Egg og beikon og svívirðileg verðlagning

 

 

 

 

 

 

 

 

 

  Um margra ára skeið var veitingastaður í Ármúla 7,  Vitaborgarinn. Þar fékk ég mér stundum egg og beikon.  Síðast þegar ég gerði mér þess háttar erindi þangað þá var ég upplýstur um að þarna væri kominn nýr veitingastaður,  Joe´s Diner.  Á matseðlinum var ekki lengur "egg og beikon".  

  Ungur afgreiðslumaður rétti mér matseðil Joe´s Diner. Ég renndi augum yfir hann.  En sagði dapur á svip að þar væri ekkert sem mig langaði í.  

  Afgreiðslumaðurinn sagðist harma það.  En fyrst að ég hafi spurt um egg og beikon þá væri svo sem hægt að græja svoleiðis.  Þeir væru hvort sem er að selja hamborgara með beikoni og eggi.  Það væri ekki vandamál að afgreiða egg og beikon án hamborgara.  "Hvað viltu margar beikonsneiðar?" spurði hann.  

  Ég:  "Á Vitaborgaranum voru þær 12"

  Afgreiðsludrengurinn:  "Eitt eða tvö egg?"

  Ég bað um tvö egg.  Drengurinn sagði:  "Ég veit ekki hvernig ég á að verðleggja þetta.  Hvað rukkaði Vitabarinn fyrir þetta?"  

  Mig minnti að það hafi verið um 800 kall.  Jafnframt lét ég þess getið að þar hafi einnig fylgt með ristaðar brauðsneiðar og smjör.  En ég hefði engan áhuga á því meðlæti.  

  Afgreiðslumaðurinn stakk upp á 600 kalli.  Þetta var til fyrirmyndar.   

  Anna Margrét Valgeirsdóttir skrifaði fésbókarfærslu um öðru vísi afgreiðslu í Herjólfi á eggi og beikoni. Vegna fæðuofnæmis gat hún ekki pantað sér neitt af matseðlinum.  Hún bað um að vikið væri frá matseðlinum og snúið upp á egg og beikon.  Því var mætt með afgreiðslu á hamborgara án brauðs og án hamborgara.  En með eggi og beikoni.  Fyrir þetta var hún rukkuð um 200 kall fyrir beikon + 200 kall fyrir egg + 1490 fyrir hamborgara.  Hamborgara sem var ekki með í pakkanum.  En egg (tvö) og beikon (sex sneiðar) kostaði 1890 kall.  Fyrir sömu upphæð er hægt að fá nokkuð veglega máltíð á þokkalegu veitingahúsi.  Til að mynda bjóða mörg asísk veitingahús upp á glæsilegt hlaðborð fyrir mun lægri upphæð.     

  Fyrir ofan er mynd sem Anna Margrét tók af 1890 kr. beikoninu og eggi.  Ef smellt er á myndina þá stækkar hún og kvittunin verður læsileg.  

  

Athugasemdir

[Stefán (IP-tala skráð) 11.2.2015 kl. 08:26]

Herjólfur er nú líka svolítið óhefðbundin fleyta, sem siglir sjaldan og þá sjaldan að fleytan kemst upp að meginlandinu, er um algjörar áhættuferðir að ræða, þar sem boðið er upp á adrelínkikk af bestu gerð í dýrustu og misheppnuðustu höfn landsins. Verðlagning um borð í Herjólfi er því eðlilega ( ef eitthvað er eðlilegt þarna um borð ) í hæstu hæðum og líka gæti maturinn verið orðinn gamall loksins þegar hægt er að elda hann og bætast því hugsanlega vextir og vaxtavextir ofan á.   

[Erla Magna Alexandersdóttir, 11.2.2015 kl. 20:22]

OJJJJJJJJJJJJJJJJJJJ !

[Jens Guð, 11.2.2015 kl. 21:19]

Stefán,  það er margt skrítið við Herjólf.

[Jens Guð, 11.2.2015 kl. 21:20]

Erla Magna,  egg og beikon er ágætt - ef verðlagi er stillt í hóf.

[Jóhann Kristinsson, 11.2.2015 kl. 22:51]

Bacon og egg er mjög gott fyrir hjartað og ég tala nú ekki um lyktarskyn og bragðlaukana.

Kveðja frá Houston