Jólagjafaklúður

 

   Ég fagnaði vetrarsólstöðum (jólum,  hátíð ljóss og friðar og áramót í Dublin á Írlandi.  Kúplaði mig alveg út af skagfirska efnahagsvæðinu.  Var ekki í neinu tölvusambandi.  Hafði það gott í sólinni og góða veðrinu í Dublin.  Sötraði Guinness bjór á kvöldin.  Hann er ótrúlega bragðgóður ferskur úr krana.  Froðan er sælgæti.  Pöbba-stemmningin er frábær.  Á sama tíma og pöbbum fækkar á Englandi þá fjölgar þeim á Írlandi.  Maður sest við borð og svo koma aðrir að borðinu.  Þeir byrja strax að spjalla eftir að hafa sagt "skál!" eða "How are you?".  Þetta er vinalegt samfélag.

  Víða er "lifandi" tónlist. Hljómsveitir sem spila þessa vel þekktu pöbba-söngva:  "Whisky in the Jar",  "Dirty Old Town" og svo framvegis. Einhver sagði mér að pöbb væri stytting á "public house" (samkomuhús).  

  Skoðanakönnun leiddi í ljós að helmingur jólagjafa á Írlandi missir marks.  Kannski er það líka svo á Íslandi.  Og þó.  Óvinsælustu jólagjafirnar á Írlandi eru jólaundirföt og ilmvötn. 60% írskra kvenna segjast ekki nota ilmvatn sem þær fá í jólagjöf.  Þær skilgreina ilmvatn sem "verstu" jólagjöfina.  25% þeirra segjast ekki nota baðherbergisvörur sem þær fá í jólagjöf.  Þessar gjafir fara bara í ruslið.  Eða eru endurnýttar á næsta ári sem jólagjöf til annarra.

 40% írskra karlmanna nota aldrei jólasokka sem þeir fá í jólagjöf. 

    

Athugasemdir

[Stefán (IP-tala skráð) 6.1.2015 kl. 11:05]

Það skeði m.a.á skagfirska efnahagssvæðinu á meðan þú dvaldir í Dublin, að skagfirska framsóknar-efnahagssvæðið yfirtók DV og gerði það ólæsilegt með öllu.

[Ásthildur Cesil Þórðardóttir, 6.1.2015 kl. 14:35]

Ójá ég hef verið á írskum pöbbum og drukkið Guinnes, algjörlega frábært að fá hann svona ferskan, fólkið kom sjálft með allskonar hljóðfæri og svo var sungið, og margir settust saman við stór hringlaga borð, svo var alltaf keyptur "rúnturinn", ég var komin með mörg glös fyrir framan mig í restina, því ég hafði engan veginn við að drekka það sem fyrir mig var borið.  Já tek undir með þér Jens írskir pöbbar eru dásemdin ein. 

[Jens Guð, 6.1.2015 kl. 22:30]

  Stefán,  ég sé að það er mikil umræða um þetta á Fésbók.  

[Jens Guð, 6.1.2015 kl. 22:37]

  Ásthildur Cesil,  ég var áður búinn að smakka Guinness úr krana á Íslandi.  Einnig úr dós.  En þótti lítið varið í drykkinn.  Hinsvegar er þetta eins og allt annar drykkur ferskur úr krana í Dublin.  Það er eins og bragðgæðin tapi sér hratt.    

[Ásthildur Cesil Þórðardóttir, 7.1.2015 kl. 00:35]

Já sammála, það er bara ótrúlegur mismunur á að drekka guinnseinn beint úr krana frá framleiðslunni eða kaupa hann í ríkinu. 

[Jens Guð, 7.1.2015 kl. 23:27]

  Ásthildur Cesil,  þannig er það einmitt.