"Ormurin langi" kominn í hágæða upplausn

  Undanfarin mörg ár hafa hátt í 400 þúsund manns skemmt sér konunglega við að skoða á þútúpunni myndbandið við  Orminn langa  með færeysku víkingarokkurunum í Tý.  Gallinn er bara sá að það myndband er í vondri upplausn.  Það er eins og tekið af gamalli og slitinni filmu.

  Nú hefur tekist að hafa upp á höfundi myndbandsins,  Ingólfi Júlíussyni,  og véla hann til að setja myndbandið inn á þútúpuna í hágæða upplausn.  Útkomuna má sjá hér fyrir ofan.  Þetta er allt annað.  Mig grunar að það sé jafnvel hægt að sjá myndbandið í þrívídd með þar til gerðum gleraugum.  Eða allt að því.

  Til samanburðar er vonda útgáfan hér fyrir neðan.

  Ef hjá einhverjum kviknar spurning um það hvers vegna  Ormurin langi  sé stafsettur með einu n í fyrirsögninni þá er svarið þetta:  Þannig er nafn þessa kvæðalags stafsett á færeysku.

  Það er gaman að leyfa  Ólavi Riddararós  að fylgja með:

Athugasemdir

[hilmar jónsson, 6.8.2011 kl. 22:32]

Sándið mætti þó vera ögn betra í orminum..

[Ásthildur Cesil Þórðardóttir, 7.8.2011 kl. 10:01]

Þetta lag hefur verið í miklu uppáhaldi hjá mér lengi. Takk fyrir þetta Jens.

[Bjarni (IP-tala skráð) 7.8.2011 kl. 10:20]

Hvorki vissi ég að gæði væri mæld í hæð eða lægð, né að upplausn væri skilgreind í gæðum!

Alltaf lærir maður eitthvað nýtt.

[Ásdís Sigurðardóttir, 7.8.2011 kl. 11:11]

[Jens Guð, 7.8.2011 kl. 21:44]

  Hilmar,  þegar Týsarar hljóðrituðu þetta lag 2001 voru þeir staurblankir unglingar og höfðu takmarkað svigrúm í hljóðveri.  Í dag eru þeir orðnir töluvert nafn á heimsmarkaði.  Það er að segja innan víkingarokksgeirans og jaðarmúsíkur (alternative).  Til að mynda náðu þeir 1. sæti CMJ vinældalistans á dögunum með nýjustu plötu sinni,  The Lay og Thrym.  CMJ listinn mælir spilun í öllum bandarískum og kanadískum framhaldsskóla útvarpsstöðvum (iðulega rangnefndar hérlendis sem háskólaútvarpsstöðvar.  Háskólastöðvarnar eru aðeins brot af öllum þessum stöðvum).

  Þetta var óvænt og vakti mikla athygli.  Ekki aðeins að hljómsveitin í 1. sæti væri færeysk heldur ennþá fremur fyrir að hún spili víkingametal.  Sá músíkstíll hefur hingað til ekki átt svona vel upp á pallborð CMJ stöðvanna.

  En nú eru Týsarar komnir með ágætar tekjur.  Þess vegna ætla þeir að endurhljóðrita  Ormin langa  við bestu skilyrði.  Reyndar er  Ormurin langi  hvergi eins vinsæll og á Íslandi. Týsarar eru ekki mikið í því að spila það lag erlendis.  Til að mynda var það ekki á frábærum hljómleikum Týs á G!Festivali í Færeyjum á dögunum.  

  Vegna vinsælda lagsins hérlendis verður ný hljóðritun sennilega aukalag á næstu (sjöundu) plötu Týs.

[Jens Guð, 7.8.2011 kl. 21:45]

  Ásthildur Cesil,  ég er sömuleiðis hrifinn af þessu lagi.  Þegar ég DJ-a er þetta lagið sem kemur liðinu út á dansgólfið.

[Jens Guð, 7.8.2011 kl. 21:55]

  Bjarni,  það er alltaf eitthvað nýtt hægt að læra í landafræði.  Hágæða (high quality) eitthvað og lággæða annað hefur náð fótfestu í íslensku máli (þó að gæði séu strangt til tekið frekar mæld í miklum eða litlum gæðum).  Ef þú slærð orðinu hágæða inn á google skilar það hálfri milljón niðurstaða.

  Fagmenn í myndvinnslu tala um hágæða upplausn þegar punktafjöldi upplausnarinnar er eins og vel er á kosið.  Eflaust má finna eitthvað rammíslenskara orðalag,  eins og þegar talað er um sjálfrennireið í stað bíls.

[Jens Guð, 7.8.2011 kl. 21:55]

  Ásdís,  takk fyrir innlitið.