Má ég bjóða þér á hljómleika?

 

   Ég er alltaf af og til að bjóða ykkur á ókeypis hljómleika,  í kvikmyndahús eða á aðrar skemmtanir.  Það er hvergi lát þar á.  Þetta ætlar engan enda að taka.   Enda gaman.  Nú er röðin komin að laugardeginum,  næsta laugardegi (6.  apríl 2013).  Klukkan 21.00 stígur á stokk í Sjóminjasafninu á Grandagarði 8 í Reykjavík færeyska kventríóið Pushing Up Daisies.  Allir eru velkomnir á meðan húsrúm leyfir.

  Dorthea Dam,  Jensia Höjgaard Dam og Óluvá Dam skipa Pushing Up Daisies.  Þær syngja allar og spila undir á gítar og píanó.  Lögin eru falleg og söngurinn himneskur.     

  Lagið í myndbandinu hér efst,  Hey Candy með Dortheu Dam,  var eitt mest spilaða lag í færeyska útvarpinu á síðasta ári.  Sennilega verður það langlíft.  Þrátt fyrir að vera snoturt og grípandi þá þolir það ítrekaða spilun.  Sumum þykir lagið í myndbandinu hér fyrir neðan,  When I´m Gone með Dortheu Dam,  jafnvel ennþá magnaðra.  Höfundur laganna er William Silverthorn.  Hann er eiginmaður Dortheu. 

      

Athugasemdir

[Ásthildur Cesil Þórðardóttir, 4.4.2013 kl. 13:52]

Takk fyrir flott boð Jens minn, söngurinn er flottur og lagið fallegt. 

[Þórunn (IP-tala skráð) 4.4.2013 kl. 16:19]

Þakka þér fyrir að setja inn þessi fallegu lög. Ég sé að það er kominn tími á að kynna sér betur tónlist frá Færeyjum. Hvers vegna ætli við heyrum svona lítið frá þeim í Ríkisútvarpinu? Nóg er af tónlistaþáttum þar.

[Gunnar. (IP-tala skráð) 4.4.2013 kl. 19:13]

Er áfengi í boði?

[Jens Guð, 4.4.2013 kl. 21:28]

  Ásthildur Cesil,  Færeyingarnir kunna þetta. 

[Jens Guð, 4.4.2013 kl. 21:31]

  Þórunn,  færeysk músík er stundum spiluð á rás 2.  Eivör,  Týr,  Högni Lisberg og fleiri hafa átt vinsæl lög á rás 2.  Í fyrramálið,  um og upp úr klukkan hálf 10,  verða Pushing Up Daisies í viðtali í Virkum morgnum á rás 2.  Væntanlega taka þær lagið.

[Jens Guð, 4.4.2013 kl. 21:32]

  Gunnar,  áfengi  er í boði - á vægu verði.

[Ásthildur Cesil Þórðardóttir, 4.4.2013 kl. 22:04]

Já svo sannarlega kunna þeir þetta.