Spennandi tímamót í Færeyjum

  Færeyskur bjór er sá besti í heimi.  Það er ekki aðeins mín skoðun.  Færeyskur bjór hefur rakað að sér verðlaunum þvers og kruss um heiminn.  Stóru bjórrisarnir í heiminum hafa jafnframt ítrekað óskað eftir viðræðum við færeyska bjórframleiðendur um að koma færeyskum bjór undir sína vörulínu.  Án árangurs.  Færeyskir bjórframleiðendur eru stoltir af sínum bjór og sáttir við sína stöðu.  Núna eru þeir ennþá sáttari en áður.

  Í fyrra var áfengislögum í Færeyjum breytt.  Frá og með næst komandi 1. apríl er heimilt að selja í Færeyjum bjór sem er sterkari en 5,8%.  Eftir þessu höfðu færeyskir bjórunnendur beðið síðan 1907.  Þeir voru margir orðnir nokkuð langeygir eftir þessum tímamótum.

  Þegar lögunum var breytt myndaðist strax gríðar mikill spenningur og eftirvænting í Færeyjum.  Það var reiðarslag er uppgötvaðist að 1. apríl ber upp á sunnudag.  Þá eru vínbúðir (Rúsdrekkasölan) í Færeyjum lokaðar.  Lögin taka því ekki gildi í raun fyrr en 2. apríl.

  Rótgrónasti bjórframleiðandinn í Færeyjum,  Föroya Bjór,  setur á mánudaginn á markað 8,5% bjórinn Træveturin (Þriggja vetra hrútur) og 10% bjórinn Sterkur Veðrur (Rammur hrútur).  Gott getur verið að vita að færeyska orðið veðrur er framborið veggrur.

  Træveturin hentar best með bragðsterkum mat,  dökku kjöti,  signu kjöti og sígnum fiski.  Það er líka gott að þamba hann af stút.

  Sterkur Veðrur smellpassar með ostum,  ljósu kjöti,  laxi,  lúðu og rauðsprettu.  Hann er einnig góður þambaður af stút.

  Annar færeyskur bjórframleiðandi,  Okkara,  lætur sitt ekki eftir liggja.  Hann býður upp á 7,9% Portara og 7,6% Tróndur (Þrándur í Götu).

  Bjór frá Föroya Bjór er til sölu í íslenskum vínbúðum.  Það er viðbúið að Træveturin og Sterkur Veðrur spretti upp í vínbúðunum innan skamms.

Athugasemdir

[Húsari. (IP-tala skráð) 28.3.2012 kl. 11:32]

Hafi ábyrgðarmaður síðu þökk fyrir að vekja
athygli á tíðindum þeim sem að framan greinir.

Það er sérstakt tilhlökkunarefni að lög
um bjór í því formi sem greint er frá skuli hafa náð
fram að ganga og ástæða til að óska
frændum okkar til hamingju með þennan áfanga
og að sterku víni skuli þannig til frambúðar úthýst að mestu.

Til hamingju Færeyingar!

[Grrr (IP-tala skráð) 28.3.2012 kl. 11:36]

Mögnuð lög með 5.8%

Ég er viss um að ég hafi hitt á lífleiðinni einhvern sem að var vel drukkinn af -5% bjór og annan sem að lét vel eftir 40% viskí.

Það á ekki að taka hart á alkóhól prósentunni, það á að taka hart á fólki með háa alkóhól prósentu.

[Jens Guð, 31.3.2012 kl. 23:13]

  Húsari,  ég tek undir þín orð.

[Jens Guð, 31.3.2012 kl. 23:14]

  Grrr,  sammála.

[Jens Guð, 31.3.2012 kl. 23:16]

  Til gamans má geta að ég er með myndina sem fylgir þessari færslu húðflúraða á framhandlegg.