Veitingahússumsögn

 

- Réttur:  Þorrabakki

- Veitingastaður: Ikea

- Verð:  1295 kr.

- Einkunn: *** (af 5)

  Bestu kaup í þorramat er að finna í sænsku húsgagnaversluninni Ikea í Garðabæ.  Um er að ræða staðlaðan skammt.  Hægt er að velja á milli disks með súrmeti og disks með nýmeti.  Á báðum diskunum er hangikjöt,  sviðasulta,  hákarl,  harðfiskur,  tvær rúgbrauðssneiðar,  tvenn smjörstykki,  maríneruð síld og rófustappa.  

  Á súrmetisdisknum eru að auki hrútspungar,  lundabaggi,  lifrarpylsa og blóðmör.

  Á nýmetisdisknum er að auki saltkjöt,  síld í sinnepssósu og ítalskt salat (Ora grænar baunir og gulrótarteningar í majonesi).  

  Eins og af upptalningu sést þá er súrmetisdiskurinn heldur veglegri.  Það er dálítið einkennilegt.  

  Ókosturinn við staðlaðan skammt er sá sami og við tilbúna þorrabakka sem seldir eru í matvöruverslunum:  Svigrúm er takmarkað til að velja uppáhaldsrétti og hafna því sem á síður upp á pallborð.  Þann vankant hafa þorrahlaðborð ekki.  Þess vegna eru þau svona vinsæl.  Ikea leysir þetta að hluta með því að bjóða upp á áðurnefnt val á milli diska með súrmat og nýmeti.

  Skammtarnir hjá Ikea eru ekki skornir niður við trog.   Þeir eru það veglegir að illmögulegt er að klára allt af súrmetisdisknum.  Nýmetisdiskinn má tæma með herkjum ef maður er  svangur. 

  Það eina sem ég sakna á þorradiskum Ikea er hvalur og magáll.  Já, og svo er enginn heitur réttur. 

  Hér er umsögn um þorrahlaðborð á Umferðarmiðstöðinni:  http://www.jensgud.blog.is/blog/jensgud/entry/1279446/

Athugasemdir

[Stefán (IP-tala skráð) 31.1.2013 kl. 09:27]

Nokkuð fyndið að sænsk verslunarkeðja skuli bjóða upp á alíslenskan þorramat, en samt hið besta framtak hjá IKEA.   Súrmetið er væntanlega ætlað þeim fáu fylgjendum Vinstri Grænna, sem Steingrímur J hefur ekki enn náð að hrekja á brott og eru súrir vegna Icesave-niðurstöðu og bara allra hluta.   Nýmetið er þá væntanlega ætlað öllum öðrum og þeim sem horfa meira fram á veginn, en ekki til gömlu moldarkofanna eins og Vinstri Grænir virðast svo oft gera.

[Jens Guð, 31.1.2013 kl. 23:48]

  Veitingastaður Ikea á Íslandi er að standa sig vel.  Bæði með þennan þorramat og líka er boðið upp á hangikjöt í desember,  saltkjöt og baunir á sprengidag og svo framvegis. 

  Ég veit ekki hvernig þetta er hjá Ikea í öðrum löndum.  Hitt veit ég að í Stokkhólmi gerir Ikea út strætisvagn sem keyrir fólk ókeypis til og frá Ikea.