Ævintýri í leigubíl

 

   Það er oft gaman að taka leigubíl.  Í dag hringdi ég á leigubíl.  Ég bý við einstefnuakstursgötu.  Þegar mig fór að lengja eftir bílnum rölti ég upp götuna til að leigubíllinn þyrfti ekki að keyra niður einstefnuna.  Þar sem ég stóð við enda götunnar sá ég allt í einu að leigubíllinn kom akandi upp götuna á móti einstefnu.  Ég settist inn í bílinn og sagði:  "Þú kemur brunandi hér upp gegn einstefnu."  Bílstjórinn svaraði:  "Já,  ég kom frá hliðargötu og misreiknaði mig.  Ég ætlaði að bakka upp götuna en eitthvað fór úrskeiðis."

  Svo tók hann dálítinn krók í vitlausa átt.  Það var reiðulaust af minni hálfu.  Því næst ók hann að gatnamótum með götuljósum.  Þar loguðu rauð ljós.  Bílstjórinn lét það ekki trufla sig heldur ók rakleiðis yfir gatnamótin gegn rauðu ljósi.  Sem betur fer var umferð hæg og aðrir bílstjórar negldu niður til,  náðu þannig að forða árekstri og flautuðu ákaft.  Mér varð að orði:  "Hvað er þetta?  Er allt í rugli með ljósin?"  Bílstjórinn var hinn rólegasti og svaraði:  "Já,  þau bara blikka.  Þetta er eitthvað rugl."

  Mér varð litið yfir gatnamótin.  Þar var pallbíll staddur með vinnumönnum og blikkandi gulu ljósi.  Leigubílstjórinn hafði tekið meira mark á þeim ljósum en umferðarljósunum á gatnamótunum.  Bílstjórinn bætti við:  "Það er allt í rugli í gatnagerð á þessum árstíma.  Maður er alveg ringlaður út af þessari dellu.  Það væri nær að sinna gatnagerð yfir hásumarið þegar allir eru í sumarfríi og engin umferð." 

  Eftir þetta gekk allt vel fyrir sig.  

 

Athugasemdir

[Jósef Smári Ásmundsson, 21.9.2013 kl. 07:29]

Ég myndi nú segja að það væri ráð fyrir þennan leigubílstjóra að keyra aðeins á árstímum sem hann er ekki alveg svona ruglaður.

[Grrr (IP-tala skráð) 21.9.2013 kl. 11:10]

http://www.youtube.com/watch?v=meEvDheYezI

[Ragnar Eiríksson (IP-tala skráð) 21.9.2013 kl. 11:25]

Því miður þá eru of margir í leigubílsstjórastéttinni sem ættu ekki að vera þar .

[Jens Guð, 21.9.2013 kl. 18:37]

  Jósef,  það getur líka verið að hann hafi aðeins átt slæman dag. 

[Jens Guð, 21.9.2013 kl. 18:37]

  Grrr,  takk fyrir þessa frábæru klippu!

[Jens Guð, 21.9.2013 kl. 18:38]

  Ragnar,  það er misjafn sauður í mörgu fé.