Galdurinn við að leggja á borð. Mikilvægt að vita og kunna!

  Þessa dagana hellast jólahlaðborð yfir heimili og fyrirtæki.  Svo taka skötuveislurnar við,  jólaboð,  gamlársveislur,  nýársveislur,  þrettándafagnaður,  þorrahlaðborð og þannig mætti áfram telja.  Það gera sér ekki allir grein fyrir því hversu miklu máli skiptir að vel og snyrtilega sé lagt á borð.  Þetta er sálrænt atriði.  Minnstu hnökrar á því hvernig borðbúnaður stendur og liggur á borðum eyðileggja algjörlega upplifun gesta af borðhaldinu.  Á sama hátt laðar snyrtilega uppraðaður borðbúnaður fram sterka tilfinningu fyrir veglegri veislu.

  Augað ræður miklu um upplifun af mat.  Það er svo AUG-ljóst að furðu sætir hvað margir klúðra jafn einföldum hlut. 

  Til að leggja snyrtilega á borð þarf aðeins tommustokk og snærispotta.  Með tommustokknum er passað upp á að nákvæmlega sama bil sé á milli allra diska, glasa og hnífapara.  Það má ekki skeika hálfum cm.  Með spottanum er þess gætt að borðbúnaðurinn sé í beinni röð.  Þaðan er komið orðið þráðbeint. 

 

Athugasemdir

[Sigurður I B Guðmundsson, 24.11.2012 kl. 16:05]

Sviðakjamminn bragðast bara ekki rétt nema við ströngustu skilyrði!!

[josef asmundsson (IP-tala skráð) 24.11.2012 kl. 22:41]

Þetta hlýtur að vera í Norður Koreu Jens.Ég er fyrir löngu farinn að nota laser kíkirinn þegar ég legg á borð.

[Axel Jóhann Hallgrímsson, 25.11.2012 kl. 12:15]

Nákvæmlega svona er þetta víst gert þegar Beta frænka býður til snobbveislu á kostnað breskra skattgreiðenda.

[Jens Guð, 25.11.2012 kl. 21:46]

  Sigurður I.B.,  ég kannast við það.

[Jens Guð, 25.11.2012 kl. 21:47]

  Josef,  það er alveg líklegt.  þar á bæ kann fólkið trixið.  Þó að ýmislegt annað bjáti á. 

[Jens Guð, 25.11.2012 kl. 21:55]

  Axel Jóhann,  ég ætla það.  Breskir skattgreiðendur eru reyndar sérkennilega snobbaðir fyrir Betu og hennar liði.  Mér er minnistæð könnun sem gerð var þar á bæ.  Að vísu fyrir 20 árum eða svo.  Þar voru Bretar spurðir um það hver væri þeirra æðsta ósk,  með þeim fyrirvara að óskin væri raunhæf.  Gæti mögulega ræst.  Í efsta sæti var að komast í teboð hjá Betu.

  Í fyrra var ég staddur í Skotlandi.  Þar fór fram hávær umræða um hugsanlegt sjálfstæði Skotlands.  Aðskilnað frá Breska heimsveldinu.  Áberandi var í umræðunni að þrátt fyrir vilja til sjálfstæðis Skotlands vildu menn endilega hafa Betu áfram sem þjóðhöfðingja.  Sú afstaða var ráðandi í umræðunni.  Furðulegt.