Sumarbústaðaæði - mikilvægt að hafa í huga við val á sumarbústaði

 

  Það er skollið á sumarbústaðaæði.  Það er togast á um hvern einasta sumarbústað á landinu.  Í fljótu bragði má virðast einkennilegt að ásókn í sumarbústaði sé svona mikil á þessum árstíma.  Eins og nafnið bendir til hangir fólk helst í sumarbústað yfir sumartímann.  Nú er vetur að ganga í garð.

  Kosturinn við að kaupa sumarbústað að hausti er margþættur.  Til að mynda losnar kaupandinn alveg við viðhald fyrsta hálfa árið.  Það er aðeins á sumrin sem fólk dútlar allar helgar við að dytta að sumarbústaðnum:  Bæsa,  lakka,  mála,  smíða...

  Í öðru lagi losnar kaupandinn við stöðugan gestagang fyrsta hálfa árið.  Nóg er að hafa ekki stundlegan frið fyrir honum yfir sumartímann.

  Að öðru leyti er flest ákjósanlegt við að eiga sumarbústað.  Það er yndislegt að geta slitið sig frá erli dagsins í bænum, kúplað sig frá öllu og slappa af í sumarbústaðabyggð úti á landi.  Oft vill svo skemmtilega til að nágrannarnir eiga bústað við hliðina.  Þá er málið að reyna að gera sinn sumarbústað flottari.

  Áður fyrr var ekki símasamband í sumarbústöðum.  Ekkert sjónvarp og engin tölva.  Eiginlega ekki neitt utan borðs, stóla og rúma.  Þá greip fólk í spil eða tafl og náði að kynnast hvert öðru.  Núna sitja allir hver með sína tölvu eða snjallsíma og hanga inni á fésbók.

  Það er vandasamt að velja sér sumarbústað.  Mikilvægt er að hann skarti sem mestu timbri.  Það er alvöru sumarbústaðastemmning í því.  Einnig er nauðsynlegt að hann sé með gluggum.

  Gott er að hafa yfirbyggðan sólpall.  Það rignir oft í sumarbústaðabyggðum. 

  Fátt er betra en sitja í heitum potti eða í sundlaug við sumarbústað.  Það er jafn ómissandi og kældur bjór.

  Sumarbústaður á stultum dregur úr líkum á að hagamýs og villikanínur slæðist inn í bústaðinn.

  Ef lítið er af trjám á svæðinu er lag að stinga upp nokkrar hríslur og raða þeim við og á bústaðinn.  Það er mikil sumarbústaðastemmning í því.

  Upplagt er að nota sumarbústaðinn til að skerpa á áhugamálinu.  Til dæmis má undirstrika bíladellu með því að láta bústaðinn bera svip af bíl.

  Svipaða aðferð geta sjómenn notað:  Látið bústaðinn bera einkenni báts.

Athugasemdir

[Gunnar Heiðarsson, 8.8.2012 kl. 22:25]

Götuljós en engin gata?

[Ásdís Sigurðardóttir, 9.8.2012 kl. 11:21]

Hér í kringum Selfoss er fólk í bústöðum allan ársins hring og umferðin um helgar í samræmi við það, bústaðir eru ekkert sumarfyrirbæri lengur.

[Björn Emilsson, 9.8.2012 kl. 11:51]

Skemmtilegt hjá þér Jens. Í gamla daga voru garðskúrarnir við Hringbraut og í Kringlumýri sumarbústaðir, má segja. Þetta voru kartöflugarðar. En spurningin er hvaðan er Grænlandsmyndin . Langt síðan ég hef séð svona ömurlega mynd.

[Jens Guð, 9.8.2012 kl. 15:52]

  Gunnar,  sumir eru svo háðir stemmningu götuljóss að þeir geta ekki án götuljóssins verið.

[Jens Guð, 9.8.2012 kl. 15:54]

  Ásdís,  ég hef einmitt heyrt einhverja kvarta undan þessu.  Það er að segja að fólk búi í sumarbústað allt árið,  njóti ýmissrar þjónustu útsvarsgreiðenda á svæðinu en borgi ekkert til sveitarinnar.

[Jens Guð, 9.8.2012 kl. 15:55]

  Björn,  það er rosa stemmning í grænlensku sumarbústaðabyggðunum.

[Ásdís Sigurðardóttir, 9.8.2012 kl. 21:24]

Ég er nú svosem ekkert að kvarta undan sumarbústaðafólki, hef bara ekki þennan áhuga sjálf á að búa á tveim stöðum, mér finnst best að eiga eitt heimili.

[Jens Guð, 9.8.2012 kl. 21:45]

  Ásdís,  mig skortir þennan áhuga líka.  Ég eiginlega skil ekki þann ljóma sem er yfir sumarbústaðaeign í dag.  Þetta var öðru vísi í gamla daga þegar viðvera í sumarbústað var algjör einangrun frá ysi og þys bæjarlífsins.  Það var góð afslöppun að leigja sér bústað yfir vikutíma.  Leigja sér.  Ekki kaupa og eiga bústað.

  Sumarbústaðaeigendur nútímans eru hálfgerðir þrælar bústaðarins.  Ég þekki fólk sem er í þeirri aðstöðu að það andvarpar stöðugt undan bústaðnum.  Þessu stöðuga viðhaldi og stöðuga áreiti frá gestum.  Þeim þykir ekki leiðinlegt að fá gest út af fyrir sig.  En sífelldur straumur af systkinum með sínar fjölskyldur,  börnum sínum með þeirra fjölskyldur,  vini og annað vandafólk:  Það þýðir álag sem er andstæða þess að vera í sumarbústað til að hvíla sig.

  Þessir sumarbústaðaeigendur koma iðulega vansvefta og dauðþreyttir úr sumarbústaðadvöl.  Eftir tilkomu farsíma og tölvu er ekki hægt að draga sig til hlés lengur.  

[Ásdís Sigurðardóttir, 11.8.2012 kl. 12:43]

Einmitt Jens, gæti ekki verið meira sammála, þetta er akkúrat það sem mér finnst um bústaði og bústaðalíf.