Ódýrasta heimsreisan II

  Í fyrradag benti ég ykkur á leið til að komast í heimsreisu fyrir aðeins brot af því sem hefðbundin aðferð kostar í beinhörðum pengingum.  Uppskriftina má sjá með því að smella á eftirfarandi slóð:  http://jensgud.blog.is/blog/jensgud/entry/1360942/ .  Ferðin hófst í Evrópu.  Drífum okkur þá til Ástralíu.  Til þess þarf að komast yfir mauk sem heitir Vegemite.  Ég veit ekki hvort að það fæst hérlendis.  Ef ekki er áreiðanlega hægt að kaupa eina krukku fyrir lítinn pening í gegnum einhverja póstverslun.  Vegemite má til að mynda finna á fésbók.  Vegemite er smurt á ristað brauð.  Með því er drukkið te og hlustað á AC/DC á meðan.  Þar með ertu í Ástralíu.

 

  Næst er það Ameríka.  Byrjum á Grænlandi.  Þar er það dökkt brauð úr rúgi.  Heldur ljósara en íslenska rúgbrauðið.  Á það er sett smjör og salami sneiðar.  Á aðra brauðsneið er settur smurostur.  Þessar vörur eru innfluttar frá Danmörku.  Algengt er að mjólkurglas sé drukkið með og fylgt eftir með frekar bragðdaufu kaffi.  Meðfram hljómar hljómsveitin Inneruulat. 

 

  Frá Grænlandi liggur leið til Kanada.  Tökum einföldu útgáfuna (sleppum djúpsteiktu hálfmánunum sem súrkáli, kartöflum, ávöxtum og kjöti.  Þeir eru hvort sem er bara til spari).  Einfalda hversdagsútgáfan samanstendur af eggjahræru,  litlum pylsum (sausage),  ristuðu franskbrauði, beikoni og djúpsteiktum kartöflukökum sem kallast hash brown.  Þær eru lagaðar úr stöppuðum soðnum kartöflum og formaðar í litlar kökur. 

  Til gamans má geta að lengi vel var í Keflavík (eða Njarðvík) veitingastaður í húsi Skeljungs þar sem nú er verslunarmiðstöð Hagkaups,  Bónus og fleiri verslana.  Þar var borðið upp á hash browns með mat.  Á tímabili var ég með nokkur skrautskriftarnámskeið í Keflavík.  Á leið minni til kennslu snæddi ég á þessum veitingastað.  Bað alltaf um hasskökur með matnum (og átti við hash browns).  Einn daginn sagði konan sem rak staðinn eitthvað á þessa leið:  "Þetta er alveg ferlegt að þú kallir hash browns hasskökur.  Ég var að afgreiða fólk hér og varð á í hugsunarleysi að spyrja hvort það vildi franskar eða hasskökur með matnum.  Þegar fólkið varð undarlegt á svipinn áttaði ég mig á því hvað það hljómaði illa að kalla hash browns hasskökur."

  Þetta var útúrdúr.  En með kanadískum morgunverði er af nógu að taka í kanadískri músík.

   

  Frá Kanada er stutt til Bandaríkjanna.  Einkennandi þar eru svokallaðar bandarískar pönnukökur.  Þær eru það sem við köllum lummur.  Litlar, þykkar og sætar pönnusteiktar lummur.  Ofan á þær nýsteiktar er sett stórt smjörstykki sem bráðnar yfir þær.  Síðan er sýrópi hellt yfir í svo miklu magni að það flýtur yfir lummurnar og út á diskinn.  Á allra síðustu árum er vinsælt að hafa súkkulaðibita í lummunum. 

  

.   

Athugasemdir

[Stefán (IP-tala skráð) 6.3.2014 kl. 08:34]

Kíkjum við í Skagafirði, þar sem Skagfirska efnahagssvæðið grasserar auðvitað í frummynd sinni, þó að nú stjórni það reyndar öllu Íslandi og utanríkisstefnunni þá alveg sérstaklega. Mér skilst að ekkert fari þar á diska fólks nema að það sé frá Kaupfélagi Skagfirðinga og frá skagfirskum bændum sem Þórólfur kaupfélagsstjóri á og gerir út að gamalli sovéskri fyrirmynd. Á diskana fer súrt slátur, hrútspungar, taðreykt hangikjöt og heimaræktaðar kartöflur. Mjólkurmetið er auðvitað eingöngu frá KS, enda er þetta líklega eina sveitarfélagið á landinu sem hefur tekist að halda Bónus og Hagkaup utan við sitt efnahagssvæði, þó svo að Hagkaup eigi vissulega rætur sínar að rekja til Skagafjarðar. Yfir borðhaldinu fer fólk svo með borðbænir og þakkar Þórólfi kaupfélagsstjóra að Norður-Kóreaskri fyrirmynd og þakkar honum fyrir hvern þann dag sem það fær að tóra og þjóna honum og sptjátrungum hans.     

[Ásthildur Cesil Þórðardóttir, 6.3.2014 kl. 11:27]

Skemtileg ferðasaga Jens, það er virkilega gaman að ferðast svona og kynnast hinum ýmsu matarháttum þjóða og hlusta á góða músik.

[Jens Guð, 6.3.2014 kl. 22:27]

  Stefán,  þetta er góð greining á skagfirska efnahagssvæðinu. 

[Jens Guð, 6.3.2014 kl. 22:27]

  Ásthildur Cesil,  takk fyrir það.