Mick Jagger fyrr og nú

 

  Forsprakkar bítlabylgju sjöunda áratugarins eru hver á fætur öðrum að hrúgast inn á áttræðisaldur um þessar mundir.  Það er dálítið skrítið fyrir mann á mínum aldri að fylgjast með því.  Ég var krakki þegar Bítlarnir,  The Rolling Stones, The Kinks,  The Animals,  Manfred Mann og allt það lið kom fram á sjónarsviðið og lagði undir sig markaðinn.  Það voru nú meiri lætin og æðið. 

  Ég heyrði ekki hver var í viðtali í síðdegisútvarpi rásar 2 í dag.  Þetta var varðandi endurfundi skólafélaga í Vesturbænum eða eitthvað svoleiðis.  Viðmælandinn hafði dálæti á The Shadows.  Svo heyrði hann í fyrsta skipti lag með Bítlunum.  Þá varð sprenging í hausnum á honum og hann hugsaði:  "Hvað nú með The Shadows?".

  Margir fleiri,  þar á meðal ég,  muna glöggt er þeir heyrðu í Bítlunum í fyrsta skipti.  Það varð sprenging í hausnum á manni.  Mér yngra fólk mun aldrei skilja þessa upplifun.

  Liðsmenn Bítlanna og Rollinganna hafa ætíð síðan verið það rækilega til umfjöllunar í fjölmiðlum og enn í dag að maður hefur varla tekið eftir því er aldurinn færist yfir þá.  Mick Jagger,  söngvari The Rolling Stones verður sjötugur á næsta ári.  Í huga mér hafði hann ekkert breyst.  En svo fór ég að bera saman gamlar og nýjar myndir af honum.  Galgopalegur svipur unglings hefur vikið fyrir svip virðulegs eldri manns. 

  Einhverra hluta vegna fannst mér aftur á móti fyrir löngu síðan sem Keith Richards væri orðinn fullorðinslegur í framan.  Förum ekki út í þá sálma að sinni.

  Mick 1962.  Krakkar í dag halda að kanadíski viðbjóðurinn, Justin Bieber, hafi byrjað með þessa hárgreiðslu.

  Svo síkkaði hárið örlítið.  Fór að ná yfir eyrun.

  Hárið hélt áfram að síkka og huldi eyrun.

  1965 var hárið komið niður á herðar.

  1968 var hárið komið niður á bak.

  Þar kom að hann fór að skipta hárinu í miðju.  Toppurinn var orðinn það síður.

  Hann fór að mála sig um augun og lita hárið svart til að skerpa á útlitinu.

  Aðeins eldri, kominn með bláa augnskugga og hárið klippt í stílnum "sítt að aftan".  

  Svo eru það nýlegar myndir af kappanum.  Kyntáknið er hætt að nota andlitsfarða.  En litar áfram á sér hárið og augabrúnir.  Raggi Bjarna,  sem er nokkuð eldri,  er unglegri þegar betur er að gáð.

 

  Mick Jagger er reggae-geggjari, eins og Keith glysbróðir hans.  Í gamla daga söng Mick með jamísku reggae-stjörnunni Peter Tosh (úr Bob Marley & The Wailers) og gaf út á plötu.  Að undanförnu hefur Mick gert út hljómsveitina Super Heavy með Damian Marley (syni Bobs).

  Svo var Peter Tosh myrtur.  Skömmu síðar sóttu blaðamenn bandaríska klámblaðsins Play Jamaica heim.  Þeir hittu gamla félaga Peters Tosh og spurðu hvort morðinginn hafi fundist.  Svarið var:  "já, við fundum þá og slátruðum þeim."  Blaðamennirnir hváðu og spurðu hvað löggan geri í svona dæmi.  Svarið:  "Löggan?  Þetta kom henni ekkert við.  það var enginn að bögga hana!"

  Til skýringar:  Dráp og morð eru algeng orð og tilvik á Jamaica.  Þar hafa verið framin allt upp í 600 morð á viku þegar verst lætur.  En, vel að merkja, sumar vikur eru engin morð framin á Jamaica.

Athugasemdir

[hilmar jónsson, 16.5.2012 kl. 21:05]

Bara ekki birta myndir af Keith Richards fyrr og nú.

Myrkfælið fólk gæti villst inn á bloggið þitt.

[Emil Hannes Valgeirsson, 16.5.2012 kl. 21:17]

Þrátt fyrir allt virðist hann hafa haldið nokkuð samhverfðu andliti. Allavega miðað við FreakingNews myndina.

[Jens Guð, 16.5.2012 kl. 22:54]

  Hilmar,  ég gæti mín.  Fyrir margt löngu fékk ég að gefnu tilefni viðvörun frá umsjónarmanni Moggabloggsins um að bloggfærslurnar verði að vera fjölskylduvænar.  Þó að lesendur míns bloggs séu að uppistöðu til fullorðið fólk þá lendi inngangur bloggs míns á forsíðu mbl.is og blog.is.  Það sem þar birtist verður að taka mið af að komi fyrir sjónir barna.  Ég vil ekki hræða þau með myndum af Keith.  Hinsvegar er ég að lesa bráðskemmtilega ævisögu hans þessa dagana.

[hilmar jónsson, 16.5.2012 kl. 22:59]

Las hana líka Jens, bráðskemmtileg og fróðleg. Þar m.a. kallaði hann Jagger píku og það fór víst eitthvað illa í þann munnvíða.

[Jens Guð, 16.5.2012 kl. 23:01]

  Emil Hannes,  það er rétt.  Þrátt fyrir mikla dópneyslu í áranna rás hefur Mick haldið sjálfhverfu í andliti.  Öfugt við marga (eins og Iggy Pop,  Yellowman og fleiri sem hafa skekkst í andliti). 

  En af því að ég minntist á dópneyslu Micks:  Charlie Watts upplýsti í blaðaviðtali við Jazz Beat að hvergi hafi hallað á Mick í dópneyslu þeirra félaga.  Hinsvegar hafi Mick aldrei orðið háður neinu dópi.  Öfugt við þá hina sem margir urðu ofur háðir allskonar dópi.  Mick geti notað heróín, kók og hvað sem er án þess að finna fyrir löngun til að nota það að staðaldri.  Hann tekur bara sínar syrpur og getur síðan verið án þessara vímugjafa mánuðum og árum saman.  Notar þá bara eitthvað annað sem er í umferð eða ekki neitt.  Hann er alveg ónæmur fyrir fíkninni. 

[Jens Guð, 16.5.2012 kl. 23:10]

  Hilmar,  ennþá verr lagðist í Jagger að Keith sagði Marianne Faithful hafa kvartað undan "litla furðufuglinum" hans.  Hehehe!  Mick varð svo um að hann fékk sína gömlu fyrrum konu og barnsmóður,  Jerry Hall, til að gefa yfirlýsingu um að hún hafi ekkert undan hans tólum að kvarta.  Ég man ekki hvar þeir fóstbræður áttu að mæta skömmu síðar.  Hvort það var við Frægðarhöll rokksins (Hall of Fame) eða við fótspor í stjörnu á götu í Hollywood eða hvar.  Þar neitaði Mick að mæta ef Keith kæmi líka.

  Keith hefur nú beðist afsökunar á þessum ummælum sínum.  En þetta situr í Mick.  Sem er dálítið broslegt í aðra rönd.  Og þó.  Þetta er stolt kyntröllsins.  Þessi spaugilega deila útilokaði hljómleika Rollinga í ár.  En Keith segist bjartsýnn á að þetta verði búið að jafna sig á næsta ári.  

[Jens Guð, 16.5.2012 kl. 23:17]

  Það er reyndar með ólíkindum hvað Mick hefur oft látið yfir sig ganga kjaftfor ummæli Keiths.  Keith hefur sagt Mick vera svo snobbaðan og tækifærissinnaðan að hann breyti um enskuframburð eftir viðmælendum.  Keith fordæmdi harkalega þegar Mick þáði Sir titil.  Sagði það vera í algjörri andstöðu við rokk og ról.  Skilgreindi það sem hneyksli.  Mick brást ókvæða við.  Ég man ekki hvernig hann orðaði það en ég heimfæri þau ummæli upp á Megas:  "Þeim sárast reiðin brennur / er girnist bíta en hefur ekki tennur."

[hilmar jónsson, 16.5.2012 kl. 23:25]

Já það vantar ekki að hann hafi birst sem hálfgerð píka í gegnum tíðina. Hefur alltaf virkað á mig sem maður í örvæntingafullri leit að viðurkenningu á því að hann sé eitthvað annað en miðlungs góður rokk söngvari.

Keith hins vegar held ég að sé ekta þó ruglaður sé.

[Jens Guð, 16.5.2012 kl. 23:53]

  Mick er betri en miðlungs góður söngvari.  Hann er rosalega lagviss.  Ég hef heyrt helling af "bootleg" (sjóræningjaútgáfum) hljómleikum með Stóns.  Hann er góður söngvari með stíl.  Á svona "bootleg" er algengt að heyra söngvara skramsa til í tón.  Ég hef til að mynda heyrt slatta með Bítlunum þannig.  En Mick syngur ekki falska nótu.  Hins vegar hef ég heyrt Keith slá feilnótur. 

  Hér er til að mynda eitthvað falskt dæmi í gangi:   http://www.youtube.com/watch?v=suo07vFTZmk&feature=related

[Jens Guð, 16.5.2012 kl. 23:55]

  Keith er gegnheill hvað varðar hreinskilni.  Og skemmtilega opinskár.  Reyndar hafa blaðafulltrúar Stóns oft "leiðrétt" ummæli hans eða reynt að gera gott úr þeirm.

[Jens Guð, 17.5.2012 kl. 00:00]

  Dæmi um það er þegar Keith sagðist hafa sniffað ösku pabba síns.  Umborðsskrifstofa RS fór á flug í að bera það til baka.  Líka þegar Keith datt úr tré og slasaðist.  Umboðsskrifstofan fór á flug og vildi meina að hann hafi dottið um trjárunna en hafi ekki verið að klifra í kókostré.