Tálbeitur á vafasömu svæði

  Árlega er hringt í alla sjoppueigendur í Hafnarfirði.  Erindið er að upplýsa þá um að næstu daga muni tálbeitur kanna hvort að börn geti keypt sígarettur í sjoppunni.  Það er víst bannað.  Ég veit ekki hvers vegna.  Langi börn og unglinga að reykja sígarettur er það ekkert mál.  Allir sem vilja geta reddað sér sígarettum.  Jafn auðveldlega og að redda sér landa og hassi.

  Þrátt fyrir að sjoppueigendur séu upplýstir um væntanlega heimsókn tálbeitu þá eru alltaf einhverjir sem ganga í gildruna.  Láta standa sig að verki við að selja börnum sígarettur.  Fólk þarf ekki að vera gáfað til að reka sjoppu í Hafnarfirði.  En það hjálpar að vera ekki vitleysingur.  

  Tálbeiturnar eru á gráu svæði.  Þetta eru börn sem brjóta lög um leið og þau góma sjoppueigendur í gildru.  Börnin eru ekki sakhæf vegna ungs aldurs.  En þau komast að því hvar þau geta auðveldlega keypt sígarettur.  Barn sem hefur einu sinni brotið lög er komið yfir stóra þröskuldinn.  Það upplifir spennuna við að brjóta lög.  Það sækir í að endurupplifa adrenalín-"kikkið".  Þarna er verið að framleiða glæpamenn framtíðarinnar.

  

  

   

 

 

 

 

 

 

  Annað:  Fyrir þremur áratugum var ég á gangi ásamt 4ra ára syni mínum.  Á gangstéttinni mættum við gömlum manni sem kastaði frá sér logandi sígarettustubbi.  Strákurinn tók stubbinn upp,  skoðaði hann og setti hann í galsa á milli fingra sér eins og reykingamaður og hélt á honum fyrir framan munninn á sér.  Þóttist reykja.  Í þann mund kom einkennisklæddur strætóbílstjóri gangandi út úr húsi og mætti okkur.

  Ég segi þá hátt og skýrt:  "Davíð minn,  þú ættir að reyna að minnka við þig reykingarnar.  Ég var að lesa um að reykingar væru óhollar."

  Við þessi orð mín tók strætóbílstjórinn snöggt viðbragð.  Hann snérist á hæl og starði reiðilegur á svip á eftir okkur feðgum.  Við röltum áfram.  Út undan mér sá ég að strætóbílstjórinn starði hreyfingarlaus á eftir okkur á meðan við vorum í augsýn.  

   

Athugasemdir

[Stefán (IP-tala skráð) 18.11.2013 kl. 09:42]

Íslenska græðgin og íslenska siðleysið gerir það að verkum að sjoppur selja börnum og unglingum hiklaust tóbak og barir selja unglingum undir lögaldri hiklaust áfengi.

[Sigurður I B Guðmundsson, 18.11.2013 kl. 17:18]

Ferðu ekki bráðum að verða búinn að reykja þessa sígarettu???

[Jens Guð, 18.11.2013 kl. 19:55]

  Stefán,  svo eru allskonar einstaklingar sem selja börnum Landa og sígarettur út um bílgluggann hjá sér. 

[Jens Guð, 18.11.2013 kl. 19:56]

  Sigurður I.B.,  góður

[Grrr (IP-tala skráð) 18.11.2013 kl. 21:26]

Yfirvöld eru skíthrædd við sígó en þau sjá ekkert að því að það er verið að hrúga rítalíni í smábörn.

[Jens Guð, 18.11.2013 kl. 23:20]

  Grrr,  rítalíni er þvílíkt dælt ofan í íslensk ungmenni að það vekur upp spurningar um það hver sé umboðsaðili hérlendis.  Mér skilst að Íslendingar eigi heimsmet í notkun rítalíns.  Ég þekki nokkuð marga sem eru áskrifendur að rítalíni og selja það til að fjármagna neyslu á öðru dópi. 

[Jósef Smári Ásmundsson, 19.11.2013 kl. 05:48]

Er nú ekki sammála þér þarna Stjáni ,aldrei þessu vant. Reyndar finnst mér svolítið skondið að meðan það þarf leyfi til að flytja inn eiturefni og kaupa þau þá er leyfilegt að kaupa sér tóbak sem innheldur þessi óleyfilegu efni. Og nú er ég bara að tala um fullorðna,ekki fólk undir lögaldri. Tóbak er aðeins leyfilegt í dag vegna þess að það er hefð fyrir því. En í raun banna lögin innflutning og sölu tóbaks.

[Jens Guð, 19.11.2013 kl. 16:07]

  Jósef Smári,  það er ekkert víst að ég sé heldur sammála mér.  Eða eins og Goggi Tvöfalt v Brúskur orðaði það á sínum tíma:  Ég hef skoðanir á flestum málefnum en er ekki endilega sammála þeim.  

[Jósef Smári Ásmundsson, 19.11.2013 kl. 20:17]

He,he. Þessi var ansi góður hjá Bush. En hef grun um að hann hafi ekkert endilega ætlað sér að grínast heldur hafi tvær orustuflugvélar lent saman í kollinum á honum. Hann var með Rugluna á háu stigi.

[Jens Guð, 19.11.2013 kl. 22:09]

  Jósef Smári,  Brúskur var og hefur aldrei verið húmoristi.  Hans sérkenni eru að vera kjáni.  Ekki aðeins mitt mat.  Líka föður hans og margra annarra.  Að auki skrítið að bera gælunafn yfir kvenmannsklof,  bush.