Dularfullt mál upplýst

 

 

 

 

 

 

 

 

  Gríðarlega undarleg sjón blasti við gestum og gangandi í færeyska bænum Klakksvík í gær.  Klakksvík er einskonar Akureyri þeirra Færeyinga;  höfuðborg norðureyjanna.  Íbúar eru á fimmta þúsund.  Það sem vakti undrun Klakksvíkinga í gær - og enn í dag - er að einn af bílum stofnunar sem heitir Nærverk ók um götur bæjarins án númeraplatna.  Þetta er nýlegur og flottur silfurlitaður Renault fólksbíll (sjá mynd.  Ég er ekki alveg viss en mig minnir að Nærverk sé einhverskonar félagsmálastofnun).  

  Múgur og margmenni þusti að bílstjóranum hvar sem hann lagði bílnum.  Alla þyrsti í að vita hvers vegna engar númerplötur væru á bílnum.  Bílstjórinn svaraði því til að hann hefði ekki hugmynd um það.  Númerplöturnar væru horfnar af bílnum og það væri ekkert sem hann gæti gert í því.

  Rannsóknarblaðamenn gengu í málið.  Út úr rannsóknarblaðamennskunni kom að Nærverk skuldaði bifreiðagjöld (á færeysku kölluð vegaskattur).  Lögreglan hefði þess vegna klippt númeraplöturnar af bílnum.  Þær færu ekki á bílinn aftur fyrr en bifreiðagjöld væru í skilum.  

  Svo virðist vera sem gíróseðill vegna bifreiðagjaldsins hafi ekki skilað sér til Nærverks.  Nærverk getur ekki borgað gíróseðil sem ekki skilar sér.  Málið er í vandræðalegum hnút.  Á meðan er bíllinn kjánalegur með engar númeraplötur.   

Athugasemdir

[Stefán (IP-tala skráð) 4.10.2013 kl. 08:25]

Það er þó skýring á því afhverju númeraplöturnar vantar þarna, en ég veit ekki afhverju heilana virðist vanta í suma dagskrárgerðamenn á FM 95'7 ?

[Tobbi (IP-tala skráð) 4.10.2013 kl. 09:33]

„Það er þó skýring á því afhverju númeraplöturnar vantar þarna, en ég veit ekki afhverju heilana virðist vanta í suma dagskrárgerðamenn á FM 95'7 ?“  Samhengið milli pistils Hrafnhælingsins og þessa svars er vitaskuld augljóst og svarið við spurningunni líka.  Þetta er vitaskuld ríkisstjórninni að kenna, annað hvort núverandi eða fyrrverandi.  Borðleggjandi.  Nema Jónsen eigi hlut að máli?

[Sigurður I B Guðmundsson, 4.10.2013 kl. 18:30]

Ætli strákarnir á Litla-Hrauni geti ekki reddað einni plötu með textanum: Vantar Giró!!

[Jens Guð, 7.10.2013 kl. 21:41]

  Stefán,  mér tekst að forðast dagskrá FM957.  Músíkin þar á bæ er þannig.  Ég veit því ekkert um dagskrárgerðarmennina. 

[Jens Guð, 7.10.2013 kl. 21:41]

  Tobbi,  mig grunar Jónsen. 

[Jens Guð, 7.10.2013 kl. 21:42]

  Sigurður I.B.,  þetta er upplagt verkefni fyrir þá.