Gagnlegur fróðleikur um Evrópusambandið

    Utanríkisráðherrann,  Gunnar Bragi Sveinsson,  veit margt - þó að hann viti ekki hvað sum lönd heiti.  Hann veit bara eitthvað annað í staðinn.  Gott dæmi um það er þessi fullyrðing sem hann slengdi óvænt fram í Kastljósi í kvöld:  "Evrópusambandið eyðir meiri peningum í kynningar á sér en Kóka-kóla."  Þetta er merkilegur og áhugaverður fróðleiksmoli.  Takk fyrir það.  Eftir stendur spurningin:  Hvað eyðir Evrópusambandið miklum peningum í Kóka-kóla?  Kannski miklum peningum.  Ýmislegt bendir til þess.  Til að mynda að starfsmenn Evrópusambandsins eru pestagemlingar.  Veikindadagar þeirra eru þrefalt fleiri en í nágrannalöndum okkar.

  Starfsmenn Evrópusambandsins halda sig heimavið fárveikir,  skjálfandi eins strá í vindi vegna þynnku, með dúndrandi hausverk um 15 virka daga á ári að meðaltali.  Þá er ótalið hvernig þetta lið liggur afvelta heima um helgar og á öðrum frídögum.  Til að mynda í sumarfríinu.  Það er svakalegt.

  Einn af hverjum sjö starfsmönnum Evrópusambandsins drífur ekki í vinnuna vegna veikinda yfir 20 sinnum á ári.  Þetta er ekki vegna þess að þeir séu undir miklu álagi í vinnunni.  Né heldur vegna þess að vinnan sé þeim hættuleg og harðneskjuleg.  Þeir reyna ekkert á sig.  Hvorki líkamlega né andlega.   Vinnan gengur aðallega út að það að finna sér eitthvað til að dunda við.  Menn eru mest í því að rétta hver öðrum pappír.  

  Fyrir dundið eru þeir á hærri launum en almennur launamaður.  Sjötti hver er með 16 - 20 milljónir í árslaun nánast beint í vasann.  Þeir njóta verulegra skattfríðinda og ótal annarra fríðinda. 

  Til samanburðar er skrifstofumaður í Bretlandi að meðaltali frá vinnu vegna veikinda 5 daga á ári.  Vinnuálag þeirra er mikið vegna þess að fyrirtæki og stofnanir eru undirmannaðar.  

   

  Það dugir að hlusta á fyrstu hálfu mín.

Athugasemdir

[Sigurgeir Jónsson, 13.1.2014 kl. 22:46]

Ja-hver andskotinn.Guð almáttugur hjálpi ESB.En það dugir víst ekki til.

[Jens Guð, 13.1.2014 kl. 23:56]

  Sigurgeir,  það þýðir ekkert minna en að allir guðir sameinist um að hjálpa ESB.  Það er margt að á þeim bæ.  Annars er ég ekkert andvígur ESB út af fyrir sig.  Vil bara ekki að Ísland gangi í þann klúbb. 

[Stefán (IP-tala skráð) 14.1.2014 kl. 08:19]

Já, það má segja að málfar Gunnars Braga og Vigdísar Hauksd. er afar sérkennilegt og býður upp á misskilning. Það hlýtur að vera hægt að finna einhverja málfarsráðunauta til hjálpar ráðherrum í hópi allra þeirra rándýru aðstoðarmanna sem þetta blessaða ósjálfbjarga fólk hefur raðað í kring um sig.

[Bjarni Gunnlaugur (IP-tala skráð) 14.1.2014 kl. 15:51]

Af því þú birtir þessa ágætu mynd af haugsugunni hér að ofan læt ég fljóta hér í viðhengi youtube myndband sem sýnir hversu varasamar haugsugur geta verið!   Trúlega einhversstaðar úr ESB!  

http://www.youtube.com/watch?v=nDU4-2vVNjY

[Jens Guð, 14.1.2014 kl. 21:23]

  Stefán,  góðu fréttirnar eru þær að Gunnar Bragi er næstum því búinn að læra nafnið á Mongólíu.  Hann er búinn að ná tökum á fyrsta atkvæði nafnsins og og það síðasta.  Það eru einungis miðatkvæðin sem hann ræður ekki við.  Það var víst áramótaheiti að ná að bera þau fram á þessu ári.  Ef það tekst stendur til að reyna við nafn Armeníu.  

  Ef VH verður í sviðsljósinu mikið lengur er ástæða til að gefa út orðabók með skýringum.  Það er seinlegt fyrir hvern og einn að reyna að finna út hvað orð eins og  rangsannindi  eða hvað hún var að reyna að segja þegar hún í ræðustól Alþingis mótmælti þeirri skoðun að einkavæðing banka hafi átt einhvern þátt í bankahruninu.  Rök hennar voru þessi:  "Í því sambandi bendi ég á að Íslandsbanki var einkabanki og féll fyrstur!"  

[Jens Guð, 14.1.2014 kl. 21:24]

  Bjarni,  takk fyrir þetta bráðskemmtilega myndband. 

[Anna Sigríður Guðmundsdóttir, 14.1.2014 kl. 21:53]

Úpps!

Það er víst einhver skítalykt af efninu sem selt er á Coca-Cola-flöskum hins menningarlega og hreinræktaða vestræna heims?

Það er kannski rétt, í ljósi blekkingar-sölutrixa, að kanna hvað Persi-tilboðs-gjafapakkarnir innihalda. Það hefur vakið "furðulega" tortryggni hjá mér, að Samkaup-(eitthvað) í Hafnarfirði, gefur Persi með steiktum kjúklingi og frönskum. Og ef maður vill ekki Pepsi, og sleppir því Pepsi með ódýrum herlegheitunum, þá þarf að borga meira fyrir tilboðið?

Ef einhver skilur svona Persi-kaupmennsku-hagfræði, þá væri gaman að sjá skýringu á þessum tilboðs-brellum?

Ég er nefnilega svo gjörsamlega ónothæf í stærðfræði, og hagfræði líkist óskiljanlegri stjarnfræði utan allra siðferðismarka, í mínum augum.    

M.b.kv.

[Jens Guð, 14.1.2014 kl. 23:09]

  Anna Sigríður,  allir kóladrykkir eru þóþverri.  

  Ef vara er seld á hærra verði án kaupauka en með kaupauka þá er klárt að um samning er að ræða á milli umboðsaðila kaupaukans og þess sem býður upp á tilboðið.  Umboðsaðili kaupaukans niðurgreiðir tilboðið á einhvern hátt.  

  Ég vil ekki giska á hvernig samningurinn er í þessu tilfelli sem þú nefnir.  Margt kemur til greina sem hugsanlega tekur til margra þátta.  Umboðsaðilar í harðri samkeppni við keppinauta beita ýmsum ráðum til að ná yfirhönd í samkeppninni.  Þeir semja um eitt og annað til að ná betra hilluplássi;  fá vörumerki sitt inn í auglýsingar verslunar;  ná gosdrykk sínum inn í kæli verslunar og halda keppinautnum frá kælinum...  Þannig mætti áfram telja.  

  Kostnaður við framleiðslu gosdrykkja er mjög lágt hlutfall af endanlegu söluverði.  Þetta er að uppistöðu til sykrað vatn.  Beinn auglýsingakostnaður er 20 - 25% af söluverðinu.