Spennandi heilsudagar í Krónunni

  Í Fréttablaðinu í dag auglýsir matvöruverslanakeðjan Krónan HEILSUDAGA.  Undir textanum "HEILSUDAGAR í Krónunni" er skemmtileg teikning af málbandi sem rúllast utan um hjarta.  Þar fyrir ofan er ljósmynd af fjórum 2ja lítra Coca-Cola flöskum og útlendum jóladagatölum.  Undir myndunum stendur:  "Með kaupum á 4x2L af Coke kippu fylgir jóladagatal að eigin vali á meðan birgðir endast."

  Það er nýlunda á þessari öld að Coca-Cola sé á þennan hátt tengt heilsudögum.  Þegar betur er að gáð er líkast til lagt út frá því að jóladagatölin innihaldi ekki sykrað sælgæti,  eins og oft vill verða. 

  Í auglýsingunni er einnig vakin athygli á ágætu verði á Mackintosh.  Mér skilst að það sé sér íslenskt uppátæki að sælgætið Quality Street sé kallað Mackintosh.  Alveg eins og það var sér íslenskt uppátæki að kalla kaffibæti Export.  Í tilfelli kaffibætisins er sagan víst á þá leið að SÍS hóf innflutning á kaffibæti.  Þegar fyrsta sending skilaði sér í hús voru vörubrettin merkt í bak og fyrir merkingunni "EXPORT",  sem þýðir "Til útflutnings".  Á þeim árum kunnu fáir Íslendingar ensku og héldu að kaffibætirinn héti Export. 

Athugasemdir

[guðmundur Júlíusson (IP-tala skráð) 19.11.2011 kl. 00:32]

Þú ert annsi mikið á grennsunni kæri vin, hefur þú eitthvað á móti Krónunni?   Við íslendingar höfum alltaf kallað þetta uppáhaldskonfekt okkar "Mackintosh" Því það vill svo til að Quality Street var stofnað árið 1936 af manni frá Halifax, nefnilega honum Mackintosh!!        

[Jens Guð, 19.11.2011 kl. 00:47]

  Guðmundur,  því fer fjarri að ég sé á grennsunni gagnvart Krónunni.  Þvert á móti geri ég þar reglulega væn innkaup til að stuðla að heilbrigðri samkeppni við Bónus.  Þess vegna einmitt fylgist ég með náið auglýsingum frá Krónunni.  

  Íslendingum er tamt að tala um Mackintosh þegar rætt er um Quality Street nammið.  Aðrir gera það ekki.  En eins og þú bendir á þá er það ekki alveg út í hött.  Þetta nammi nýtur mikilla vinsælda á Íslandi en útlendingar kalla það Quality Street.  Það er merkt þannig á umbúðum þó að Íslendingar tali um Mackintosh.