Logið með myndum

20.2.2013 | 20:59

Í auglýsingum er auglýsendum gjarnt að sýna sparisvipinn. Kostir þess sem verið er að auglýsa eru dregnir fram. Jafnframt eru myndir látnar laða fram bestu hlið vörunnar. Það er alveg eðlilegt. Auglýsingum er ætlað að selja. Þetta er hluti af sölutækni. Hinsvegar má ekki ljúga í auglýsingum. Auglýsendur verða að geta staðið við allt það sem haldið er fram í auglýsingum.

Það er spurning hvort að þetta á við um myndskreytingar. Ég held að aldrei hafi reynt á það. Kannski vegna þess að fágætt er að auglýsendur ljúgi gróflega með myndum. Veitingastaðurinn KFC er þar undantekning á. Í fyrra varð hávær umræða um hróplegan mun á kjúklingaskammti í fötu annarsvegar eins og hann var sýndur á mynd og hinsvegar eins og hann var í raun.

Á Okursíðunni hans Dr. Gunna er annað dæmi í sama dúr. Í því tilfelli er fjallað um kjúklingaborgara sem er auglýstur í heilsíðuauglýsingum í dagblöðum um þessar mundir. Það er ástæða til að vekja athygli á þeim óheiðarlegum vinnubrögðum sem viðhöfð eru hjá KFC.

Meginflokkur: Viðskipti og fjármál | Aukaflokkar: Heilbrigðismál, Löggæsla, Matur og drykkur | Breytt s.d. kl. 21:39 | Facebook

Athugasemdir

Verður þá að fylgja viðvörun með Hagkaupsbæklingum?

"VARÚÐ! Þú munt ekki líta jafn vel út í fötunum og módelin."

Ingibjörg Axelma Axelsdóttir, 20.2.2013 kl. 21:23

Er ekki bannað að ljúga í auglýsingum?

Ég fór á KFC fyrir margt löngu, langaði til að prufa staðinn. Ég keypti mér djúpsteikta kjúklingabita. Það sem ég fékk voru nokkrir djúpsteiktir hveitikögglar með agnarlitlum kjúklinga tægjum vel falda í hveitibollunni. Þessi eina heimsókn dugði mér, ég hef aldrei aftur farið á þennan "matsölustað" og mun aldrei gera.

Axel Jóhann Hallgrímsson, 20.2.2013 kl. 22:08

Tek undir með Axel,þessu hef ég lent í fyrir nokkrum mánuðum síðan,og sagði bara bæ bæ við KFC.

Númi (IP-tala skráð) 20.2.2013 kl. 23:21

Dóttir mín fór og keypti svona kjúklingaborgara og þeir voru eins og seinni myndin, algjörlega. Kjötið sást varla og brauðið var krumpað og lítið. Þetta bragðaðist líka illa ofan á allt hitt. Við ætlum ekki að kaupa svona svindlborgara aftur.

Jóna Kolbrún Garðarsdóttir, 21.2.2013 kl. 02:27

Ég fékk mér svona ,, platborgara " á KFC um síðustu helgi, ekki merkilegur staður KFC, en þó skárri en Metro eða hvað sá kennitöluflakkarastaður heitir í dag.

Stefán (IP-tala skráð) 21.2.2013 kl. 08:22

Ingibjörg Axelma, áttu við að þannig viðvörun sé ekki í Hagkaupsbæklingum? Ég hef ekki flett svoleiðis bæklingi síðan ég var krakki. Hinsvegar rámar mig í að hafa séð svona viðvörun í bæklingi frá Wall Mart eða öðrum stórmarkaði í Bandaríkjunum.

Jens Guð, 21.2.2013 kl. 11:12

Axel Jóhann, jú, það er bannað að ljúga í auglýsingum. Ég held að það sé samt aðeins látið ná yfir texta; að aldrei hafi reynt á hvort það nái yfir myndir.

Jens Guð, 21.2.2013 kl. 11:14

Númi, ég er heppinn að hafa ekki átt erindi í KFC í 12 - 13 ár. Fram að þeim tíma var það til að kaupa kjúklingabita fyrir börn.

Jens Guð, 21.2.2013 kl. 11:17

Jóna Kolbrún, þetta virðist vera reynsla margra.

Jens Guð, 21.2.2013 kl. 11:18

Stefán, fyrir mörgum árum fór ég á Metró (eða hvort staðurinn hét McDonalds þá) ásamt ungum krakka. Hann missti borgarann sinn í gólfið. Kjötið rúllaði úr samlokunni. Ég keypti nýjan borgara og lét hinn eiga sig á gólfinu. Að máltíð lokinni fór krakkinn að leika sér í leiktækjum á staðnum. Þegar við yfirgáfum staðinn varð mér litið á kjötið á gólfinu. Það hafði dregist saman um þriðjung eða svo en olíukenndur vökvi sýndi hver upphafleg stærð var.

Jens Guð, 21.2.2013 kl. 11:23

Þetta er allt eitt stórt samsæri

Ásdís Sigurðardóttir, 21.2.2013 kl. 11:28

Jens, ef þú hefðir dokað við aðeins lengur á McDonalds / Metro, þá hefði borgarinn kanski farið að ganga um í olíunni

Stefán (IP-tala skráð) 21.2.2013 kl. 11:40

Besta leiðin er að kaupa gótt hráefni og borða heima.

Guðrún Þóra Hjaltadóttir, 21.2.2013 kl. 12:16

Ég og vinnufélagi minn ákváðum að taka þessu kostaboði í fyrradag og upplifunin var nákvæmlega eins og þú lýsir. Þessar myndir sem fylgja með hefðu alveg eins getað verið teknar af boraranum mínum. Ég verð að viðurkenna að mér fannst ég illa svikinn. Þetta minnti dálítið á obláturnar sem ég gæddi mér á þegar ég gerðist sá kjáni að fermast hér um árið.

Theódór Gunnarsson, 21.2.2013 kl. 13:47