Gífurleg eyðilegging og tjón í Færeyjum. Svakalegar myndir

  Þarna fór fjárhús í klessu.  Ekki fylgir sögunni hvað varð um rollurnar.  En næsta víst er að þær hafa orðið hissa.  Tryggingafélögum hafa borist á annað þúsund tilkynningar um tjón.  Og sér hvergi fyrir enda á.  Símkerfi tryggingafélaganna hafa verið rauðglóandi í allan dag.  Vegna þess var haldið áfram að svara í síma fram eftir kvöldi (í stað þess að loka á auglýstum lokunartíma).  Jafnframt verður, aldrei þessa vant, opið á morgun. 

  Færeysk tryggingafélög eru frábrugðin þeim íslensku.  Meðal annars að því leyti að þau færeysku leitast við að bæta tjón og eigendur þeirra ræna ekki bótasjóð. 

Það er kaldhæðnislegt að veðurmælingastöðvar voru á meðal þess sem fauk út um mela og móa.  Einnig fauk útvarpsmastur Rásar 2,  annarri tveggja útvarpsstöðva í einkaeigu (hin er kristilega stöðin Lindin).

 

  Allra handa hús, skúrar, hjallar og kofar fuku á haf út eða út í móa.

  Vegvísar,  umferðarmerki,  vegrið og þess háttar lögðust á hlið eða færðust lengra úr stað. 

  Bátar slitnuðu frá bryggju og sumir þeirra ráku upp á land.  Neðri myndin sýnir betur veðurhaminn og sjólagið.

  Þök rifnuðu upp af húsum.  Sum fuku út í buskann.  Í verstu tilfellunum rústuðust húsin.

  Bílar fuku út um allt;  fuku hver á annan og ýmislegt dót fauk á og skemmdi bílana.

  Fiskikör fuku út um holt og hæðir eða hlóðust upp í kös í húsaskotum.

  Vörubílstengivagn rúllaði um svæðið.  Hér er hann á hlið.

  Sólskálar smölluðust.

  Veðurhamurinn lék gervigrasavelli illa.

  Gámar voru á meðal þess sem fór í sjó.

  Tré brotnuðu og liggja eins og hráviður um allt.  Á ferðalagi þeirra um eyjarnar beygluðu þau handrið og brutu hitt og þetta.

Þök fuku og bátar losnuðu

Athugasemdir

[Sigurður (IP-tala skráð) 25.11.2011 kl. 22:32]

Takk fyrir Jens að sýna okkur þessar myndir af hamförunum í Færeyjum. Nú verðum við að sýna frændum og " nágrönnum" hug okkar í verki og hefja söfnun.  það setur að manni óhug. Við sluppum í þetta skiptið en getum við átt von á veðurofsa  af þessum styrkleika ?

[P.Valdimar Guðjónsson, 25.11.2011 kl. 22:41]

Maður er margs fróðari um stærð þessa fárviðris á skalanum eftir að sjá þessar myndir Jens.   Greinilega mikið gengið á.

Takk fyrir að miðla þessu.

[Óskar Þorkelsson, 25.11.2011 kl. 23:17]

Þetta er rosalegt veður, er yfir noregi núna.. norður noregi.

[Ólafur Þórðarson, 25.11.2011 kl. 23:29]

Þetta er ekkert smá. Ertu staddur í Færeyjum, Jens, og tókst þú þessar myndir?

[Guðmundur Brynjólfsson (IP-tala skráð) 25.11.2011 kl. 23:33]

Nú er gott fyrir þá Færeyinga að eiga hauk í horni sem gervigrasalæknir. Þú hlýtur að geta doktorað fótboltavöllinn hjá þeim.

 En, grínlaust þá er þetta alveg rosalegt að sjá. Og kindurnar hissa, segir þú! Ég get bara sagt þér það að í dag sá ég nokkrar kindur hér á Bakkanum sem ég kannaðist ekkert við. Og þær voru ekki bara hissa, þær voru rétt að ná sér niður!

[Jens Guð, 26.11.2011 kl. 02:33]

  Sigurður,  það á vissulega að vera Íslendingum ljúft og skylt að sýna Færeyingum góðan hug í verki.

[Jens Guð, 26.11.2011 kl. 02:34]

  P. Valdimar,  takk fyrir innlitið.

[Jens Guð, 26.11.2011 kl. 02:35]

  Óskar,  er það jafn grimmt þar og í Færeyjum?

[Jens Guð, 26.11.2011 kl. 02:37]

  Veffari,  nei,  ég er ekki í Færeyjum og tók ekki þessar myndir sjálfur.  Ég hef verið að lesa á færeyskum netsíðum um óveðrið,  færeyskum spjallsíðum og verið í sambandi við Færeyinga.

[Jens Guð, 26.11.2011 kl. 02:50]

  Guðmundur,  mér er illa brugðið að sjá þessar myndir.  Ég kannast vel við suma staði þarna.  Eins og rauða húsið merkt Tötingsvirkið.  Það er mest áberandi og stærsta húsið í Götu. Sést allsstaðar frá í Suðurgötu.  Tötingsvirkið þýðir Prjónastofan.  Það er eins og heil eining hafi rifnað af húsinu:  Þak og framhlið með glugga og öllu.

[Helga Kristjánsdóttir, 26.11.2011 kl. 04:42]

 Sammála nú þurfum við að sýna Færeyingum hug okkar.þetta hefur verið aldeilis ´brjálað bál. Kannast við það  af Vestfjörðum,þar sem nótabátar fuku eins og eldspítustokkar. Þökk sé því að engir týndu lífi,það verður ekki bætt,en við getum hjálpað við lagfæringar. Full af atvinnulausum,sem eiga heimangengt vonandi.

[Ásdís Sigurðardóttir, 26.11.2011 kl. 10:25]

Takk fyrir myndirnar, þetta var geðveikt rok, gott að vera laus við það.

[Ásthildur Cesil Þórðardóttir, 26.11.2011 kl. 10:59]

Það er hræðilegt að sjá þetta.  Nú verður íslenska ríkisstjórnin að bregðast skjótt við og senda mannskap til aðstoðar og peninga til uppbyggingar.  Það verður að gerast núna strax.  Og svo verða íslendingar að fara að safna sjálfir.  Þetta eru svo sannarlega náttúruhamfarir.  Takk fyrir að benda á þetta, myndir segja meira en þúsund orð Jens minn. 

[Jens Guð, 26.11.2011 kl. 14:06]

  Helga,  já,  það var mikið lán í því óláni sem veðurhamurinn var að enginn skyldi slasast illa eða týna lífi.  Ég hef aðeins heyrt af 4 mönnum sem slösuðust lítillega. 

[Jens Guð, 26.11.2011 kl. 14:08]

  Ásdís,  þetta var víst töluvert kröftugra rok en sá styrkur þarf að vera sem mælir fellibyl.

[Jens Guð, 26.11.2011 kl. 14:18]

  Ásthildur,  ég er að velta fyrir mér hvernig Íslendingar geti helst sýnt stuðning.  Færeyingar eru yfirleitt vel tryggðir og færeysku tryggingarfélögin baktryggð.  Það er spurning hvort nægilega margir iðnaðarmenn séu á lausu í Færeyjum til að gera upp skemmdu húsin.  Færeyingar eru,  jú, aðeins 48 þúsund manna samfélag.  Álíka fjöldi og íbúar Hafnafjarðar og Garðabæjar til samans.  Atvinnuástand hefur verið gott.

  Ofan á þetta bætist að svo virðist sem ungur Færeyingur hafi verið myrtur nýverið af aðkomumanni.  Líkið hefur ekki fundist en verksummerki benda til mikilla átaka. Svo er ekki komin niðurstaða í hvernig nákvæmlega dauða annars Færeyings bar að í fyrradag.  Hann fannst látinn úti á götu með hníf í brjósti.  Í fljótu bragði hefur verið áætlað að um sjálfsvíg sé að ræða.  Maðurinn hafði hótað einhverju í þá veruna.

  Þessi atvik hafa fyllt Færeyinga miklum óhug.  Færeyingar hafa aðeins heyrt fréttir af svona löguðu frá útlöndum.  

[Ásthildur Cesil Þórðardóttir, 26.11.2011 kl. 14:26]

Ég held að við ættum að senda björgunarsveitirnar okkar, þeir eru vanir að gera við skemmdir og koma að þar sem óveður hefur átt sér stað.  Einnig eru örugglega smiðir og aðrir iðnaðarmenn á lausu sem hægt væri að senda með stuttum fyrirvara. Við getum gert svo margt með stuttum fyrirvara vilji er allt sem þarf. 

[Gunnar Th. Gunnarsson, 26.11.2011 kl. 14:26]

Magnaðar myndir. Takk

[Jens Guð, 28.11.2011 kl. 00:09]

  Gunnar Th.,  sömuleiðis takk fyrir innlit.  Núna var að slá inn að ölduhæð í Færeyjum hafi slegið heimsmet.  Meðalölduhæð var 29,7 metrar og hæsta ölduhæð 40 metrar. 

[Jens Guð, 28.11.2011 kl. 00:11]

  Ásthildur,  mér dettur í hug að Íslendingar ættu að reisa öldrunarheimili á Suðurey. Það fauk á haf út aðeins mínútu eftir að síðustu vistmönnum var komið í skjól.  Þak fauk,  heil álma og vistheimilið verður ekki reist nema frá grunni. 

[Ásthildur Cesil Þórðardóttir, 28.11.2011 kl. 09:51]

Það er frábær hugmynd.