Kvikmyndarumsögn

  - Titill:  The Secret Life of Walter Mitty

  - Leikstjóri:  Ben Stiller

  - Leikarar:  Ben Stiller,  Ólafur Darri,  Ari Matthíasson,  Gunnar Helgason og Þórhallur Sigurðsson

  - Einkunn: *** (af 5)

  Þessi bandaríska - allt að því stórmynd - ku vera endurgerð á eldri bandarískri mynd.  Um þá mynd veit ég fátt.  Engu að síður er ég sannfærður um að Ísland og Íslendingar leiki ekki jafn stórt hlutverk í frumgerðinni.  Jafnvel ekkert hlutverk.  Það væri búið að fréttast.

  Myndin segir frá uppburðarlitlum lúða sem vinnur í framköllunardeild ljósmynda hjá tímaritinu Life.  Hann er skotinn í samstarfskonu sinni.  Kjarkleysi kemur í veg fyrir að hann gangi lengra en láta sig dreyma dagdrauma um þau tvö.  Hann dettur óspart í dagdrauma um margt fleira.  Í dagdraumum er hann kjarkmikil ofurhetja,  andstæðan við það sem hann er í raunveruleikanum.  Andstæðurnar eru það skarpar að áhorfandinn á auðvelt með að greina dagdraumana frá raunveruleikanum.

  Örlögin haga því þannig að óvænt er mannræfillinn hrifinn úr sínu örugga umhverfi í framköllunardeildinni og þeytist í viðburðarríkar ferðir til Grænlands, Íslands og Himalayafjalla.  Allar senur þessara ferðalaga eru víst teknar á Íslandi.  Það er trúlegt hvað varðar Ísland.  Líka Himalayafjöll.  En assgoti tekst vel til með senurnar sem eiga að gerast á Grænlandi.  Ég hef þrívegis komið til Grænlands og flakkað dálítið um.  Þetta er alveg eins og Grænland.

  Senurnar á Íslandi og þær sem eiga að gerast á Grænlandi eru skemmtilegastar.  Ekki aðeins vegna þess hversu fallegt og mikilfenglegt landslagið er og hversu gaman er að sjá íslenska leikara fara á kostum.  Jú, jú,  það vegur þungt.  Það er virkilega gaman að sjá Ísland skarta sínu fegursta,  íslenska náttúru minna hraustlega á sig og það er góð skemmtun að sjá íslenska leikara "brillera" í útlendri mynd sem hundruð milljóna manna um allan heim ýmist hafa séð,  eru að sjá þessa dagana eða eiga eftir að sjá. Í þessum senum nær myndin hæstu hæðum í gríni.  Hvert vel heppnaða spaugilega atvikið rekur annað.  Ólafur Darri á stjörnuleik.  Ari Matthíasson,  Gunnar Helgason og Þórhallur Sigurðsson standa sig sömuleiðis með prýði.  

  Myndin skiptir mjúklega um gír þegar Íslandi sleppir.  Síðasti fjórðungur myndarinnar er fyrst og fremst drama.  Samt ekki leiðinlegt.  Það er verið að hnýta saman lausa enda til að ljúka sögunni með fyrirsjáanlegum "happy end".  Harmrænar myndir eða bara harmrænar senur hafa ekki verið hátt skrifaðar hjá mér.  Svo rakst ég á niðurstöður viðamikillar vísindalegrar rannsóknar Notre Dame háskólans á Indlandi.  Rannsóknin leiddi í ljós að fólk verði betri manneskjur við að horfa á dramatískar kvikmyndir.  Umburðarlyndi og samkennd með öðrum vex.  Fólk á auðveldara með að setja sig í spor þeirra sem eiga um sárt að binda.           

  Ben Stiller er góður leikari.  Það staðfestir hann ítrekað í trúverðugum senum,  hvort sem er í hlutverki lúðans eða hetjunnar í dagdraumunum.  Og líka þegar lúðinn hefur öðlast sjálfstraust eftir ævintýrin á Íslandi.  Sean Penn kemur einnig sterkur til leiks í stuttri senu.  Töffaraáran er nánast áþreifanleg.  

  Ég mæli með því að fólk upplifi myndina í kvikmyndahúsi fremur en bíði eftir henni í sjónvarpi eða á DVD.  Einkum vegna landslagssenanna.  Það er áhrifaríkt þegar tónlist Of Monster and Men kemur til sögunnar er leikur berst til Íslands.  Þegar upp er staðið er myndin öflug auglýsing fyrir Ísland.  Kannski ein sú mesta fram til þessa ef frá eru taldar heimsvinsældir Bjarkar,  Sigur Rósar og Of Monster and Men.  

 

Athugasemdir

[Gunnar Th. Gunnarsson, 15.1.2014 kl. 01:08]

Langar að sjá þessa. Gæti einmitt vel trúað að nauðsynlegt sé að horfa á hana í kvikmyndahúsi.... svona svipað og Saving Privat Ryan

[Stefán (IP-tala skráð) 15.1.2014 kl. 08:31]

,, Í dagdraumum er hann kjarkmikil ofurhetja, andstæðan við það sem hann er í raunveruleikanum ". Á við um svo marga, marga, t.d. ,, lítinn karl " í bakherbergi á íslensku fjölmiðlaveldi sem er nánast við dauðans dyr og hugsanlega er öllu burðugra og öflugra fjölmiðlaveldi að yfirtaka það. ,, Litli karlinn " sem hreinsaði bankana að innan og fór á misheppnað viðskiptaflug út um víða veröld og skildi eingöngu eftir sig slóðir eyðileggingar. Þessi Walter Mitty virkar nú öllu meira spennandi uppburðarlítill lúði en sá með öllu misheppnaði litli viðskiptakarl sem olli íslenska bankahruninu. 

[Jón Steinar Ragnarsson, 15.1.2014 kl. 20:26]

Það er mikið gert af því að bera saman gömlu myndina og þess. Gamla myndin er með Danny Kay, sem minnir óneitanlega á Magnús Scheving.

Í þessum samanburði gleymist að hvorug myndin á mikið skylt við rétt ríflega tveggja blaðsíðna smásögu James Thurber um mann sem dagdreymir í bílnum á meðan konan er að versla. (Thurber gerði m.a. Myndskreytt ljóð sem hét Sálmurinn um blómið, sem margir kannast við.

Hér er sloð á söguna, sem er fljótlesin.

http://www.vma.is/static/files/enska/Bokmenntir/Short%20Stories/SecretLifeofWalterMitty_Thurber.pdf

Hvernig er það annars með þennan Stefán hér að ofan? Getur hann aldrei sett saman setningu nema að blanda útrás og bönkum í málið, sama hvert umræðuefnið er? Þráhyggja? Tjah, mig skortir geðlæknismenntun til að skera úr um það, en það lítur sannarlega út fyrir það.

[Jens Guð, 15.1.2014 kl. 23:55]

  Gunnar Th.,  landslagssenurnar á Íslandi eru mikilfenglegar á breiðtjaldinu.  Þú,  góður landslagsljósmyndari,  kannt áreiðanlega að njóta þess.  Eru ennþá kvikmyndasýningar í Félagsheimilinu á Reyðarfirði?  Mig rámar í að hljómborðsleikarinn Ingi Ben hafi sýnt kvikmyndir þar á áttunda áratugnum. 

[Jens Guð, 15.1.2014 kl. 23:56]

  Stefán,  þú ert væntalega að vísa til JÁJ. 

[Jens Guð, 16.1.2014 kl. 00:03]

  Jón Steinar,  takk fyrir upplýsingarnar og slóðina.  Ég kann vel að meta "komment" Stefáns.  Og fleiri hafa nefnt við mig að þeir hafi gaman af.  Síðast í dag spjallaði ég í síma við ungan mann sem sagðist bíða alltaf spenntur eftir "kommenti" frá Stefáni. 

[Gunnar Th. Gunnarsson, 16.1.2014 kl. 00:19]

Bíóið er ekki lengur og Ingólfur Ben lést síðasta sumar. Hann var afi Andra Freys á Rás2.

[Jens Guð, 16.1.2014 kl. 00:46]

  Gunnar Th.,  ég var með námskeið í skrautskrift á Reyðarfirði fyrir 20 árum eða eitthvað.  Þá hitti ég snillinginn Inga Ben.  Það var ævintýri að ræða við hann um þungarokk. Hann þekkti nöfnin á hörðustu þungarokkurum og fór ekki mildum orðum um þá sem voru ekki að hans skapi.  Enginn nálægt honum í aldri fyrr né síðar hafa verið eins vel að sér í rokksenunni og hann.  Það var sama hvort að tal barst að Sepultura eða Pantera.  Kallinn var á heimavelli.  Frábær náungi.  Já,  kjaftfor.  Mér finnst sem ég heyri bergmál frá kallinum í töktum hjá Andra Frey í Virkum morgnum á Rás 2. 

[Jens Guð, 16.1.2014 kl. 00:49]

  Eru bíósýningar á Egilsstöðum?

[Stefán (IP-tala skráð) 16.1.2014 kl. 08:24]

Gleðilegt ár kæri Jón Steinar. Já, ég skrifa bara mín komment hér vegna fjölda kvatninga, en smekkur manna er misjafn á því rétt eins og á bíómyndum. Það veist þú nú líka sjálfur varðandi þínar myndir.