Hún kenndi þó því um að hún hafi fitnað svona rosalega við það að hætta að dópa.  Kannski að við ættum að fara að kýla meira af amfetamíni í börnin með kornflexinu. ikið held ég að læknamafían yrði ánægð með þá viðbót þó nóg sé að gert nú þegar.

[Ásthildur Cesil Þórðardóttir, 27.6.2011 kl. 09:07]

Þetta er sennilega alveg hárrétt hjá þér Jens minn.

[Jens Guð, 27.6.2011 kl. 21:33]

  Jón Steinar,  þá ættir þú að sjá Osbourne fjölskylduna eftir að þau fengu þessa eldhússtóla.  Þau lita út eins og íþróttaálfurinn í dag.  Nema kannski Ozzy.  Hann þarf nefnilega einhverra hluta vegna að halla fram þegar hann gengur.  Það er skrýtið að sjá það.  Þetta hefur eitthvað með jafnvægið hjá honum að gera.

[Jens Guð, 27.6.2011 kl. 21:39]

  Ásthildur Cesil, ég hef lesið um sterkar vísbendingar í þessa átt og sé í hendi mér að svona sé þetta.

[Siggi Lee Lewis, 2.7.2011 kl. 01:52]

Besta sem ég hefi upplifað um ævina er að hakka í mig hamborgara, shake, snakk og bjór í vatnsrúmi horfandi á Little Britain.