Hasskakan og Fitjagrill týnd og horfin

 

  Ég átti erindi til Keflavíkur í kvöld.  Á leið þangað ætlaði ég að koma við í Fitjagrilli.  Mig minnir að matsölustaðurinn hafi heitið það.  Hann var staðsettur í sama húsi og bensínstöðin við hlið Bónus í Njarðvíkum.  Á gatnamótunum þar sem beygt er af Reykjanesbrautinni til Keflavíkur.  Þar greip ég í tómt.  Húsnæðið læst og inn um glugga mátti sjá að Fitjagrill er horfið.

  Fyrir nokkrum árum átti ég dögum saman erindi til Keflavíkur um tíma.  Ég vandi mig á að koma við í Fitjagrilli og fá mér þar beikon og egg með kartöflukökum sem kallast á ensku hash brown.  Sama konan afgreiddi mig alltaf.  Til að byrja með pantaði ég þetta með því að biðja um beikon og hasskökur.  Fljótlega lærði konan inn á þetta.  Þegar ég birtist spurði hún:  "Beikon og hasskökur?"  

  Eitt sinn er ég mætti sagði konan hinsvegar:  "Þú ert nú meiri kallinn.  Það er þér að kenna að ég gerði mig að fífli í gær."

  Hún útskýrði það þannig:  "Þegar þú varst nýfarinn héðan komu nokkrir útlendingar.  Þeir pöntuðu egg og beikon.  Það var erill og ég með pöntun þína í huga.  Þegar þeir báðu um egg og beikon spurði ég í hugsunarleysi hvort þeir vildu hasskökur með þessu.  Það datt af þeim andlitið og þeir urðu skrítnir á svipinn.  Ég fattaði þetta ekki strax en þegar ég sá hvað þeir urðu vandræðalegir áttaði ég mig loks á því að þú varst búinn að rugla mig í ríminu með því að kalla þetta hasskökur.   Ég bara stamaði og hikstaði og reyndi að útskýra fyrir þeim að við værum með hashbrowns.  Þeir virtust ekki alveg kaupa mínar útskýringar.  Þeir horfðu á mig grunsemdaraugum allan tímann sem þeir voru hérna inni."

Athugasemdir

[Óli minn, 1.9.2011 kl. 06:38]

Sennilega er þitt óskammfeilna framferði ástæðan fyrir því að Fitjagrilli var lokað og fjöldi manns missti vinnuna. Þetta hefur síðan haft keðjuverkandi áhrif sem leiddu til þess að atvinnulíf á Suðurnesjum er nú ein rjúkandi rúst. Allt út af þér.

[Ásthildur Cesil Þórðardóttir, 1.9.2011 kl. 08:26]

Hahahaha Jens aumingja konan

[Gunnar (IP-tala skráð) 1.9.2011 kl. 08:26]

Ég heyrði þessa sömu sögu og þú Óli minn

[Jóhann Elíasson, 1.9.2011 kl. 08:53]

Þessi kona heitir Aðalheiður og er kölluð Heiða.  Hún var búin að reka Fitjagrill í 23 ár og eins og gengur og gerist þá var sjaldan talað um Fitjagrill án þess að talað væri um Heiðu líka í bænum.  Það spurðist út hversu þægileg Heiða var og það varð alltaf smá aukning á starfseminni hún gat sér líka gott orð sem stuðningsaðili margra góðgerðarstofnana á svæðinu og svo studdi hún vel við bakið á körfuboltanum í Njarðvík.  En svo fór að yfirmenn Shell á Íslandi, sáu það að sennilega væri hún að hagnast á rekstrinum og sögðu henni upp húsnæðinu og vildu fara að gera þetta sjálfir.  Frá og með 1 júní hefur ekki verið nein starfsemi þarna og menn eru farnir að halda að ekkert verði úr að þeir hefji sjálfir veitingarekstur þarna.  Nú fæ ég ekki lengur "djúpsteikta pulsu" en mér skilst að það verði að fara til Akureyrar eftir svoleiðis löguðu og því nenni ég alls ekki .

[Jens Guð, 1.9.2011 kl. 09:54]

  Óli minn,  það skyldi þó aldrei vera!

[Jens Guð, 1.9.2011 kl. 09:56]

  Ásthildur Cesil,  já,  þetta hefur verið óskemmtileg reynsla fyrir hana.

[Jens Guð, 1.9.2011 kl. 09:56]

  Gunnar,  þetta er greinilega altalað.

[Jens Guð, 1.9.2011 kl. 09:57]

  Jóhann,  bestu þakkir fyrir þessar upplýsingar.

[Sverrir (IP-tala skráð) 1.9.2011 kl. 10:22]

Þú getur farið á N1(Aðalstöðina) Jóhann en þar er hins vegar ekki hægt að kaupa hana nema þá að þeir troði frönskum ofan í brauðið(ekki seld öðruvísi). Fyrir það á svo að borga nærri 700 kall ef ég man rétt en af einhverjum ástæðum hef ég aldrei keypt hana hjá þeim.

[Jens Guð, 1.9.2011 kl. 10:54]

  Sverrir,  það á enginn að láta sjá sig nálægt Neinum.

[Guðmundur Ásgeirsson, 1.9.2011 kl. 13:22]

Ekki Neinn.

[Jens Guð, 1.9.2011 kl. 15:21]

  Guðmundur,  alls ekki Neinn.

[Óskar Helgi Helgason (IP-tala skráð) 1.9.2011 kl. 21:30]

Heill og sæll Jens Guð - og aðrir, þinna ágætu gesta !

Afleitar fregnir; af hinu mæta Fitja grilli. Góður áningarstaður minn; oftlega, þegar ég hefi verið í söluferðum (verkfæra málmiðnaðar) syðra - einhver; bezti matsölustaður, norðan Alpafjalla - og austan Grænlandsstranda, miðað við stærð og umfang, þessa viðkunnan lega umhverfis. 

En flest er; í veröldinni hverfult, Jens minn.

Upplýsandi mjög, frásaga Jóhanns Elíassonar Stýrimanns, að öðrum ólöstuðum.

Með beztu kveðjum; sem jafnan, úr Árnesþingi /

Óskar Helgi Helgason

[Jens Guð, 1.9.2011 kl. 22:13]

  Óskar Helgi,  ég tek undir þín orð.

[Ólafur Sigurðsson (IP-tala skráð) 2.9.2011 kl. 01:03]

Sammála um hvað það var gott að koma þarna við í hamborgara. En það er önnur sjoppusaga, munið eftir Skalla við Vesturlandsveg? Fyrir neðan Ölgerðina. Jón á Skalla, sem átti þetta líka í den þegar Skalli var við Lækjargötu, varð að flytja því olíufyrirtækið endurnýjaði ekki leigusamninginn, og setti svo upp "Stöðina" þarna. Ég er stundum að njósna þarna og það er ekkert að gera þar, enda finnst mér þetta orðið ömurlega sjoppa. En í nýju sjoppunni hjá Jóni, í Ögurhvarfi er alltaf fullt og þangað fer ég stundum.

[Jens Guð, 2.9.2011 kl. 02:02]

  Ólafur,  takk fyrir þessar upplýsingar.  Gott að vita að Skalli sé ennþá starfandi.  Ég vissi ekki hvað olli þessum breytingum á lúgusjoppunni við Vesturlandsveg.  Síðast þegar ég gerði mér þangað ferð var eins og eitthvað rugl í gangi.  Það var búið að fjarlægja merkingar utan á húsinu um "Akureyring" (norðlenska útfærslu á hamborgara).  Ég spurði út í þetta.  Svarið var að við breytingar á merkingum og matseðli hefði "Akureyringurinn" fallið út vegna gleymsku.  Ég pantaði "Akureyring" og heyrði unglingana sem unnu þarna spyrja hvern annan út í hvernig ætti að útbúa "Akureyring".  Eitthvað fleira pantaði ég sem olli angist unglinganna sem voru greinilega óvanir að afgreiða annað en kók og Prince Póló. Fyrir utan vandræðaganginn tók afgreiðslan rosa langan tíma.  Samt var ég eini kúnninn en starfsfólkið að minnsta kosti 3 eða 4. 

  Ég ákvað að eyða tíma mínum í eitthvað annað næst en hanga fyrir utan lúguna þarna.  Þess vegna hef ég ekkert verslað þarna síðan (í kannski 2 mánuði eða eitthvað).  

[Óli minn, 3.9.2011 kl. 08:57]

Þetta er þriðja sagan sem ég hef heyrt af því að bensínsala hafi leigt utanaðkomandi húsnæði til reksturs sjoppu en síðan sagt samningnum upp (eða ekki endurnýjað hann) til að geta verið með reksturinn sjálfir eftir að viðkomandi rekstraraðili byggði reksturinn upp. Þetta er Skalli v/Vesturlandsveg sem nú er í ögurhvarfi, Gullnesti í Olís v/Gullinbrú sem nú er komið á Gylfaflöt, og svo Fitjagrill.