Tónlistarhátíðin Gæran að hefjast!

 

  Á fimmtudaginn (21. ágúst) hefst tónlistarhátíðin Gæran á Sauðárkróki.  Síðan tekur við stanslaust fjör fram á sunnudagsmorgunn.  Hver stórstjarnan tekur við af annarri,  allt verður á suðupunkti og Krókurinn mun iða af lífi og fjöri.  Meira að segja færeyska álfadrottingin,  Eivör,  treður upp og verður með splunkunýjan og flottan disk, Room, í farteskinu.  Þessi magnaði diskur kemur ekki út á heimsmarkað fyrr en í næsta mánuði.  Íslendingar fá forskot á sæluna af því að við erum í klíkunni.

  Gildran og Dimma afgreiða rokkið meðal annarra.  Brother Grass afgreiðir blúgrassið (sjá:  http://www.jensgud.blog.is/blog/jensgud/entry/1249208/ ).  Contagen Funural sjá um blúsinn.  Geirmundur Valtýs sér um skagfirsku sveifluna.  Skytturnar rappa.  Dúkkulísurnar syngja um svart-hvíta hetju og sápuóperuna Dallas (sem er víst komin á dagskrá hjá Stöð 2).  Þá er fátt eitt upp talið.

  Miðinn fyrir alla dagana kostar aðeins 5000 kall.  Það er eins og inn á staka hljómleika í Hörpu og víðar.  Miðasala er á midi.is og Kaffi Króki.

  Dagskrá Gærunnar hefst klukkan 20.00 á fimmtudaginn á Mælifelli við Aðalgötu.  Þar koma fram eftirtaldir sólóskemmtikraftar:   

* Dana Ýr
* Sóla og Sunna
* Sveinn Rúnar
* Þorgerður Jóhanna
* Fúsi Ben og Vordísin
* Myrra Rós
* Gillon
* Joe Dúbíus
* InkCity

Á föstudeginum spilar þessi fríði flokkur:

* Rock to the moon
* Brother Grass
* Sverrir Bergmann og Munaðarleysingjarnir
* Eldar
* Gildran
* Hide your kids
* Eivör Pálsdóttir
* Sing for me Sandra
* Dimma
* Hljómsveit Geirmundar Valtýssonar

Ball með Gildrunni á Mælifell strax eftir að hljómleikadagskrá lýkur.

Á laugardeginum sjá eftirtaldar hljómsveitir um herlegheitin:

* Art Factory Party
* Nóra
* Bee Bee and the Bluebirds
* The Wicked Stragners
* Dúkkulísurnar
* Lockerbie
* Death by toaster
* Skúli Mennski
* Skytturnar
* Contalgen Funeral

Ball á Mælifell strax eftir að hljómleikadagskrá lýkur.

Það er gaman á Króknum.  Skagfirðingar kunna að skemmta sér og öðrum og sletta úr klaufunum flestum betur.

 

Athugasemdir

[Sigurður I B Guðmundsson, 22.8.2012 kl. 22:35]

Það vantar bara: Sætaferðir frá BSÍ!!!!

[Jens Guð, 23.8.2012 kl. 00:41]

   Það eru stöðugar rútuferðir til og frá Sauðárkróki. Annars er lang skemmtilegast að fara á einkabíl í Skagafjörð. Það er svo margt skemmtilegt að sjá. Til að mynda útisundlaugina frábæru á Hofsósi.  Að ógleymdum veðursælasta stað Íslands á síðustu öld,  Hólum í Hjaltadal.  Æskuheimili mitt var í útjaðri Hóla.  Ég vissi ekki hvað rok var fyrr en ég flutti suður.  Inndalurinn er umkringdur tignarlegum fjallasal sem tryggir stöðugt blankalogn. 

  Í framhjáhlaupi vil ég undrast að Sauðkrækingar séu stundum kallaðir Sauðkræklingar.  Mér dettur í hug að það hafi upphaflega verið grín en er útbreitt í dag.