Færeyskt lag í 1. sæti á bandaríska vinsældalistanum

  Það er ekki á hverjum degi sem færeyskt lag er í toppsætinu á bandaríska internetvinsældalistanum og þriðja sæti á bandaríska almenna vinsældalistanum.  Þetta gerist ekki einu sinni annan hvern dag.  En þetta var nú bara að gerast.  Og gæti gerst aftur.  

  Þannig er að á dögunum kom út plata með bandarísku söng- og leikkonunni Cher.  Platan heitir Closer to the Truth.  Öflugasta lag plötunnar heitir My Love.  Það er eftir færeysku söngkonuna og söngvahöfundinn Gretu Svabo Bech.  

  Closer to the Truth er 26. plata Cher.  Jafnframt hennar fyrsta plata í 12 ár.  Gríðarlegur spenningur var fyrir plötunni.  Hún flaug í toppsæti bandaríska internetvinsældalistans,  3ja sæti digitalvinsældalistans (plötur seldar í stafrænu formi) og 3ja sæti almenna bandaríska vinsældalistans (plötur seldar í föstu formi).  

  Platan hefur verið ofarlega á sölulistum víðar um heim.  Til að mynda er hún í 11. sæti kanadíska vinsældalistans,  13. sæti ástralska digitalvinsældalistans, 17. sæti ástralska almenna vinsældalistans,  19. sæti ítalska almenna vinsældalistans og 20. sæti ungverska almenna vinsældalistans.   

  Stelpan í Miðvági í Færeyjum er í góðum málum. 

  Meira má lesa um Gretu með því að smella á þennan hlekk:  http://jensgud.blog.is/blog/jensgud/entry/1311692/

  Greta er miklu betri söng- og tónlistarkona en Cher.

  

Athugasemdir

[Rafn Haraldur Sigurðsson (IP-tala skráð) 12.10.2013 kl. 21:40]

Þetta er nú hálfgert kattarmjálm hjá henni, minnir mig á þegar ég bjó á vesturgötunni í gamla daga og kettirnir hélldu fyrir mér vöku með breiminu. Cher hefur dýpri og meira róandi rödd. En gott hjá henni að koma laginu á framfæri.

[Jens Guð, 13.10.2013 kl. 02:07]

  Rafn,  fáir mjálma betur en kettir. 

[Vilhjálmur Örn Vilhjálmsson, 13.10.2013 kl. 11:39]

Það hefur snaraukist hjá þér flettingin eftir að Dimmalætting lagði upp laupana. Hvar geta Færeyingar annars lesið um heimsfrægð sína?

[Grrr (IP-tala skráð) 13.10.2013 kl. 12:36]

"Hvar geta Færeyingar annars lesið um heimsfrægð sína?

Vilhjálmur Örn Vilhjálmsson"

http://www.sosialurin.fo/main.cfm/

[Vilhjálmur Örn Vilhjálmsson, 13.10.2013 kl. 16:49]

Ég hef nú gerst svo frægur að skrifað tvær greinar í Dimmalætting, Grrr. Ert þú social urin?

[Anna Sigríður Guðmundsdóttir, 13.10.2013 kl. 17:13]

Færeyingar eru flottir, hvort sem þeir syngja, mjálma, eða eru þeir sjálfir á öllum öðrum sviðum.

Voru það ekki Færeyjar sem lánuðu okkur Íslands-kjánunum framfærslu-gjaldmiðil án skilyrða, þegar við vorum alveg búin að missa tökin á tilverunni?

Já, gangi þeim allt í haginn, blessuðum Færeyingunum.

Takk Færeyingar, fyrir að vera vinir Íslendinga í raun  .

M.b.kv.

[Jens Guð, 13.10.2013 kl. 19:09]

  Vilhjálmur Örn (#3),  þarna kom skýringin.

[Jens Guð, 13.10.2013 kl. 19:11]

  Grrr,  svo eru það netsíðurnar.  Ég rúnta um nokkrar á hverjum degi.

[Jens Guð, 14.10.2013 kl. 00:28]

   Vilhjálmur Örn (#5),  Dimma (Dimmalætting gekk undir því nafni dags daglega) bað mig líka um að skrifa greinar.  Og til að búa til meting (hehehe!):  Dimma tók nokkur viðtöl við mig.  Eitt þeirra var forsíðuviðtal sem spannaði heila opnu innan í sjálfu blaðinu.  Þá var brot blaðsins tvöfalt stærra en á seinni árum.  Fyrirsögnin var:  "Guð skrifar eins og engill".   Ég hef ekki nennt að safna eða geyma því sem um mig birtist í fjölmiðlum.  En þetta forsíðuviðtal á ég einhversstaðar.     

[Jens Guð, 14.10.2013 kl. 00:45]

  Anna Sigríður,  það var þannig að í kjölfar bankahrunsins og þar um bil hvarf allur gjaldeyrisforði Íslendinga (til Tortóla).  Íslensk stjórnvöld grátbáðu Norðurlönd,  Bandaríkin,  Rússa og fleiri um að redda okkur gjaldeyri.  Enginn þorði að lána "gjaldþrota" Íslandi gjaldeyri.  Þá tóku Færeyingar málið upp á vettvangi Norðurlandaráðs og buðust til að lána Íslandi gjaldeyri og skoruðu á aðrar þjóðir að gera slíkt hið sama.  Mig minnir að Færeyingar hafi lánað Íslendingum vel á sjöunda milljarð í erlendum gjaldeyri.  Pólverjar komu í kjölfarið og lánuðu Íslendingum sex milljarða í gjaldeyri.  Þar með opnuðust lánalínur og fleiri þorðu að lána Íslendingum gjaldeyri.  Það sem meira var:  Færeyska láninu fylgdu engin skilyrði.  Hvorki varðandi vexti né endurgreiðslu. 

  Í Færeyjum varð hávær umræða um lánið.  Umræðan gekk öll út á það að lánið til Íslendinga hefði átt að vera hærri fjárupphæð.  Það heyrðist ekki ein einasta gagnrýnin rödd í færeyskri umræðu um neitt annað.  

[Anna Sigríður Guðmundsdóttir, 15.10.2013 kl. 20:34]

Já, Jens minn. Við getum þakkað Færeyingum og Pólverjum fyrir þeirra óeigingjörnu og höfðinglegu stórmennsku, þegar okkur stóð ekkert til boða nema vöru og lyfjaskortur :).

Ég þakka Færeyingum og Pólverjum kærlega fyrir mig, og það ættu fleiri Íslendingar kannski að gera.

M.b.kv.

[Jens Guð, 15.10.2013 kl. 21:03]

  Anna Sigríður,  ég tek heilshugar undir þetta hjá þér.