Hrópandi kynslóðabil

  Ég skrapp í verslunarmiðstöðina við Krossmóa í Keflavík í dag.  Fyrir framan Nettó var sendibíll merktur grænum frostpinna,  svokölluðum Hlunki,  í bak og fyrir.  Bíllinn var mannlaus.  Hliðardyrnar voru upp á gátt.  Þar fyrir innan var frystikista með grænum frostpinnum.  Tveir drengir - á að giska 10 ára - tóku hvor um sig væna hrúgu af frostpinnunum.  Þeir fóru með frostpinnana út á bílaplanið.  Þar grýttu þeir pinnunum í allar áttir. 

  Ég veit ekki hver tilgangurinn var.  Drengirnir reyndu ekki að hitta neitt skotmark og köstuðu ekki af fullum krafti.  Svo fóru þeir á reiðhjólum í burtu. 

  Rétt í þann mund kom háöldruð kona gangandi.  Hún kom auga á nokkra frostpinna á bílaplaninu.  Hún tók þá upp og skoðaði í krók og kring.  Þeir voru í glæru plasti og virtust vera heillegir.  Eftir smá umhugsun stakk konan þeim í vasann og fór inn í búð.

  Háaldraður maður kom út úr búðinni og gekk yfir bílaplanið.  Hann rak augu í nokkra frostpinna.  Viðbrögð hans voru þau sömu og konunnar.  Svo fann hann bílinn sinn og ók burt með vasana úttroðna af grænum frostpinnum. 

  Í sama mund bar að aðra gamla konu.  Hún bar sig að alveg eins þau hin.  Þar með voru sennilega ekki lengur margir grænir frostpinnar á bílaplaninu. 

  Þarna kristallaðist kynslóðabil á krúttlegan hátt.  Krakkaskammirnar sáu ekki verðmæti í grænum frostpinnum.  En þeir náðu að gera sér skemmtun úr þeim.  Lítið er ungbarns gaman. 

  Gamalt fólk borðar ekki græna frostpinna.  En það getur ekki hugsað sér að láta þá liggja án hirðis á bílaplani.    

Athugasemdir

[Ásthildur Cesil Þórðardóttir, 6.9.2011 kl. 10:31]

Var ekki bara Guð að verki þarna, gamlafólkið hefði örugglega löngun í frostpinna og strákakjánarnir voru þarna verkfærið  Maður á alltaf að hugsa jákvætt Jens minn.

[Sigurður I B Guðmundsson, 6.9.2011 kl. 12:57]

Ekki er það nú góð meðmæli með "Hlunki" að markhópurinn sem er helsti kaupandinn skuli ekki sýna "Hlunknum" meiri áhuga en þetta. En þetta var þjófnaður hjá strákunum og þú horfir á þetta gerast án þess að grípa inn í?

[Jens Guð, 6.9.2011 kl. 23:16]

  Ásthildur Cesil,  þetta er góð tilgáta hjá þér.  Að minnsta kosti voru allir glaðir þegar upp var staðið.

[Jens Guð, 6.9.2011 kl. 23:19]

  Sigurður I. B.,  ég held að ekki hafi verið um eiginlegan þjófnað að ræða.  Svo var að sjá sem gestum og gangandi væri heimilt að ganga að vild í þessa frostpinna.  Eða ég veit ekki af hverju þetta var glennt framan í fólk án þess að neinn hefði eftirlit með því.