Rasistar í löggunni

  Ég á marga vini.  Það er gaman.  Einn vina minna flutti til Íslands sem flóttamaður frá Víetnam fyrir mörgum árum.  Hann talar ágæta íslensku.  Eins og frægt og nýlegt myndband úr Smáralindinni sýnir þá mæta Íslendingar af asísku bergi brotnir stundum dónaskap af hálfu Íslendinga með evrópskan svip.  Það eru rasistar á Íslandi. 

  Vinur minn þessi sem nefndur er til sögunnar var eitt sinn stoppaður af lögreglunni þegar hann ók í rólegheitum eftir Dalvegi í Kópavogi.  Lögreglumaðurinn ávarpaði hann með spurningunni:  "Talar þú íslensku?" 

  "Já, dálítið," svaraði vinurinn í hógværð.

  "Þú verður að læra íslensku almennilega ef þú ætlar að vera á Íslandi, drengur,"  skipaði lögreglumaðurinn.  Og það valdsmannlega.  Því næst spurði hann háðskur:  "Kanntu að lesa?"

  Jú,  vinurinn kannaðist við það undanbragðalaust.  Þá spurði lögreglumaðurinn:  "Af hverju keyrir þú þá á yfir 50 km hraða þegar á skiltinu þarna stendur 50?"

  Vinurinn sagðist vita hver væri hámarkshraði þarna og að hann hafi talið sig vera á löglegum hraða.  Hann hafi þó ekki fylgst með hraðamælinum.  Honum hafi þótt hraðinn vera um eða undir hámarkshraða og ekkert verið að pæla í því.  Hann fylgdi aðeins hraða annarra bíla þarna.

  Hann gerði engan ágreining við hraðamælingu lögreglunnar.  Það var skrifuð skýrsla og allt gekk sinn vanagang.  Nema að þegar kom að því að ganga frá sekt þá kom í ljós að í skýrsluna var skráð að hann hafi ekið örlítið of hratt á Dalbraut í Kópavogi.  Það er engin Dalbraut í Kópavogi.  Það er til Dalbraut í Reykjavík,  á Dalvík, á Akranesi og víðar.  Leikar fóru þannig að skýrslan var úrskurðuð ómarktæk og sektin felld niður.

  Lögreglumaðurinn valdmannslegi og háðski hafði lesið vitlaust á götumerkingu á Dalvegi. 

  Spurning er hvort að lögreglumaðurinn hefði ávarpað mann með vestrænt útlit á sama hátt?  Skipað honum að læra almennilega íslensku,  spurt hvort að hann væri læs og kallað mann á fertugsaldri dreng?  Ég held ekki.  Ég held ekki heldur að íslenskir lögreglumenn séu almennt rasistar  Margir lögregluþjónar eru gott fólk.   

„Hættu að vera dónalegur“

Athugasemdir

[Ingibjörg Axelma Axelsdóttir, 9.12.2012 kl. 21:18]

Það vinna alveg svartir sauðir hjá lögreglunni sem og annarsstaðar.

[Jens Guð, 9.12.2012 kl. 22:06]

  Ingibjörg,  það er því miður þannig.

[Óskar Helgi Helgason (IP-tala skráð) 9.12.2012 kl. 22:09]

Heill og sæll Jens Guð (legi) jafnan; sem og aðrir gestir, þínir !

Í hnotskurn Jens; og gildir þá víst litlu, hvaða starfsstéttum þessir 1/4 - 1/2 heilalausu samlandar okkar, eru tengdir.

Sjáum til; vestur í Ísafjarðardjúpi, í dal einum víðfeðmum - verzlar Svíi nokkur (vafalítið; Hvítur) sér jarðarskika, umyrðalaust, af hálfu Íslendinga - sem og Svisslendingurinn forðum (Hvítur;? ekki spurning) sem keypti lendur austur í Mýrdalshrepp, hér um árið. 

Skoðum framkomu; þorra hvítnefjaðra- og mjósleginna innfæddra Íslendinga í þessu samhengi, gagnvart Huang Nobu, varðandi Grímsstaðina, nyrðra, til dæmis.

Hann er jú Gulur; eins og Víetnaminn ágæti í þinni frásögu, Jens síðuhafi.

Enn þann dag í dag; þakka ég fyrir, að vera Mongóli, að 1/16 Jens minn - sé mið tekið af þeim vanza, að kallast 100% Íslendingur í dag, ágæti drengur.

Og; nú eru harðkjarna og harðsnúnir Hamítarnir (Egyptar), að hefja enn eina mótmæla öldu sína, þar syðra.

En; Íslendingar og mótmæli ?????????? Ekki nógu fínt það; Jens minn.

Mótmæli; misbjóða nefnilega snobbinu - sem montinu, inngróna, í þessum lítilfjörlegu samlöndum okkar, flestra !

Með beztu kveðjum; sem oftar og fyrri /   

[Jens Guð, 9.12.2012 kl. 22:13]

  Óskar minn,  bestu þakkir fyrir þitt skemmtilega innlegg. 

[Landfari, 9.12.2012 kl. 23:36]

Það er misjafn sauður í mörgu fé Jens. Þannig er það nú bara og hefur alltaf verið.

En hvað kemur þessi saga fréttinni við? Það er engin tenging þarna á milli. Ekki voru það Víetnamar eða Íslendingar af Asískum uppruna sem virtu ekki fyrirmæli lögreglu.

Þetta voru "hreinræktaðir" Íslendingar eins og þeir gerast vitlausastir.

[Jens Guð, 10.12.2012 kl. 00:11]

  Landfari,  fréttin og bloggfærslan snúa að lögreglunni og störfum hennar.  Mér flaug þessi atburður í hug þegar ég las fréttina.  Þetta gerðist ekki í gær.  Það er lengra síðan.  Kannski og eftir á að hyggja er bloggfærsla mín langsótt í samhengi við fréttina.  Ég er svo hvatvís.  Mér finnst hinsvegar sem frásögn mín eigi erindi í umræðuna.  En, jú, ekki beinlínis sem innlegg í fréttina heldur frekar sem umræðuefni almennt um samskipti lögreglu og almennings. 

[só (IP-tala skráð) 10.12.2012 kl. 01:27]

það er nú yfirleitt bara heimskt fólk sem stundar rasisma.

svona eins og kannski sést á þessum manni þarna um daginn í kringlunni. (virkaði treggáfaður, greyið.)

og svo þessum lögreglumanni þarna.

dalbraut í kópavogi. :D

[Oddur (IP-tala skráð) 10.12.2012 kl. 03:38]

Gunnar Andrésson (landfari): Hvaða fyrirmæli lögreglu, sem ekki voru virt, ertu eiginlega að tala um?

[Hálf-gulur (IP-tala skráð) 10.12.2012 kl. 04:38]

Það ber vott um rasisma að hrópa sífellt "rasisti, rasisti" eða yfirhöfuð taka sérstaklega eftir litarhætti fólks, sem heimsborgarar gera undantekningarlaust ekki. Þegar ég horfði á þetta myndskeið sá ég venjuleg ungmenni, sem útlitslega séð líktust sumum meðlimum minnar eigin fjölskyldu og fjölda vina sem ég á út um allan heim, og voru í háttum og hegðun ekkert frábrugðin þorra ungmenna hér á landi. Svo sá ég mann, sem augljóslega var undir áhrifum fíkniefna, og líka geðveikur, sem sagt undirokaður undirmálsmaður sem kerfið hafði brugðist og ekki fundið viðeigandi úrræði fyrir. Börnin sjálf höfðu orð á því maðurinn hefði verið undir áhrifum. En laumu-rasistarnir sjá "gullt fólk" og svo það sem enginn vill vera "rasista". Þarna voru venjuleg íslensk börn og fárveikur maður. Ætlið þið ekki að skilja þetta? Eru þetta sömu týpur og halda að Huang Nubo sé maður sem á bágt afþví hann er "gulur"?

Kveðja, "Hálf-gulur"

[Hálf-gulur (IP-tala skráð) 10.12.2012 kl. 04:42]

Af tvennu illu finnst mér svo skárra að kalla ljót orð á eftir heilbrigðum, eðlilegum börnum, sem geta varið sig og byggt upp sjálfsmynd sína, en að sparka í mann sem liggur í forarpytti, fárveikur, uppdópaður, án vonar og er búinn að verða sér til skammar um aldur og æfi. En þarna fékk íslenska þjóðin útrás fyrir eineltis-hneigðir sínar afþví hún hafði fundið sér "löglegt" fórnarlamb, meintan "rasista", sem má því fara hvernig sem er, þó "rasisminn" hans sé augljóslega til kominn af meiriháttar andlegum veikindum og eiturlyfjafíkn. Auðvitað notaði hún tækifærið, þó frá augum skynseminnar sé það jafn gáfulegt og að þjóðin myndi hneyklast vikum saman á róna sem hefði hrópað fúkyrði að ráðherra.

[Hálf-gulur (IP-tala skráð) 10.12.2012 kl. 10:02]

Huang-Nubo vann fyrir áróðursmálaráðuneytið í Tíbet. Tíbetar eru orðnir aðeins 0,04% af íbúum eigin lands, þróunn sem hefur átt sér stað á örskömmum tíma vegna skipulagðrar menningarlegrar útrýmingarherferðar stjórnvaldanna sem Nubo vann fyrir, sem á sér fjöldamargar ofbelidsfullar birtingarmyndir og hefur kostað ótal þeirra fáu Tíbesku mannlífa sem enn er að finna á þessu fyrrum heimalandi sem hrifsað var frá þeim. En rasistinn Óskar Helgi, maður sem þvaðrar sífellt um liti og kynþætti eins og allra laumurasista er siður, og þannig koma þeir oftast upp um sig, vorkennir honum auðvitað gífurlega að verða meint "fórnarlamb" fyrrum atvinnu sinnar þarna í Tíbet, það er að segja rasisma, sem hann engan veginn er. Hann gæti alveg eins og grátið fögrum tárum yfir að einhver gamall maður úr áróðursmálaráðuneyti nazista yrði síðan fyrir meintum "rasisma" í Afríku. Ég segi bara gott á hann, ef svo væri, og hefði hann þá bara gott á að bragða eigin meðal. Rasistar sjá bara liti og skilja ekki að Tíbetar og Kínverjar eru fjær því að vera sama fólk en Íslendingar og Súdanir. Þetta er menning sem var aðskilin í hundruðir alda, og á lítið sameiginlegt í grunninn, og fyrir ykkur rasistunum sem sjáið ekkert nema "liti" þá ættuð þið að horfa aðeins betur og sjá að Tíbetar og Kínverjar eru mun ólíkari í útliti en Tyrkir og Íslendingar. Sem er kannski nógu "yfirborðslegt" til að þið skiljið þá að Huang ER rasisti, en ekki íslenska ríkisstjórnin sem slík (þó einstaka ráðherra sé það, en það hefur aldrei bitnað á Huang).

[Landfari, 10.12.2012 kl. 10:18]

Oddur, ertu ekki búinn að lesa fréttina?

[Óskar Helgi Helgason (IP-tala skráð) 10.12.2012 kl. 10:21]

Komið þið sæl; á ný !

Hálf-gulur; vesalingur !

Reyndu; að koma fram undir fullu nafni, og hvur veit, nema ég væri þá vís með, að svara heimskulegum aðdróttunum, þínum.

Nema; þú sért það lítilmenni, að kjósa að punda á fólk, í felum.

Ekki stórmannlegt það; dreng garmur.

Með; hinum sömu kveðjum - sem fyrri, samt sem áður /  

[Landfari, 10.12.2012 kl. 10:39]

Jens, eins og þú setur þetta upp hljómar það eins og réttlæting á framkomu og virðingarleysi landans í garð lögreglu á slysavettvangi.

Það á bara ekki að líða það fólk sem vinnur við björgunarstörf fái ekki vinnufrið á vettvangi fyrir forvitnum einstaklingum eða öðrum þeim sem leið eiga hjá. Það er fráleitt að ætla hverjum og einum að meta það hvort hans aðkoma sé truflandi eða ekki. Það hlýtur að vera hlutverk lögreglu að meta aðstæður og girða af það svæði sem hún telur þurfa. Við þessir forvitnu og aðrir vegfarendur verðum að sætta okkur við það. Ef við teljum okkur eiga lögmætt erindi innan þessa svæðis ber okkur skilyrðislaust að hafa samráð við lögreglu um hvort og hvernig við getum sinnt því erindi.

Eitthvað segir mér samt að við séum í meginatriðum sammála um þetta Jens. Þín meining hafi ekki verið sú sem mér fannst svo borðleggjandi að lesa út úr uppsetningunni.

[Axel Jóhann Hallgrímsson, 10.12.2012 kl. 13:41]

Það eru sjálfsagt til svartir sauðir í lögreglunni eins og öðrum stéttum. En mín reynsla er að í lögreglunni séu upp til hópa góðir og vandaðir menn. Góðu gæjarnir vekja af einhverjum ástæðum minna umtal en þeir örfáu sem skera sig úr.

Lögreglan hefur í gegnum tíðina stundum þurft að hafa afskipti af mér, eins og það er kallað, en það hefur í öllum tilfellum verið sjálfum mér fyrir bestu og án vafa forðað mér frá frekari vandræðum. Ég kann þeim bestu þakkir fyrir það, þó ég hafi kannski ekki verið jafn hress með það akkúrat þegar það gerðist.

Mér þykir miður þegar menn fjandskapast við lögregluna af litlu eða engu tilefni. Lögreglan er nauðsynleg, vildi einhver vera án hennar, svona í alvöru talað?

Jafnvel þeim sem hvað harðast óskapast í garð lögreglunnar þykir gott að eiga hana í bakhöndinni og leita til hennar þegar þá verkjar í rassgatið og vita ekki hvað stendur fast í því.

[Ómar Ingi, 10.12.2012 kl. 22:50]

http://ommi.blog.is/blog/ommi/entry/1272328/

[Jens Guð, 11.12.2012 kl. 00:49]

  Só,  ég kvitta undir það.

[Jens Guð, 11.12.2012 kl. 00:50]

  Oddur,  maður spyr sig.

[Jens Guð, 11.12.2012 kl. 00:52]

  Hálf-gulur (#9),  það er ekki rétt að enginn vilji vera rasisti.  Sumir eru stoltir af því að vera rasistar.

[Jens Guð, 11.12.2012 kl. 00:57]

  Hálf-gulur (#10),  það er jákvætt að bloggheimur og fésbók fordæmi rasistann í Smáralind.  Það hvort að hann sé andlega veikur eða eiturlyfjafíkill breytir ekki dæminu.  Rasistar eru veikir,  hvort sem að þeir eru dópaðir eða edrú.  Það er ekki afsökun fyrir rasisma. 

[Jens Guð, 11.12.2012 kl. 00:59]

  Hálf-gulur (#11),  það eru ágætir punktar í þessu hjá þér. 

[Jens Guð, 11.12.2012 kl. 01:04]

  Landfari (Gunnar Andrésson),  þetta er eitthvað óljóst.

[Jens Guð, 11.12.2012 kl. 01:08]

  Óskar,  ég get tekið undir kröfuna um að þátttakendur í umræðunni komi fram undir nafni.  En það er ekki fallegt að uppnefna viðmælendur vesalinga. 

[Jens Guð, 11.12.2012 kl. 01:10]

  Landfari (#14),  ég er sammála punktunum í þínum málflutningi.  Takk fyrir þín "komment". 

[Jens Guð, 11.12.2012 kl. 01:16]

  Axel Jóhann,  ég kvitta algjörlega undir þin orð.  Á dögunum sá ég á Fésbók frásögn (eflaust skáldaða) Bandaríkjamanns sem sagðist hafa orðið vitni að innbroti og þjófnaði ú íbúð nágranna síns.  Sögumaður sagði að fyrstu viðbrögð hafi verið að ætla að hringja í lögguna.  Þá mundi hann eftir því að nágranninn var tepokamaður sem hafði opinberlega frábeðið sér afskipti opinberra starfsmanna. 

[Jens Guð, 11.12.2012 kl. 01:17]

  Ómar Ingi,  nú skellti ég hraustlega upp úr!  Bestu þakkir fyrir skemmtunina.

[Hálf-gulur (IP-tala skráð) 11.12.2012 kl. 02:13]

Það er nóg af nokkuð heilbrigðum, en óheiðarlegum rasistum í þessu samfélagi, sem væri manndómur í að fordæma og jafnvel refsa, en enginn segir múkk við. Í þeirra hópi eru ráðherrar, rithöfundar, skemmtikraftar og fleiri sem eru ekki í veikri stöðu í samfélaginu og liggja auðveldlega við höggi. Í ljósi þess að enginn segir neitt við þessa rasista, en allir eru boðnir og búnir að fordæma fárveikann geðveikan fíkil fyrir eitthvað sem hann segir í óráði, en ekki allsgáður og vitandi vits hvað hann er að gera eins og áðurnefndir menn, þá dæmi ég þá Íslendinga sem þykjast vera að berjast á móti rasisma hræsnara og heigla. Það er hvaða illmenni sem er tilbúið að ráðast að greindarskertum, snarbrjáluðum manni undir áhrifum fíkniefna og fordæma hann. Meira að segja nazistum hefði bara þótt það gaman, enda drápu þeir líka geðveika. Að þykjast vera að verja minnihlutann er ekki afsökun fyrir að níðast á minnimáttar.

[Hálf-gulur (IP-tala skráð) 11.12.2012 kl. 02:18]

Og það að allir rasistar séu veikir, er móðgun við veika menn. Geðveikir menn eru ekki verri eða siðferðilega brenglaðri en aðrir og flest illmenni vita fullkomlega hvað þau eru að gera, er algjörlega sjálfrátt og allrar fordæmingar verð. Og af slíkum er nóg í þessu samfélagi ef menn bara þyrðu í þá og dirfðust að gagnrýna þá. En það gildir ekki um þennan sem lá svo vel við höggi að allir sem söknuðu þess að leggja engan í einelti eins og þegar þeir voru börn, urðu að slá til.

[Jens Guð, 11.12.2012 kl. 21:20]

  Hálf-gulur (#27),  það er rangt að enginn segi neitt við rasista.    

[Jens Guð, 11.12.2012 kl. 21:25]

  Hálf-gulur (#28),  nú ertu kominn fram úr þér og farinn að oftúlka illilega.  Allir rasitar eru veikir.  Það er ekki heilbrigt að vera rasisti. 

  Prófaðu að setja önnur hugtök í texta þinn.  Til að mynda getum við sagt að rokkstjörnur séu dópistar.  Það þýðir ekki að allir dópistar séu rokkstjörnur.