Þess vegna er ævilengd karla töluvert styttri en kvenna

  Íslenskar konur lifa allra kerlinga lengst.  Ævilengd karla er töluvert styttri.  Þeir eru áhættusæknir.  Sem krakki gerðum við strákarnir tilraunir með að búa til sprengjur og eitthvað svoleiðis.  Eftir á að hyggja var um glannaskap að ræða.  Lítið mátti út af bera til að illa færi. Fjórtán ára skaut ég skólabróðir minn,  Jóa á Korná,  með kindabyssu.  Ég fjarlægði hluta af púðrinu úr skotinu til að hann myndi aðeins rotast.  Sem gekk eftir.  Ég hef ekki þekkingu á því hvort að um heppni var að ræða að ekki fór verr eða réttan útreikning.

  Á gamals aldri hrýs mér hugur við að rifja upp glannaakstur á unglingsárum.  Það var látið reyna á hvað hægt væri að keyra hratt á Keflavíkurveginum og fleiri og verri vegum.  Ég man ekki hvort að metið var 180 km hraði eða eitthvað annað. 

  Klifur í byggingum og allskonar einkenndust af áhættu.  Einnig að laumast til að "teika" bíla við ýmsar aðstæður.  Og svo framvegis.  Strákar á öllum aldri halda að þeir séu ódauðlegir.  

 

.   

Athugasemdir

[Hrólfur Þ Hraundal, 1.2.2015 kl. 22:23]

Ég var líka á Keflavíkurveginum innan úr Engidal og suður eða vestur fyrir kirkjugarðinn við vegin upp í Kaldsársel,  og svo til baka aftur.

Gamlir Fordar, Doddsar  Móar, Pontijakar og Bjúkkar enn og einn Pakkard, Stúdibaker  og Bens en alltaf var það svo að Fordarnir voru röskastir af stað en stóru þungu vélarnarnar drógu þá uppi á loka sprettinum, en Bensarnir með sínar litlu vélar þurftu lengri braut.  Hemi Chryslerar voru ósigrandi.       

[Hrólfur Þ Hraundal, 1.2.2015 kl. 22:34]

En að teika Hafnafjarðar strætó frá Hafnarfjarðarbíói  og upp á Hraunsholt, það var skelving sem ekki var hægt að sleppa á áttatíu til hundrað og með hraunið á báða vegu og umferð á móti.  Reyndi það aldrei aftur.

[Jens Guð, 2.2.2015 kl. 21:00]

Takk fyrir innleggið.