Hljómsveitin The Beatles The Next Generation

 

  Fyrir nokkrum vikum vakti heimsathygli frétt um að synir Bítlanna væru að hefja samstarf,  stofna hljómsveit, undir nafninu Næsta kynslóð Bítlanna (The Beatles The Next Generation).  Það var sonur Pauls McCartneys,  James McCartney (34 ára), sem átti hugmyndina.  Hann viðraði hugmyndina við syni annarra Bítla.  Zak, eldri sonur trommuleikarans,  Ringos,  var ekki áhugasamur.  Né heldur Julian,  eldri sonur Johns Lennons. 

.  Ekki var öll nótt úti þrátt fyrir dræmar undirtektir.  Sean (36 ára),  yngri sonur Johns Lennons, tók vel í hugmyndina.  Líka Jason (34 ára),  yngri sonur Ringos.  Svo og Dhani (33 ára),  einkasonur Georges Harrisons. 

  Þar með voru synir allra Bítlanna tilbúnir að taka þátt í tilrauninni.  

 .

  John Lennon var söngvari og gítarleikari Bítlanna.  Sean Lennon syngur og er flinkur gítarleikari.  Paul McCartney var söngvari og bassaleikari Bítlanna.  James syngur og spilar á gítar.  Hann er liðtækur á bassa,  eins og Sean.  George Harrison var gítarleikari Bítlanna.  Dhani er flinkur á gítar.  Hann getur líka sungið.  Ringo var trommari Bítlanna.  Jason spilar á trommur.

.

.

  Bítlarnir eru stærsta nafn rokksögunnar.  Hvort sem litið er á plötusölu eða áhrif.  Það getur ekki hver sem er hlaupið í þeirra skarð.  Enginn getur endurtekið þeirra afrek.  Enda var það ekki hugmynd James McCartneys.  En það stendur engum nær að endurskapa eitthvað í anda Bítlanna en sonum Bítlanna.

.

  Mörgum spurningum er ósvarað.  Synir Bítlanna standa frammi fyrir risa áskorun.  Á hljómsveit þeirra að vera eftirhermuhljómsveit sem krákar (cover songs) gömul Bítlalög?  Eða á hljómsveit þeirra að gera eitthvað á eigin forsendum?  Seinni kosturinn er vænlegri.  Kannski í bland við fyrri kostinn.

.

  Hugmyndinni um hljómsveitina Næsta kynslóð Bítlanna hefur verið illa tekið af Bítlaaðdáendum.  Mjög illa.

  Breska blaðakonan Jan Moir spyr hæðnislega:  "Eiga Yoko Ono og Heather Mills að syngja bakraddir?  Here comes the sons - Let It Be."  

.

  Jan bendir á að ekki einu sinni Bítlarnir sjálfir hafi haft áhuga á að endurreisa Bítlana eftir að sú hljómsveit hætti 1969 (formlega hætti hún 1970). 

  Synirnir hafa allir verið að fást við músík en áhugi á þeirra músík er lítill. 

.

  Jan segir það vera hrópandi að þeir tveir synir Bítla sem hafi náð árangri í músík vilji ekki vera með í The Beatles The Next Generation:  Julian Lennon og Zak Starkey.  Julian hefur átt lög á vinsældalistum.  Zak hefur gert það gott sem trommar The Who og Oasis. 

  Líklegt má telja að í huga fólks verði The Beatles Next Generation hljómsveit lúseranna.  Lúseranna sem nú eru eldri en þegar feður þeirra hættu í Bítlunum.  Og mörgum árum eldri en þegar feður þeirra lögðu heiminn að fótum sér sem Bítlar.

.

  Í breska dagblaðinu Daily Mail er dregið fram að að nokkrum dögum áður en James McCartney viðraði hugmyndina um The Beatles The Next Genereation hélt Paul faðir hans því fram að hver sú hljómsveit sem reyndi að líkja sér við Bítlana væri að "kyssa dauðann" (kiss of death).

.

  Synir Bítlanna eru allir í góðu sambandi hver við annan.  Þeim er vel til vina.  Það var þess vegna ekki óvænt að þeir veltu fyrir sér möguleika á samstarfi.  Þeir eru hins vegar hikandi við að hrinda hljómsveitinni The Beatles The Next Generation úr vör.  Kannski hafa viðbrögð almennings á síðum dagblaða og netmiðla kæft hugmyndina í fæðingu.

. 

  James McCartney og Sean Lennon hafa sent frá sér sitthvorar tvær sólóplötur.

  Hér krákar James gamlan Neil Young slagara:

   

  Sean syngur lag eftir pabba sinn:

 Dhani að leika sér:

Hér eru öll börn Bítlanna:

  Ef hljómsveitin The Beatles The Next Generation kemst á koppinn er upplagt fyrir hana að æfa og gera út frá Íslandi.  James og Jason eru búsettir í Bretlandi en Dhani og Sean í Bandaríkjunum.  Ísland er mitt á milli.  Dhani og Sean eru hvort sem er með annan fótinn á Íslandi.  Dhani giftur íslenskri konu,  dóttur Kára Stefánssonar.  Feður James og Jasons eru sömuleiðis hagavanir á Íslandi.  Einkum Ringo,  sem ýmist trommar með Stuðmönnum eða kveikir á Friðarsúlunni í Viðey með Sean og þeir taka lagið í Háskólabíói með Plastic Ono Band.

Athugasemdir

[Theódór Norðkvist, 22.7.2012 kl. 00:01]

Aðspurður á sínum tíma hvort hann, George og Ringo myndu endurvekja Bítlana sagði Paul að án Johns væru þeir þrír ekki Bítlarnir. Ef þeir kæmu saman yrði það band nefnt Þrítlarnir. Hæfileikaminni synir Bítlanna myndi ekki skila betri útkomu sem einhver uppfærsla af Bítlunum.

[Sigurður I B Guðmundsson, 22.7.2012 kl. 00:23]

Takk fyrir þennan fróðleik og frábærar myndir.

[Jens Guð, 22.7.2012 kl. 00:52]

  Theódór,  gott svar hjá Paul.  Það var dáldið grín gert að svari George við spurningu um endurkomu Bítlanna eftir að John var myrtur.  Svar hans var eitthvað á þá leið að svo lengi sem John væri dáinn myndu Bítlarnir ekki verða endurreistir.  Grínið gekk út á að þá þyrfti aðeins að endurlífga John og hindranir væru úr vegi. 

  Mér þykir gaman að hlera það sem Bítlasynir eru að gera í músík.  Sumt ágætt.  En það var sjarmi yfir Bítlunum,  sjarmi sem var um margt bundinn við tíðarandann er hljómsveitin starfaði.  Eftir á að hyggja hættu Bítlarnir á réttu augnabliki.  Það var eins og margt sem þeir gerðu:  Þeir voru réttir menn á réttum stað á réttum tíma.  Síðasta hljóversplata þeirra,  Abbey Road, og fyrstu sólóplötur þeirra benda til þess að þeir áttu kannski 2 - 3 ár eftir í besta falli til að standast tímans tönn og þá framþróun sem var í músík um 1970.  Það er að segja til að standast samanburð við það besta á þeim tíma (Led Zeppelin til að mynda).  

  Synir Bítlanna geta aldrei staðist samanburð við Bítlana.  Það er klárt.

[Jens Guð, 22.7.2012 kl. 00:53]

  Sigurður I.B.,  þetta eru skemmtilegar vangaveltur.

[Helga Kristjánsdóttir, 22.7.2012 kl. 03:58]

Takk fyrir þetta Jens, gott að hvíla frá fullveldis-baráttunn.

[Jens Guð, 22.7.2012 kl. 04:05]

  Helga,  það er alltaf gott að taka smá pásu frá amstri dagsins og hlusta á Bítlana.  Í og með til að pæla í hvað þeir voru góðir söngvahöfundar og djarfir í að fara ótroðnar slóðir í útsetningum.  Og allt gekk það upp í tilraunagleði þeirra. 

[Jens Guð, 22.7.2012 kl. 04:08]

  Strákarnir,  synina, skortir svo margt sem snýr að þeim galdri sem gerði Bítlana að því stórveldi sem þeir urðu,

[Sólveig Þóra Jónsdóttir, 22.7.2012 kl. 05:33]

Þakka þér fyrir góðan pistil og myndböndin. Ég er nú ekki frá því að þessir afkomendur Bítlanna gætu orðið næsta "æðið" í tónlist. Okkur vantar það. Það er ekkert að ske þannig lagað í heiminum í dag.

[Ásthildur Cesil Þórðardóttir, 22.7.2012 kl. 12:46]

FLott hugmynd, svo er að sjá hvað verður.

[Eiríkur Einarsson (IP-tala skráð) 22.7.2012 kl. 13:20]

Það fer ekki á milli mála að Bítlarnir einu og sönnu voru miklir afburða tónlistarmenn og miklum hæfileikum gæddir hvað tónlistargjöfina varðar, bæði í sköpun og flutningi. Ég hef því alveg trú á að "genísk" arfleið skili sér og alveg ágætis músík gæti komið frá þeim félögum, synum Bítlanna. En það er bara svo miklu meira sem spilar þarna inn í, t.d. þjóðfélagsbreytingar, tíðarandinn, unglingurinn verður til með tilheyrandi ungdómsbyltingu, börn fyrstu kynslóðar eftir stríð ryður sér til rúms og uppgötvar eigin eiginleika í samfélaginu og gerir uppreisn gegn ríkjandi gildum osvfr. Þá má því glögglega segja að Bítlarnir hafi verið rétta bandið á háréttum tíma þegar þeir brutust fram á sjónarsviðið með sína hæfileika og músíkin var notuð sem eitt helsta vígi og vopn æskunnar. Eins og Lennon sagði sjálfur: "Við vorum bara band sem var mitt inní hvirfilbylnum sem var að eiga sér stað á meðal vestrænnar æsku, og það vildi svo til að við sáum land álengdar þegar við svömluðum á flekanum okkar, ungdómurinn sá svo þetta land í okkur og gerði út á það". Þessi saga getur aldrei endurtekið sig á sama hátt, þannig að synir Bítlanna geta aldrei fetað í þeirra fótspor, en það getur verið áhugavert að heyra hvað kemur frá þeim tónlistarlega séð, þó sumir segi að þetta séu nánast helgispjöll að stofna svona band og hálf aumkunarverð framsetning á öllu ferlinu. En, Jens, ég var búin að segja þeir frá BA-ritgerðinni minni um ungdómsbyltinguna á sjöunda áratugnum í kjölfar Bítlanna sem þú hafðir áhuga á að nálgast, en hún er víst ekki fáanleg á netinu í Skemmunni hjá Þjóðbókahlöðunni, en hún var skrifuð árið 2003 og ekki byrjað að senda á netið. En ég var að finna hérna aukaeintak sem ég get látið þig hafa. 

[Sólrún (IP-tala skráð) 22.7.2012 kl. 19:37]

http://www.youtube.com/watch?v=58Amodaf-g8

Frábært hvað sumir eldast vel :)

http://www.youtube.com/watch?v=6H_CF1IKCN8

[Jens Guð, 24.7.2012 kl. 23:02]

  Sólveig,  það er rétt að það er ekkert sérstakt í gangi í músíkbransanum í dag,  samanborið við rokksprengjuna á sjötta áratugnum,  Bítlaæði sjöunda áratugarins,  pönkbyltinguna á áttunda áratugnum eða gruggbylgjuna á tíunda áratugnum.  Ég hef samt ekki trú að að afkomendur Bítlanna starti neinni senu.

[Jens Guð, 24.7.2012 kl. 23:03]

  Ásthildur Cesil,  ég hef grun um að neikvæð viðbrögð almennings og Bítlaaðdáend kaffæri þessa hugmynd.

[Jens Guð, 24.7.2012 kl. 23:05]

  Eiríkur,  ég kvitta undir þínar hugleiðingar.

[Jens Guð, 24.7.2012 kl. 23:18]

  Ég verð að bæta við að oft hefur í sögu rokksins eitthvað komið úr óvæntri átt.  Bítlarnir eru gott dæmi.  Þegar þeir komu fram hafði bandríski músíkmarkaðurinn lagt undir sig heimspoppið.  Þaðan kom blúsinn,  rythma-blúsinn,  rokkið, rokkabillýið, twistið, soul-ið og svo framvegis.  Bandaríski markaðurinn var allsráðandi.

  Fram að tilkomu Bítlanna höfðu margar músíkbylgjur riðið yfir og fjarað út án þess að vera endurvaktar.  Bítlarnir sem rokkhljómsveit kom fram á sjónarsvið eftir að rokkið hafði að mestu horfið.

  Það var nánast súrrealískt á þeim tímapunkti að skólahljómsveit frá hafnarborginni litlu Liverpool á Englandi kæmi eins og stormsveipur inn á markaðinn með rokk og legði undir sig heimsbyggðina.  Valtaði ekki aðeins yfir London-gengið heldur allan breska músíkmarkaðinn og nánast einokaði bandaríska markaðinn.  1964 áttu Bítlarnir í júní 6 af 6 efstu lögum á bandaríska vinsældalistanum.  Í árslok 1964 áttu Bítlarnir 60% af öllum seldum plötum Í Bandaríkjunum.   

[Jens Guð, 24.7.2012 kl. 23:18]

  Sólrún,  Ringó er ótrúlega sprækur.  Kominn á sjötugsaldur og er eins og unglingur.

[Jens Guð, 24.7.2012 kl. 23:20]

  Því má bæta við að hann var meira og minna veikur sem barn og stríddi við veikindi fram eftir aldri.