Krakkar redda sér

  Þegar ég var í svokölluðum gaggó um 1970 í Steinstaðaskóla í Lýtingsstaðahreppi í Skagafirði þá þótti mér ekki ástæða til að taka námið hátíðlega.  Þetta var einhvernvegin þannig að fyrst var maður í barnaskóla. Sennilega til 12 ára aldurs eða svo.  Síðan tóku við 1. og 2. bekkur í gaggó.  Þar á eftir 3. og 4. bekkur í gaggó.  Þá færði ég mig yfir til Laugarvatns.  

  Í Steinsstaðaskóla var kenndur reikningur.  Ég sá ekki ástæðu til að læra hann.  Ég hafði ákveðið að verða myndlistamaður.  Sem ég síðar varð.  Stundaði nám í Myndlista- og handíðaskóla Íslands.  Útskrifaðist þaðan sem grafískur hönnuður og vann við fagið til fjölda ára.

  Nema hvað.  Vegna þess að ég taldi tímasóun að læra reikning þá sleppti ég því.  Fyrir bragðið féll ég í reikningi þegar útskrifa átti mig úr 2. bekk í gaggó.  Það truflaði ekki mikið tilveruna.  Ég fékk að taka reikningsprófið upp á nýtt. Þetta kallaðist samræmt próf.  Allir sem féllu á reikningsprófi fengu nýtt próf. Það var sent frá Menntamálaráðuneytinu.  Nóttina fyrir nýja prófið braust ég inn á skólastjóraskrifstofuna.  Það var ekkert erfitt.  Á þeim tíma þurfti aðeins hárspennu til að opna læsingar (þetta var að vísu aðeins flóknara.  Það þurfti að fara um fleiri og erfiðari dyr.  En ég geri hér ekki fleiri samseka).  Ég fann prófið og tók ljósrit af því.  Um nóttina fékk ég reikningsglöggan skólafélaga til að reikna út fyrir mig dæmin.  Gætti þess að hafa útreikninga þannig að ég næði lágmarkseinkunn. Að mig minnir 5,5.  Það gekk eftir.  Ég náði útskrift.  Það hefur aldrei háð mér að kunna ekki reikning umfram plús, mínus, margföldun og deilingu.  Þar fyrir utan var það góð skemmtun að svindla á reikningsprófinu. Og reyndar á fleiri prófum síðan.  En það er önnur saga.  

  Þetta er annað af þeim tveimur jólalögum sem skoruðu hæst í jólalagakeppni Rásar 2 í ár.  Gleðisveitin Döðlurnar fer á kostum:  

  

   

Komust yfir lykilorð og svindluðu

Athugasemdir

[Ásthildur Cesil Þórðardóttir, 20.12.2014 kl. 11:05]

Æyla ekki að segja neitt hér Jens, hehehe..

[Sigurður I B Guðmundsson, 20.12.2014 kl. 21:20]

Ekki heldur ég!!!

[Stefán (IP-tala skráð) 22.12.2014 kl. 12:11]

Maður heyrir í fréttum að svona prófsvindl viðgangist helst í Versló í dag.

[Ásthildur Cesil Þórðardóttir, 22.12.2014 kl. 13:31]

Tvíburarnir á Grund í Eyjafirði tóku prófin hvor fyrir annann, þar sem annar var færari í reikningi og hinn í tungumálum.  Það hefði aldrei komist upp að því að sagt er nema af því að þeir sögðu frá því sjálfir og gerðu grín að.