Hóta að sprengja jólatré í S-Kóreu í loft upp

  Í Suður-Kóreu hefur verið hafist handa við að reisa 30 feta hátt jólatré á stórri hæð skammt frá landamærum Kóreu-ríkjanna. Það er reyndar dálítið villandi að kalla fyrirbærið jólatré.  Þetta er stálgrindarturn sem verður þakinn ljósaseríum,  ljósastjörnum og allskonar.  Ljósin verða tendruð 23. desember og lýsa í tvær vikur.

  Yfirvöld í N-Kóreu eru æf af reiði yfir þessu jólaskrauti.  Þau skilgreina það sem ósvífna og grófa sálræna ögrun í sinn garð.  Ekki vegna þess hvað jólaskrautið er ljótt heldur af því að augljóslega sé verið að hæðast að helsta stolti N-Kóreu,  ljósaturni sem stendur þarna í mílu fjarlægð.

  Yfirvöld í N-Kóreu hóta því að ef ekki verði þegar í stað hætt við jólaskrautið þá sé þeim nauðugur einn kostur að verja æru sína með því að sprengja það í loft upp.  

  Þau taka það fram að þetta hafi ekkert að gera með trúarbrögð.  Það er að segja að á toppi jólaskrautsins verði kross (í stað kyndilloga í n-kóreska ljósaturninum).  Né heldur að jólaskrautið tengist jólunum, rótgróinni ásatrúarhátíð sem síðar fleiri trúarhópar samfagna.  

  Í N-Kóreu er haldið upp á jólin. Að vísu á öðrum forsendum. 24. desember er haldið upp á fæðingardag mömmu Kim Jong Il.  Pabbi hans er eilífðarleiðtogi ríkisins.  Engu breytti um þá stöðu er hann andaðist á gamals aldri fyrir einhverjum áratugum.  Hann heldur ennþá styrkum höndum um stjórnartaumana.  Kim Jong Il hljóp undir bagga með föður sínum eftir andlátið í erfiðustu verkefnum.  Svo hart gekk Kim Jong Il fram í að liðsinna pabbanum að hann sprakk vegna vinnuálags fyrir nokkrum árum.  Hann bugaðist af vinnu og dó.  Ekki einu sinni daglegt og gríðarlega mikið koníakssötur í bland við bjórþamb tókst að slá á vinnusemina.  Og það þótt að hann tætti jafnan af sér hvert kvöld öll föt eftir að koníakið fór að hrífa.

  Í kjölfar afmælishátíðar mömmu Kim Jong Il fylgir frídagur vegna stjórnarskrárafmælis N-Kóreu.        

 

  

Athugasemdir

[Stefán (IP-tala skráð) 11.12.2014 kl. 08:05]

Æi hvað þetta lið þarna í Norður Kóreu minnir eitthvað á Framsóknarflokkinn - Sauðshátturinn er allavega sá sami. 

[Eyjólfur Jónsson, 11.12.2014 kl. 17:48]

Skammastu  þín, svo nautheimskir eru þeir nú ekki

[Jens Guð, 11.12.2014 kl. 19:57]

 Stefán,  það er einhver samhljómur.

[Jens Guð, 11.12.2014 kl. 19:57]

  Eyjólfur,  hvorir eru ekki svo nautheimskir?

[Stefán (IP-tala skráð) 12.12.2014 kl. 08:14]

Jens, Eyjólfur á örugglega við Norður-Kóreu menn, að þeir séu ekki jafn nautheimskir og framsóknarmenn.