Andri á flandri - lofar góðu

  Íslenskt efni í sjónvarpsdagskrá RÚV hefur sveiflast öfga á milli upp á síðkastið.  Það hefur einkennst af hæstu hæðum (Popppunktur og kvikmyndir Friðriks Þórs) og hörmung (Tríó).  Ég tek fram að síðara dæmið er ekki tiltekið sem árás á höfund Tríós heldur stjórnendur RÚV. 

  Vegna þess að ég var í útlöndum þá hef ég núna verið að fletta upp á síðustu helgarþáttum á RÚV á "vodinu".  Hér á landi á,  eins og skagastrandarskáldið sagði.  Fyrsti þáttur  Andra á flandri  lofar góðu.  Virkilega góðu.  Ég horfði á hann tvisvar í beit.  Og skemmti mér jafn vel í bæði skiptin. 

  Flestir kannast við Andra Frey Viðarsson sem hressan og skemmtilegan útvarpsmann.  Fyrst á X-inu og síðan á rás 2.  Lýsingarorðið hress hefur reyndar verið gengisfellt af dagskrárgerðarmönnum útvarpsstöðva heimska fólksins,  FM957 og Kanans,  og er orðið neikvætt.  Andri er öðru vísi hress.  Í hans tilfelli er orðið hress jákvætt. 

  Það er ekki sjálfgefið að góður útvarpsmaður sé einnig góður í sjónvarpi.  Andri er hinsvegar aldeilis frábær sjónvarpsmaður.  Hann tekur sig ekki hátíðlega.  Gerir grín að sjálfum sér og nær að laða fram það besta hjá viðmælendum.

  Miðillinn Hilmar Guðmundsson fór á kostum.  Hjá honum dúkkuðu upp draugar með algengustu íslenskum mannanöfnum:  Þórarinn,  Tóti,  Sigríður,  Sigurður,  Siggi,  Bjarni,  Margrét,  Jói,  Guðmundur,  Gunna,  "hefur þú verið í sveit?",  pönnukökur...  Það er verulega merkilegt að draugar með sjaldgæf nöfn kíkja aldrei í heimsókn til miðla.

  Andri á flandri  er topp sjónvarpsefni.  Ég hlakka til að fylgjast með næstu þáttum.

  Meðfylgjandi myndbönd eru ekki úr þættinum  Andri á flandri  heldur gamlar klippur úr Kastljósi.

  Í gamla daga var Andri Freyr gítarleikari hljómsveita á borð við Bisund (2. sæti í Músíktilraunum),  Botnleðju (1. sæti í Músíktilraunum) og Fidel.

  Birkir Fjalar bróðir hans var trommuleikari og söngvari hljómsveita á borð við Döðlurnar,  Stjörnukisa (1. sæti í Músíktilraunum),  I Adapt og Celestine. 

  Viðar faðir þeirra var trommuleikari hinnar margumtöluðu hljómsveitar Frostmarks og Jarla.  Undir lok ferils Frostmarks var þar söngvari að nafni Jón Rúnar Halldórsson,  faðir Friðriks Dórs og Jóns Jónssonar.  Þeir eru að gera það gott þessa dagana.  Það voru einhver fleiri frægðarmenni í Frostmarki.  Galdrakallinn Villi Guðjóns hélt utan um það dæmi.  Gott ef ég kom ekki líka við sögu.

Athugasemdir

[Númi (IP-tala skráð) 21.7.2011 kl. 23:55]

Andri á Flandri,fór vel af stað en,,,,,,,,,,,,,,,,,þetta blót í honum sí og æ í þættinum pirrar mig.

[Jens Guð, 22.7.2011 kl. 00:06]

  Númi,  ég samsinni því að hann má sleppa bölvinu.  Það pirrar mig ekki en er óþarft.

[Gunnar (IP-tala skráð) 22.7.2011 kl. 08:31]

Mér finnst Tómas stela senunni

[Ásthildur Cesil Þórðardóttir, 22.7.2011 kl. 08:54]

Góð ábending, ég horfði á hluta úr einum þætti og þótti hann bara góður. 

[Jens Guð, 22.7.2011 kl. 13:16]

  Gunnar,  þeir veita hvor öðrum harða samkeppni,  félagarnir.

[Jens Guð, 22.7.2011 kl. 13:17]

  Ásthildur Cesil,  það hefur bara verið sýndur þessi eini þáttur.  Næsti verður á föstudaginn.

[sæunn guðmundsdóttir (IP-tala skráð) 22.7.2011 kl. 13:26]

andri er einfaldlega skemmtilegasti þáttastjórnadinn í dag ég ég missi helst ekki af þættinum og ekki versnaði hann við sjónvarpið er einmitt ekki að reyna að vera ofurhress bara hann sjálfur og já hver man ekki eftir hinum margumtöluðu og stórgóðu frostmark!!!!!

[Jóhann Elíasson, 22.7.2011 kl. 21:26]

Andri er virkilega skemmtilegur útvarpsmaður og kannski þess vegna hafði ég miklar væntingar um að þátturinn yrði góður - en þvílík vonbrigði.  Það skásta í þættinum var hundurinn Tómas en ég á ekki von á að hann geti haldið ÖLLUM þáttunum í meðalmennskunni................

[Ómar Ingi, 23.7.2011 kl. 11:29]

Andri stendur sig vel í útvarpi og Sjónvarpi hann gerir þetta áreynslulaust og og kemur vel fyrir , Númi íslendingar blóta get over it

[Sigurður I B Guðmundsson, 23.7.2011 kl. 20:26]

Bíð spenntur eftir þáttaröðinni: Jens kemst á Sjens!!!! Eða: Jens á sjens í Benz!!!

[Jens Guð, 23.7.2011 kl. 23:35]

  Jóhann,  Tómas er stjarna. 

[Jens Guð, 23.7.2011 kl. 23:37]

  Ómar Ingi,  ég samsinni.  Andri Freyr er frábær.

[Jens Guð, 23.7.2011 kl. 23:37]

  Sigurður I.B.,  þetta eru góðar uppástungur.

[Jens Guð, 25.7.2011 kl. 01:01]

  Sæunn,  mæl þú manna heilust.

[Jens Guð, 25.7.2011 kl. 01:05]

  Jóhann,  nú er ég þér ósammála.  Að vísu er Tómas flottur.  Ég samsinni því.  En hinu ekki.  Mér þótti gaman að áttræð mamma mín nefndi við mig að fyrra bragði hvað hún væri hrifin af  Andra á flandri.  Vissi hún samt ekkert um útvarpsmanninn en sagði að þetta væru skemmtilegustu sjónvarpsþættir sem hún hefði séð í háa herrans tíð.

[Jens Guð, 25.7.2011 kl. 01:06]

  Ómar Ingi,  ég kvitta undir þetta.

[Jens Guð, 25.7.2011 kl. 01:09]

  Sigurður I.B.,  þetta eru góðar uppástungur þó að ég telji fjarlægt að þær komi til greina.  Hinsvegar til gamans:  Um daginn fékk ég þau gleðitíðindi að ekki væri búið að blása útvarpsstöðina Nálina af.  Það væri aðeins beðið eftir að auglýsingamarkaðurinn taki við sér eftir bankahrunið.  Stöðin fari aftur í gang um leið og skilyrði verða hagstæðari.

[Sigurður I B Guðmundsson, 25.7.2011 kl. 20:09]

Gæti verið gaman að vera með t.d. klukkutíma þátt bara með "þeim gömlu góðu".

[Jens Guð, 25.7.2011 kl. 22:50]

  Sigurður I.B.,  þú verður áreiðanlega var við það á blogginu mínu þegar Nálin fer af stað aftur.  Þá getur þú hnippt í útvarpsstjórann.