Flottur útvarpsþáttur

   Virkir morgnar  á Rás 2 eru með allra skemmtilegustu þáttum í sögu útvarps á Íslandi.  Þau Andri Freyr Viðarsson og Gunna Dís Emilsdóttir fara á kostum. 

  Ég hef fylgst með Andra Frey í útvarpi alveg síðan hann byrjaði með rokkþáttinn  Karate  á X-inu fyrir mörgum árum.  Þessu næst fór hann á svakalegt flug í þættinum  Freysa  á sömu útvarpsstöð.   Sá þáttur var ein samfelld rosaleg flugeldasýning.  Engum var vægt og allt látið flakka.  Það kostaði sitt.  Lögfræðingar fengu hellings vinnu við að útbúa kærur á hendur Andra Frey og / eða hóta honum kærum.  Líka handrukkarar.  Grallaragangurinn á Andra Frey kostaði hann peninga.  Og jafnvel vini.  Á þessum tíma var hann gítarleikari í Botnleðju og lék aðra í bransanum grátt með "grófu" slúðri.

  Þegar hlustað var á þáttinn  Freysa  hvarflaði ekki að neinum að Andri Freyr væri framtíðarstjarna RÚV,  sjónvarps og Rásar 2.  En það var augljóst að maðurinn var stjarna:  Hugmyndaflugið óendanleg uppspretta spaugilegs gassagangs,  hnyttin tilsvör,  fyndið kæruleysi en jafnframt metnaður.  

  Stjórnendur og yfirmenn X-ins voru lengst af ótrúlega djarfir og umburðarlyndir gagnvart þættinum  Freysa.  Ég man ekki hvers vegna þátturinn var tekinn af dagskrá.  Hvort að kærumál og skaðabætur voru farnar að íþyngja. 

  Allt í einu var Andri Freyr - ásamt Dodda litla - kominn með snilldar föstudagsþátt á Rás 2,  Litlu hafmeyjuna.  Þá var Andri Freyr  plötusnúður í Danmörku.  Gott ef ekki á skemmtistað Dóru Takefúsa og víðar.  

  Staðsettur á Íslandi hélt Doddi litli utan um þáttinn.  Andri Freyr var meira með innslög og eitthvað svoleiðis.  Viðtöl við danskar poppstjörnur og þess háttar.  Það kom afskaplega vel út að Andri Freyr hefði einhvern við hlið sér sem veitti aðhald og héldi honum nær jörðinni.

  Gunna Dís,  sem er með Andra Frey í  Virkum morgnum,  er glæsileg í því hlutverki.  Móðir mín á níræðisaldri gætir þess vandlega að missa aldrei af  Virkum morgnum.  Henni þykir þau tvö rosalega skemmtileg.  Og skemmtilegast þykir henni þegar Gunna Dís veitir drengnum aðhald / tiltal.

  Þau eru frábær saman.  Ég er sammála mömmu með það.  Og reyndar fleira sem er þessu óviðkomandi.           

  Andri Freyr er sömuleiðis meiriháttar skemmtilegur sjónvarpsmaður.  Þættirnir um  Andra á flandri  eru afskaplega vel heppnaðir.  Þar vinnur hann að hluta með skrifaðan texta (sem hann skrifar sjálfur) og þættirnir eru unnir fram og til baka.  Í sumar verður Andri á flandri í Færeyjum.  Ég hlakka mikið til að sjá þá.   

  Hér er Andri Freyr með hljómsveitinni stórkostlegu Bisund:

  Og hér með Botnleðju - líka meiriháttar:

„Af hverju skiptiru þá ekki um stöð?“

Athugasemdir

[Stefán (IP-tala skráð) 10.1.2014 kl. 08:24]

Það er flest eða nánast allt til mikillar fyrirmyndar á Rás 1 og Rás 2 og almennt er allt til fyrirmyndar hjá RÚV hvað dagskrárgerð varðar, en á bak við tjöldin virðist einelti og skítamórall grassera, en það er þá frá stjórnendum fyrirtækisins komið en ekki dagskrárgerðarfólkinu. Almennt lokkar RÚV til sín yfirburðar dagskrárgerðarfólk, en hæfileikasnautt dagskrárgerðarfólk virðast meira hreiðra um sig á 365 miðlum þar sem litlar kröfur virðast vera gerðar um vandaða dagskrárgerð. Það sama á við um fréttaflutning á RÚV, sem er til algjörrar fyrirmyndar. Á 365 miðlum virðist hins vegar sífellt minni kröfur vera gerðar um vandaðan fréttaflutning og einhver götustrákafílingur svífur yfir skítugum vötnum þar. Þátturinn Virkir morgnar er talandi dæmu um eistaklega skemmtilega og vandaða dagskrárgerð.  

[Ásthildur Cesil Þórðardóttir, 10.1.2014 kl. 19:28]

Ég er oftast ánægð með þau Gunnu Dís og Andra, en upp á síðkastið hefur hann varið dálítið á verri veginn með dónalegum athugasemdum sem hann gengst greinilega upp í.  Í gær eða fyrradag hnykkti hann svo út með, þegar kona hringdi og vildi meina að þau væru dónar, með því að segja henni einfaldlega að skipta um rás.

Þetta var að mínu mati hinn mesti ruddaskapur, og ég held að það ætti einhver að segja honum að þetta sé ekki sniðugt að móðga fólk svona. 

Þetta er ekki eina skiptið sem ég hef heyrt svona til hans.  Hvort hann er að stæla Jón Hafstein sem var þekktur fyrir svona stæla veit ég ekki, en þetta setur þáttinn mikið niður að mínu mati.   

[Jens Guð, 12.1.2014 kl. 21:53]

  Stefán,  það hefur til margra ára verið gæfa Rásar 1 og 2 að þangað hefur safnast hópur fólks með ástríðu fyrir tónlist,  góðan músíksmekk,  yfirgripsmikla þekkingu á tónlist og metnað til að kynna og miðla.  Telja ekki eftir sér að leggja á sig heilmikla vinnu við að fylgjast með og fylgja eftir því sem um er að vera í tónlist hverju sinni.  Sama hvort um er að ræða Músíktilraunir,  Airwaves,  G!Festival,  Hróarskelda eða annað.     

[Jens Guð, 12.1.2014 kl. 22:04]

  Ásthildur Cesil,  þú hefur greinilega ekki heyrt í Andra Frey áður en hann færði sig yfir til Rásar 2.  Í samanburði við gassaganginn á honum á X-inu er hann afskaplega settlegur og kurteis í  Virkum morgnum. 

  Engu að síður:  Ef fólk upplifir hann sem dóna með ruddaskap þá er sjálfsagt og eðlilegt að koma því á framfæri.  Hann tekur mark á gagnrýni og hefur metnað til að bæta sig.  En er að vísu hvatvís og dálítið kærulaus í hina röndina.  Það gerir hann að svo skemmtilegum dagskrárgerðarmanni.      

[Jens Guð, 12.1.2014 kl. 23:20]

  Ég vil bæta því við að X-ið hjá 365 miðlum er til fyrirmyndar.  Þar ber hæst þátturinn Harmageddon.  Virkilega frábær útvarpsþáttur. 

[Ásthildur Cesil Þórðardóttir, 14.1.2014 kl. 08:02]

Já ég er viss um að þú hefur rétt fyrir þér Jens með drenginn. Sammála að hann er skemmtilegur útvarpsmaður. En ég hlustaði á konu sem hringdi inn og var að kvarta yfir dónaskap stjórnenda og hann sagði bara, skiptu þá bara um stöð. Og það var greinilegt að hún skellti á.