Illa gölluð verðkönnun ASÍ

  Síðasta verðlagskönnun ASÍ hefur vakið mikla athygli.  Einkum vegna þess að hún leiddi í ljós að Bónus er ekki lengur með ódýrustu (eða minnst dýru) matarkörfuna.  Matarkarfan í Krónunni reyndist vera ódýrust og Víðir á svipuðu róli og Bónus.  Talsmenn Bónus eru ekki par sáttir.  Vísa til þess að þar fáist bananar á 198 krónur í stað þess að í matarkörfu Bónus lentu bananar á 247 krónur (eða eitthvað svoleiðis).  Jafnframt að í matarkörfu Bónus var hreint kjöthakk lagt að jöfnu við kjöthakk drýgt með soyakjöti í öðrum verslunum.

  Þessi dæmi sýna að verðkönnun ASÍ er meingölluð.  Það er algjörlega ófært að bera saman verð á ósambærilegum vörum.  Til að svona verðkönnun gefi rétta mynd af verðmun á milli verslana verður að vera um samskonar vöru að ræða.  Annað er út í hött.  

  Heimfærum þetta upp á bíla.  Ein bílasala selur BMW.  Önnur selur Skoda.  Sú síðarnefnda selur ódýrari bíl.  En þetta eru ekki eins bílar.

  Bónus selur vissulega banana á 198 kr.  kílóið.  Það eru svartblettaðir linir bananar á síðasta snúningi.  Kannski nothæfir í bakstur með því að skera burtu svörtustu blettina.  En á engan hátt samanburðarhæfir við grænleita og stinna ferska banana.  

  Það getur ekki verið meira mál fyrir ASÍ að bera saman verð á samskonar vörum,  sömu vörumerkjum,  sömu gæði,  heldur en að bera saman verð á vörum í mismunandi gæðum frá mismunandi framleiðendum.  

  Á meðan þessi afleitu vinnubrögð ASÍ eru stunduð eru verðkannanir þess aðeins vísbending um raunverulegan verðmun á milli verslana en ekki marktækar að öðru leyti.  Engu að síður er athyglisvert að ekki sé lengur á vísan að róa með að Bónus sé ódýrasta matvöruverslunin.  Sú var tíð að Bónus var verulega ódýrari en aðrar verslanir.  Hvað veldur breytingunni?  

Athugasemdir

[Óli minn, 3.9.2011 kl. 08:50]

Hvað hefur breyst? Nú, þeir sem reka Bónus núna eru ekki með sama eldmóðinn fyrir rekstrinum og fyrri eigendur. Það finnur maður langar leiðir.

[Gunnar (IP-tala skráð) 3.9.2011 kl. 18:46]

Jónína Ben sagði að Jóhannes hefði grátið á trúnó á fylleríi og sagt "ég kann bara að selja kjötfars". Það vantar svoleiðis kalla

[Sigurður I B Guðmundsson, 4.9.2011 kl. 21:57]

Kannski var það 400 krónu eplið þitt sem gerði gæfumuninn?

[Jens Guð, 4.9.2011 kl. 23:00]

  Óli minn,  þetta er rétt hjá þér.  Virðist vera.

[Jens Guð, 4.9.2011 kl. 23:01]

  Gunnar,  ég vona að hún hafi náð að hugga hann og benda á að það sé ekki ástæða fyrir neinn að gráta sem kann að selja kjötfars.  Það er kúnst.

[Jens Guð, 4.9.2011 kl. 23:01]

  Sigurður I. B.,  eplið telur.