Kaldar kveðjur til brottrekinna

 

  Neinn er merkilegt fyrirtæki.  Stundum tapar það peningum án þess að kippa sér upp við það.  Það á vini á góðum stöðum sem afskrifa skuldir þegar svo ber undir.  Þannig að þetta er ekkert mál.  Einu sinni hef ég þó heyrt forstjóra Neins veina sáran.  Það var þegar hann tjáði sig um vörurýrnun vegna þjófnaðar á bensíni.  Bensíni hafði verið stolið frá Neinum fyrir næstum 30 milljónir króna.  Forstjórinn benti á að það væri virkilega erfitt og nánast óbærilegt að reka fyrirtæki sem býr við svona mikla vörurýrnun.  Undir það skal tekið.

  Nokkru síðar ræddi forstjórinn um tilraun Neins við að hasla sér völl á sviði bókaútgáfu.  Gefnar voru út tvær bækur,  hvor um sig í risaupplagi.  Þær voru auglýstar til samræmis við risaupplagið.  Leikar fóru þannig að uppistaðan af upplaginu endaði á haugunum.  Forstjórinn sagði tapið á bókaútgáfuævintýrinu skipta fyrirtækið engu máli.  Tapið væri ekki nema næstum 30 milljónir króna og fyrirtæki af stærðargráðu Neins finni hvergi fyrir svoleiðis smáaurum.

  Svo skemmtilega vildi til að þetta var sama upphæð og vörurýrnun vegna bensínþjófnaðar.

  Núna var Neinn að segja upp 19 starfsmönnum.  Forstjórinn segir það vera til þess að bæta þjónustu fyrirtækisins.  Birgjar jafnt sem starfsfólk sé yfir sig hamingjusamt með breytinguna.  

  Þetta verður ekki skilið öðru vísi en svo að þessir 19 brottreknu hafi dregið þjónustu Neins niður.  Þeir hafi háð rekstri Neins. 

Athugasemdir

[Ásthildur Cesil Þórðardóttir, 21.11.2012 kl. 22:36]

Neinn gott nafn

[Stefán (IP-tala skráð) 22.11.2012 kl. 08:23]

Aðkoma Bjarna Benediktssonar að Neinum er eitt af því sem gerir almenna kjósendur Sjálfstæðisflokksins andsnúna honum svo um munar.   Já, þeir eru margir vafningarnir sem Bjarni Benediktsson þarf að snúa sig út úr á þessum kosningavetri.   Nokkuð ljóst má telja að  ,, margvafinn og afskrifaður "  Kristján Arason hefur sloppið við uppsögn hjá Neinum, enda er hann þannig giftur.  

[Nafnlaus (IP-tala skráð) 22.11.2012 kl. 11:16]

Það vill svo skemmtilega til að ég starfa hjá fyrirtæki (reyndar ekki Neinn) sem gerði slíkt hið sama, sagði upp starfsfólki og bætti þjónustu.... þetta er reikningsdæmi sem gengur ekki upp. Alveg ótrúlegt að menn komist upp með að segja svona við fjölmiðla.

[Ásthildur Cesil Þórðardóttir, 22.11.2012 kl. 13:23]

Hvernig var nú aftur sagan um róðrarkeppnina sem íslendingar tóku þátt í.  Þeir voru sex um borð sem réru, einn sem hóaði liðið áfram, þeir töpuðu fyrir keppinautunum, Þá tóku þeir sig til og fækkuðu róðarmönnunum um helming, en ennþá töpuðu þeir, þá létu þeir alla róðrarmennina fara svo eftir var bara hóarinn,  Einhvernveginn svona var sagan, man hana einhver?  Þetta er svona árinni kennir illur ræðari dæmis.