Smásaga um fárveikan mann

  Jón á Hrakhólum vaknar með erfiðismunum.  Hann langar ekkert til að vakna.  En hann kemst ekki hjá því.  Það er líkast því að sleggja lemji höfuð hans út í eitt.  Hver taug í höfði hans er eins og lúbarin.  Þessu fylgir ógleði.  Hann staulast fram á klósett og ælir eins og múkki.  Það slær ekkert á þrautir líkamans.  Beinverkir,  kaldur sviti og kvalirnar leggjast á eitt.  

  Jón skríður fram úr bælinu og hringir á bíl.  Hann skríður sárkvalinn á fjórum fótum til móts við bílinn.  Bíllinn reynist vera stór vörubíll.  

  Bílstjórinn er neikvæður.  Hann segist ekki vera leigubíll.  Jón veit það.  Enginn bilstjóri er leigubíll.  Engin manneskja er bíll.  Jón nær að tala hann til og lætur skutla sér á Slysavarðstofuna.  Þar tekur við löng bið.  Loks kemur röð að Jóni.

  Læknirinn tekur vel á móti Jóni.  Sendir hann í rannsóknir.  Seint og síðar meir er hann kallaður upp.  Læknirinn tilkynnir:  "Það eina sem er að þér er að það mælist mjög hátt hlutfall af áfengi í blóðprufu þinni.  Hvaða áfengi ertu að drekka þessa dagana?  Bjór?  Brennivín?  Whiský?  Vodka?"

  Jón svarar ekki strax.  Veltir niðurstöðunni fyrir sér í dálitla stund.  Svo svarar hann hikandi:  "Mér finnst þetta vera full snemma dags fyrir minn smekk.  En fyrst að læknirinn býður þá þigg ég hvort heldur sem er whiský eða vodka."

-------------------------

 

Fleiri smásögur: hér   

 

Athugasemdir

[Stefán (IP-tala skráð) 23.1.2015 kl. 08:48]

Já, læknar ættu svo sannarlega að hafa efni á því í dag að bjóða fólki sjúss. ASÍ býður fólki bara að lepja dauðann úr skel.

[Ásthildur Cesil Þórðardóttir, 23.1.2015 kl. 12:59]

Hahahaha...

[Jens Guð, 26.1.2015 kl. 21:01]

  Stefán,  eru ekki einhverjar kjarakröfur í gangi núna hjá ASÍ?

[Jens Guð, 26.1.2015 kl. 21:01]

Ásthildur Cesil,  takk fyrir innlitið.