Það þarf að passa upp á bjálfa

  Fólk kann ekki fótum sínum forráð.  Það er bjálfar.  Ef ekki væri fyrir ákveðni, árvekni og afskiptasemi opinberra embættismanna er næsta víst að margur lendi í vandræðum.  Ekki aðeins með sig.  Einnig með sína.  Þökk sé mannanafnalöggunni og öðrum slíkum spaugfuglum.

  Ábúðafulli,  ábyrgðarfulli,  metnaðarfulli og meira fulli embættismaðurinn nærist á því að veita bjálfum leiðsögn.  Annars fer illa.  Bjálfar gætu til að mynda tekið upp á því að synda í straumhörðum fossum við lífshættulegar aðstæður ef engin væri forvörnin.  Hún felst í því að banna sund á svoleiðis stöðum.

  Embættismenn eru vakandi og sofandi yfir því að koma auga á eitthvað sem áríðandi er að banna.  Eða eitthvað til að beina bjálfum inn á réttar brautir.  Forða þeim frá hættum og vandræðagangi.  Stundum kemur fyrir að samviskusömustu og hugmyndaríkustu embættismönnum dettur ekkert í hug.  En samviskan lætur þá ekki í friði.  þeir vita að bjálfarnir treysta á leiðsögn þeirra.  Bjálfarnir horfa um allt í leit að skiltum með upplýsingum um hvað má ekki.  Frekar en að hafa ekkert skilti láta embættismenn setja upp skilti með upplýsingum um að skiltið sé ekki í notkun.

  Í öðrum tilfellum er gripið til þess ráðs að gefa á skilti upp nánari upplýsingar um skilti sem þjónar engum öðrum tilgangi.  Bjálfar fyllast öryggistilfinningu þegar þeir lesa upplýsingar um að þannig skilti megi ekki snerta vegna þess að brúnir þess séu hættulega beittar.

 

  Embættismenn grípa oft til stílbragðs sem kallast stofnanamál.  Það einkennist af því að enginn skilur almennilega hvað þeir eru að segja.  Ekki þeir sjálfir heldur.  Samt hljómar textinn ábyrgðarfullur og leiðbeinandi.  Eins og:  "Reykingar bannaðar innan 15 feta allsstaðar."

  Huga þarf að og skima eftir skiltum frá embættismönnum hvar sem þau kunna að leynast. Brýnt er að vita að ekki megi skjóta vélhjólaknapa í landi Skógræktar ríkisins.  Annað er útbreiddur misskilningur og refsivert athæfi.  

Athugasemdir

[Siggi Lee Lewis, 8.5.2013 kl. 23:45]

Svo var það skiltið sem sagði: "Warning Sign"

[Siggi Lee Lewis, 8.5.2013 kl. 23:46]

Eða "Varúð! Skilti" eins það myndi útleggjast á íslensku

[Aðalsteinn Sigurgeirsson, 9.5.2013 kl. 17:42]

Ég held þú sért að túlka skilti Skógræktar ríkisins af Haukadalsheiði full-frjálslega, Jens.
Að mínum dómi gefur skiltið til kynna að byssukörlum sem vel vaxnir eru niðrum sig sé veitt almenn heimild til að skjóta menn, nema undir sértækum kringumstæðum (sé maðurinn á ferð á vélhjóli, með hjálm á höfði og snúi hann bakinu í byssuhlaupið).

[Jens Guð, 12.5.2013 kl. 20:18]

  Ziggy,  takk fyrir það.

[Jens Guð, 12.5.2013 kl. 20:19]

  Aðalsteinn,  ég geri ekki athugasemd við þína túlkun á þessu.