Einfalt sparnaðarráð fyrir þá sem eiga ekki ljósmyndavél

  Flestir eiga sér draum.  Draum um að taka ljósmyndir.  Margir þeirra eiga sér einnig annan draum.  Draum um að eiga ljósmyndavél.  Draum um að taka á hana ljósmyndir.  Ljósmyndir til að hengja upp á vegg.  Skreyta húsakynni sín - og jafnvel annarra - með þessum ljósmyndum.

  Vandamálið er það að sumt af þessu draumórafólki er fátækt.  Það á engan pening fyrir ljósmyndavél.  Sumt af þessu draumórafólki á að vísu pening fyrir ljósmyndavél.  En það á engan pening fyrir því að láta framkalla myndina yfir á pappír. 

  Hvað er þá til ráða?  Lausnin er einföld.  Hún felst í því að teikna myndir sem líta út alveg eins og ljósmyndir.  Eiginlega þarf lítið annað til en þolinmæði.  Það er seinlegt að rissa upp þannig myndir.  En hvað liggur svo sem á?  Hver er að flýta sér?  Er einhver að missa af strætó?

  Þetta er sömuleiðis gott sparnaðarráð fyrir hvern sem er.  Málið er að nostra við smáatriðin.  Nostra og nostra.  Það má til að mynda fá ókeypis brúnan innpökkunarpappír á næsta pósthúsi og dusta rykið af trélitunum.  Þá verður útkoman svona:

   

Ef enginn er pappírinn þá er málið að teikna á vegginn. 

Ef engir litir eða málning er til taks er hægt að nota kolamola.  Útkoman verður eins og svart-hvít ljósmynd.

Ef illa gengur að ná tökum á teikningunni getur verið ráð að vinna myndina á haus.  Það gefst oft betur.   

Athugasemdir

[Stefán (IP-tala skráð) 25.6.2013 kl. 11:39]

Ég er aftur á móti með góð ráð til þeirra sem enn eru svo vitlausir að moka peningum í áskriftir hjá 365 miðlum:  Friðið samviskuna og segið strax upp öllum slíkum áskiftum og gerið þess í stað eitthvað skemmtilegt fyrir peningana í sumarleyfinu.  Áskriftum að Stöð 2 hefur þegar fækkað um tæp 8,2 % síðan 2010 !   

[Jens Guð, 25.6.2013 kl. 19:24]

  Stefán,  ég hef ekki verið með áskrift að Stöð 2 frá því á síðustu öld.  Hinsvegar var haft samband við mig frá 365 miðlum í apríl og mér boðinn aðgangur að Stöð 2 í einhverja daga.  Ég man ekki hvort það var hálfur mánuður eða hvað.  Þetta var ókeypis kynningaráskrift.  Það var allt í lagi.

  Mér dauðbrá þegar ég skoðaði dagskrána.  Ég tékkaði á nokkrum þáttum sem ég þekkti ekki.  Þvílíkt rusl.  Aulahúmors-þættir og sápuóperur í bland.  Ég fann ekki einn einasta frambærilegan dagskrárlið.  Bara hörmungina eina.