Afstýrðu á einfaldan hátt illvígum sjúkdómum af völdum tannbursta

  Eins og allir vita þá má rekja fjölda meltingarfærasjúkdóma,  öndunarfærasjúkdóma,  hjartasjúkdóma,  nýrnasjúkdóma,  æðasjúkdóma og blóðeitrana til tannbursta.  Tannburstar eru einhverjar mestu og verstu gróðrarstíur fyrir óþverra bakteríur sem um getur.  Tannburstarnir eru iðulega alveg löðrandi í bakteríum af ýmsu tagi.  Það geta verið allt upp í 700 tegundir af bakteríum á einum tannbursta.  Látið ekki sakleysislegt útlit tannbursta blekkja ykkur.  Þetta eru stórhættuleg kvikindi.

  Það sem gerist er að við notkun berast þessar bakteríur í hár burstans.  Þær geta lifað þar og orðið illvígari í allt upp í heila viku.  Verst er ástandið þegar margir geyma sína bursta í sama glasi.  Þá verður krossmengun.  Þetta er viðbjóður.  Svo ekki sé minnst á tungusköfuna.  Hún er bakteríusprengja.

  Góðu fréttirnar eru að það er vandalaust að forðast veikindi af völdum tannbursta og tungusköfu.  Það eina sem þarf að gera er að kaupa 16 eða 24 tannbursta (fer eftir því hvað fólk burstar tennur oft á dag) og annað eins af tungusköfum.  Hvert stykki skal geyma á þurrum stað og hafa góða fjarlægð á milli þeirra allra.  Það getur verið ágætt að dreifa þeim á milli 2ja - 3ja herberga.  Málið er að nota hvern bursta og hverja sköfu með í það minnsta 8 daga millibili. 

  Til öryggis er full ástæða til að stinga tólunum í vodka og láta þau liggja þar í nokkrar mínútur fyrir notkun.  Fá sér síðan nokkur skot sjálf/ur.  Ef löngun kviknar í meiri vodka að loknum munnþrifum er hægt að sötra vökvann í gegnum gosrör (það er, jú, búið að bursta tennurnar).  Eða sprauta honum í æð.      

Athugasemdir

[Ásthildur Cesil Þórðardóttir, 24.11.2011 kl. 10:47]

Verst að rauðvín gerir ekki sama gagn

[Ásdís Sigurðardóttir, 24.11.2011 kl. 11:30]

[Valdimar Samúelsson, 24.11.2011 kl. 12:44]

Mæli með listerín. og einum tannbursta. Ef fólk geymir tannbursta í glasi þá að setja blöndu af listerín í glasið og geyma tannburstann þar á milli notkunar. Ég hef ætlað að gera þetta í tugi ára en ekki komið því í verk enda tennur ágætar og heilsa góð. (Listerín er bakteríudrepandi munnskolvatn.)

[Ásthildur Cesil Þórðardóttir, 24.11.2011 kl. 13:05]

Góð hugmynd Valdimar, en þarf maður nokkuð að sleppa votkanu?

[Valdimar Samúelsson, 24.11.2011 kl. 13:09]

Heyrðu Ásthildur. Líklega hefði ég framkvæmt þetta fyrir mörgum árum ef mér hefði dottið í hug að nota vodka. Þarf að hugsa núna. :-)

[Ásthildur Cesil Þórðardóttir, 24.11.2011 kl. 13:12]

Hahahahaha

[Jens Guð, 24.11.2011 kl. 22:29]

  Ásthildur (#1),  það gerir ekki sama gagn í þessu tilfelli.  En hentar vel með kjötmáltíðum.

[Jens Guð, 24.11.2011 kl. 22:29]

  Ásdís,  takk fyrir innlitið.

[Jens Guð, 24.11.2011 kl. 22:30]

  Valdimar  (#3),  það má líka nota hreinsað bensín.  Ertu með umboð fyrir Listerín?

[Jens Guð, 24.11.2011 kl. 22:31]

  Ásthildur (#4),  það er engin ástæða til að sleppa vodkanu.  Þvert á móti.

[Ásthildur Cesil Þórðardóttir, 25.11.2011 kl. 10:20]

Það lýst mér vel á

[Sigurbjörg Sigurðardóttir, 27.11.2011 kl. 13:22]

hef alltaf notað matarsóda,en kanski er það ekki nóg.

[Ásthildur Cesil Þórðardóttir, 27.11.2011 kl. 13:48]

Nei heillin það er sko ekki nóg