Veitingahússumsögn

 

.

- Veitingastaður:  Hrói höttur,  Hringbraut

- Réttur:  Pönnusteiktur fiskur

- Verð:  1890 kr.

- Einkunn:  **** (af 5)

.

  Fátt er betra en pönnusteiktur fiskur.  Einkum ef ekki er troðið utan á fiskinn raspi,  deigi eða öðru slíku.  Pönnusteiktur fiskur í Hróa hetti er eins og best verður á kosið.  Snöggsteiktur strípaður en nógu vel til þess að hann er fagurlega brúngullinleitur á báðum hliðum, stökkur yst en mjúkur og þéttur að innan.

  Þetta er þorskur.  Það er gott.  Hann er bragðsterkari og betri en hræætan ýsa,  sem því miður er víðast boðið upp á þegar réttur heitir pönnusteiktur fiskur.  

  Fiskstykkin eru tvö og nokkuð stór.  Bökuð kartafla var næstum því of lítil til að duga með þeim.  Eflaust er bakaða kartaflan stundum örlítið stærri - ef ég þekki bakaðar kartöflur rétt. 

  Það vantaði smjör eða sýrðan rjóma eða eitthvað slíkt með kartöflunni.  Kannski gleymdist það.  Afgreiðslustúlkan brá snögg við og sótti smjör þegar á þetta var bent.

  Ágætt hefði verið að hafa pipar á borðinu til að strá yfir smjörið á kartöflunni.  Í staðinn mátti nota krydd sem kennt er við franskar kartöflur.  Það er á borðum ásamt salti.

  Þó að bakaða kartaflan væri í smærra lagi þá kom það ekki að sök.  Ferska salatið var vel útilátið.  Í því var m.a. paprika og agúrkur.  Aldeilis prýðilegt.

  Á matseðli stendur að sjávarfangssósa sé með pönnusteikta fisknum.  Hún var fjarri góðu gamni.  Þess í stað var ljúffeng sveppasósa.

  Með pönnusteiktum fiski á alltaf að vera örþunn sítrónusneið.  Bæði til að útiloka matareitrun (sem að vísu eru litlar líkur á) en öllu fremur upp á bragð að gera.  Sítrónusneiðina vantaði.  Ekkert stórmál.  Áreiðanlega hefði verið auðsótt mál að fara fram á sítrónusneið.  Ég hafði bara ekki rænu á því.  Þetta var ljómandi gott eins og það var.

  Án þess að hugsa út í hvort súpa dagsins væri með í pakkanum fékk ég mér súpu í skál.  Það var grænmetis- og núðlusúpa með chili bragði.  Dálítið asíuleg og bragðgóð súpa.

  Hrói höttur er millifínn veitingastaður.  Ég mun oftar fá mér pönnusteiktan fisk þar.  Það er góður réttur. 

 

 

   

 

Athugasemdir

[Bergur Ísleifsson (IP-tala skráð) 14.1.2012 kl. 04:18]

Mmmm ... algjört lostæti. Ég er samt sökker fyrir kokteilsósu með pönnusteiktum fisk. Man ekki hvaðan ég greip það. Sjálfsagt ekki hollt en á ótrúlega vel saman. En ég nota aldrei sítrónu eins og mörgum finnst svo nauðsynlegt að kreista yfir. Mér finnst sítrónubragðið, jafnvel bara pínulítið af því, bara skemma. Svona réttur kostar um 600 kall á veitingastað í Kína.

[Grrr (IP-tala skráð) 14.1.2012 kl. 10:04]

Ég þarf greinilega að endurskoða Hróa, ég hef bara tengt hann við pizzur. Þetta hljómar mjög vel.

[Högni Snær Hauksson, 14.1.2012 kl. 20:31]

Sæll Jens kíktu til mín á Sundlaugaveginn (Fiskbúðin Sundlaugavegi 12) og ég skal redda þér allvöru máltíð á grillið, pönnuna ofninn eða bara til suðu, alltaf ferskur fiskur daglega. Súran hval siginn fisk harðfis og allt milli himins og jarðar......Veru ávalt velkominn.

Kveðja Högni Snær  (www.kliddi.blog.is) 

[Jens Guð, 15.1.2012 kl. 23:28]

  Bergur,  takk fyrir þessar upplýsingar.  Kokteilsósa er séríslenskt fyrirbæri.  Ég þarf að prófa hana með steiktum fiski.  Um helgina var mér boðið upp á steiktan fisk með remúlaði.  Ég var tregur til.  En þegar á reyndi þá passaði hún all bærilega með. 

[Jens Guð, 15.1.2012 kl. 23:29]

  Grrr,  pizza er ekki matur.  En steikti fiskurinn á Hróa er eðal.

[Jens Guð, 15.1.2012 kl. 23:30]

  Högni Snær,  bestu þakkir.  Súr hvalur er freistandi,  svo og harðfiskur.  Ég elda aldrei sjálfur.  En ég mun tékka á hvalnum og harðfisknum hjá þér.