Kvikmyndarumsögn

 

 - Titill:  Identity Thief

 - Leikstjóri:  Seth Gordon

 - Leikarar:  Jason Bateman,  Melissa McCarthy o.fl.

 - Kvikmyndahús:  Háskólabíó

 - Einkunn: *** (af 5)

   Upphaf myndarinnar lofar ekki góðu.  Hún hefst á barnalegum aulahúmor og fyrirsjáanlegum klisjum.  En svo braggast myndin þegar á líður,  Úr verður þokkaleg skemmtun.  Þar á meðal æsilegur bílaleikur og af og til dálítil spenna. 

  Myndin fjallar um starfsmann hjá fjárfestingafyrirtæki í Colorado.  Hann verður fyrir því að greiðslukort hans er klónað.  Gerandinn er siðblind kona í Flórída.  Hún tæmir inneign mannsins.  Við það fer tilvera hans á haus.  Hann leitar konuna uppi og reynir að semja við hana um að leysa málið í góðu.  Hún þráast við til að byrja með en verður samvinnuþýðari þegar harðsvíraðir leigumorðingjar fara að herja á þau.  

  Sagan er óttalegt bull.  Það má brosa og hlæja af ýmsum uppákomum.  Hollywood væmni kryddar framvinduna af og til. Þær senur eru leiðinlegar.  Samt.  Væmnin brýtur upp grínsenurnar.  Þegar upp er staðið er Identity Thief ágæt grínmynd með spennuívafi sem skilur lítið eftir. Kannski má með vilja lesa út úr sögunni gagnrýni á ríflega sjálftökubónusa toppanna hjá fjármálafyrirtækjum á meðan launataxta þeirra lægra settu er haldið niðri.

 

  Þetta er ekki "verður-að-sjá" mynd.  En upplögð til að kíkja á,  svona til að gera sér eitthvað til gamans eina kvöldstund. 

.

  Umsögn um kvikmyndina Jagten:  http://www.jensgud.blog.is/blog/jensgud/entry/1288355/

 

Athugasemdir

[Stefán (IP-tala skráð) 21.3.2013 kl. 08:27]

Þessi mynd er ágæt afþreying, t.d. fyrir fjölskyldur að fara á um Páskana.  Þarna eru vel gerðar kappaksturs og árekstra-senur og það er hægt að bóka mikinn hlátur yfir fyndnustu atriðunum.   Það er hægt að mæla sérstaklega með þessari mynd fyrir fólk í bönkum og örðum fjármálafyrirtækjum sem getur þá séð í leiðinni hversu heimskulegt og yfirborðslegt það er í raun í græðgisvæðingunni.    

[Jens Guð, 22.3.2013 kl. 01:24]

  Stefán,  ég kunni vel að meta glæfrarlegar aksturssenur.  Þær eru vel útfrærðar og gefa myndinni sjálfstæða stjörnu.  Kona sem vinnur í íslenskum banka (og hefur unnið þar mjög lengi) segir mér að þessi mynd gefi  - þó ótrúiegt sé - raunsanna mynd af því sem þar hefur verið í gangi á Íslandi.