Mannað geimfar lenti á sólinni

   Í gærmorgun var sautján ára drengur,  Hung Il Gong,  á leið heim til sín - eftir nætursvall - í Norður-Kóreu.  Að venju slagaði hann framhjá geimferðarstofnun landsins.  Við honum blasti nett geimflaug og dyrnar voru ekki alveg lokaðar.  Forvitni vaknaði,  Hung Il Gong skreið inn í flaugina og litaðist um.  Hann sá að allir takkar,  handföng,  mælar og annað var vel merkt og auðskiljanlegt.  

  Hung þótti ekki ástæða til að bíða með neitt.  Hann ræsti flaugina,  skaut henni á loft og setti stefnuna á sólina.  

  Svo heppilega vildi til að ferðalagið var eftir sólsetur og fyrir sólarupprás.  Hung ferðaðist þess vegna í myrkri þangað til hann kom að sólinni.  Þá stýrði hann flauginni lipurlega að bakhlið sólarinnar,  sem er ekki eins heit og framhliðin,  og lenti þar.

  Frásögn af lendingunni á sólinni var aðalfréttin í n-kóreska sjónvarpinu.  Þar sagði meðal annars að Norður-Kórea hafi skotið öllum þjóðum heims ref fyrir rass með geimferðinni til sólarinnar.  Hvatt var til þess að Hung Il Gong yrði fagnað sem hetju við heimkomuna.  Ferðin til sólarinnar væri stærsta afrek í sögu mannkyns frá upphafi. 

  Hung Il Gong er náfrændi Kim Jong-un,  leiðtoga þjóðarinnar.  Hung fyllti alla vasa af sjóðheitu sólargrjóti sem hann ætlar að færa Kim frænda að gjöf.  N-kóreskir fjölmiðlar þreytast ekki á að halda því fram að Kim Jong-un sé kynþokkafyllsti maður í heimi.  Jafnframt hamra n-kóreskir fjölmiðlar á því að Kim Jong-un hafi fundið upp herraklippingu sem farið hefur sigurför um heiminn.  Þess á milli rifja þeir upp að faðir Kim Jong-un hafi fundið upp hamborgarann.  

  Kim Jong-un hefur tekið upp sið föður síns að drekka sig blindfullan af koníaki á kvöldin.  Enda engin ástæða til annars.  Kim Jong-un hefur þó ekki apað upp sið pabbans að sitja allsnakinn við drykkjuna.  Kim Jong-un er svo kynþokkafullur að hann þarf ekki klæðaleysi til að flagga því. 

 

  Hung ráðleggur næstu sólarförum að hafa sólgleraugu með.  Það er dáldið bjart á sólinni. 

  

   

Athugasemdir

[. (IP-tala skráð) 24.1.2014 kl. 21:21]

Þett lýsir vel hugviti Norður Kóreumanna og yfirburðum þjóðfélagsskipulagsins þar.

Það er auðvitað ekkert mál að lenda á dökku hlið sólarinnar sem snýr alltaf frá jörðu. Þetta vita allir sem vilja vita það.

Heill þér mikli Kim Jong-un, og til hamingju með afrekið.

[Helgi Armannsson (IP-tala skráð) 24.1.2014 kl. 21:38]

Þessi er rosaleg, hún er frá Norður Kóreu.

 http://www.youtube.com/watch?v=fQBPWv11izc

 myndin er dálitið löng en virkilega þess virði

[Jens Guð, 24.1.2014 kl. 22:25]

  .,  við erum að tala um nánast yfirnátturulegar verur í N-Kóreu. 

[Jens Guð, 24.1.2014 kl. 22:26]

  Helgi,  takk fyrir þetta.  Þetta er svo löng mynd að ég verð að finna mér góðan tíma til að horfa á hana.