Einkennilegt þref í Þorlákshöfn

  Ég átti leið um Þorlákshöfn.  Þar rakst ég á lítinn sætan matsölustað.  Hann heitir Viking Pizza.  Af innréttingum má ráða að staðurinn sé einnig rekinn sem bar.  Afgreiðsluborðið er barborð.  Fyrir framan það eru háir barstólar.  Fyrir innan er úrval af vínflöskum. 

  Ég bað um matseðil.  Það var auðsótt mál.  Fátt freistaði þar.  Þrautalending var að panta rétt sem samanstóð af tveimur úrbeinuðum kjúklingaleggjum með frönskum kartöflum og fersku salati.  Kjúklingaleggirnir voru ágætir þegar á reyndi.

  Á matseðlinum stóð að verðið væri 1590 kr.  Ég setti á afgreiðsluborðið 1000 kall, 500 kall og 100 kall.  Í kjölfarið hófst hið skemmtilegasta spjall.

  Afgreiðsludaman (ákveðin):  "Það vantar 90 kall."

  Ég (bendi á 100 kallinn):  "Hann er hér."

  Hún:  "Þetta er bara einn 100 kall."

  Ég:  "Einmitt.  Ég á að fá 10 krónur til baka."

  Hún:  "Það vantar annan 100 kall."

  Ég:  "Rétturinn kostar 1590.  Það er einn hundrað kall plús seðlarnir og tíkall til baka."

  Hún:  "Rétturinn kostar 1690."

  Ég (bendi á verðið á matseðlinum):  "Það stendur á matseðlinum að hann kosti 1590."

  Hún:  "Hann kostar 1690."

  Ég:  "En af hverju stendur á matseðlinum að hann kosti 1590?"

  Hún:  "Af því að hann kostaði 1590.  Það er búið að hækka hann í 1690."

  Ég:  "Hvers vegna stendur þá ekki á matseðlinum að hann kosti 1690?"

  Hún:  "Af því að það á eftir að breyta því." 

    

Athugasemdir

[Sigurður I B Guðmundsson, 7.8.2012 kl. 21:56]

Allt tekur sinn tíma, fólk frá stór-R.vikur svæðinu þarf að sýna þolinmæði og skilning þegar það fer út úr sínu umhverfi!!!!

[H.T. Bjarnason (IP-tala skráð) 7.8.2012 kl. 22:26]

Hvað í ósköpum ertu að gera í Þorlákshöfn?

[Gulla Sigurðardóttir (IP-tala skráð) 7.8.2012 kl. 22:37]

Maður borgar það sem stendur á verðmiðanum hvort sem maður er úr R.vík eða innfæddur! Það er ábyrgð seljanda að vara sé rétt verðmerkt. Svo finnst mér fullkomlega rökrétt að vera staddur í þorlákshöfn ;)

[Jens Guð, 7.8.2012 kl. 23:44]

  Sigurður I.B.,  svona er góð skemmtun.  Vitaskuld skiptir 100 kall engu máli til eða frá í svona tilfelli.  Bara gaman að kynnast svolítíð öðruvísi.  Þannig lagað.  Og gaman hvað afgreiðsludaman stóð fast á sínu og var undrandi á skilningsleysi borgarbarnsins. 

[Ómar Ingi, 7.8.2012 kl. 23:45]

http://ommi.blog.is/blog/ommi/entry/1252217/

Datt þig í hug , ekki þó útaf þessari grein ; )

[Jens Guð, 7.8.2012 kl. 23:47]

  H.T. Bjarnason,  ég var plötusnúður á Stokkseyri og ákvað að taka Þorlákshafnarrúnt á leið í bæinn.  Var að vonast til að finna "öðruvísi" matsölustað en í Reykjavík.  Hafði góða reynslu af Fjöruborðinu á Stokkseyri og Rauða húsinu á Eyrarbakka.

[Jens Guð, 7.8.2012 kl. 23:49]

  Gulla,  vissulega er það rétt hjá þér að lægsta verð á að gilda þar sem það er skráð.  Hvort sem er hillumerking eða á matseðli.  En í Þorlákshöfn gerast kaupin öðruvísi á Eyrinni. 

[Jens Guð, 7.8.2012 kl. 23:50]

  Ómar Ingi,  bestu þakkir fyrir hlekkinn.  Ég elska Tom Waits.

[Auðjón (IP-tala skráð) 8.8.2012 kl. 18:01]

"En í Þorlákshöfn gerast kaupin öðruvísi á Eyrinni."

Stokkseyri?

[Jens Guð, 8.8.2012 kl. 21:36]

  Auðjón,  og á Eyrarbakka.