Gríðarlegt úrval af töfralausnum

 

 

 

 

 

 

 

 

 

 

 

  Það hefur aldrei skort framboð af töfralausnum við öllum kvillum.  Það eru góðu fréttirnar.  Sumar lausnir eru meira að segja nánast ókeypis.  Í lok síðustu aldar læknaði svokallaður Kákasussveppur nánast öll mein.  Fólk gaf hvert öðru afleggjara af sveppnum.  Hann framleiddi drykk með þessum töfraeiginleikum.  Þegar best lét var sveppurinn ræktaður á öðru hverju heimili á landinu.

  Svo,  eins og hendi væri veifað,  hvarf sveppurinn úr öllum hýbýlum.  Þess í stað fékk fólk sér töfraarmband.  Það læknaði flesta kvilla.  Armbandið hafði það fram yfir sveppinn að vera fallegt.  Það var skart um leið og það kvað niður hausverk,  mígreni,  vöðvagigt og hvað sem fólki datt í hug.

  Slípaðir steinar fylla fólk orku.  Þess vegna eru þeir kallaðir orkusteinar.  Steinarnir eru geymdir í buxnavasanum.  Þeir hafa það umfram armbandið að vernda fólk að auki gegn illum öflum.  Jafnvel gluggapósti.  Upplagt er að hafa lukkustein í fleiri vösum.  Það fimmfaldar líkur á að vinna í bingói.  

  Löngum gafst vel að verjast kvefi með því að fara í ískalt bað að morgni.  Eftir bað var líkaminn þurrkaður vel og rækilega með tyrknesku handklæði.  Vitað er um eitt dæmi þess að einstaklingur kvefaðist þrátt fyrir þetta.  Síðar kom í ljós að hann hafði fyrir misskilning þurrkað sér með handklæði frá þeim hluta Kýpur sem heyrir ekki undir Tyrkland. 

  Um hríð fór Sálarrannsóknarfélagið með hundruð veikra Íslendinga til Filippseyja.  Þar skáru töfralæknar þá upp með berum höndum og fjarlægðu krabbamein,  veik líffæri og allskonar.  Draslið sem fjarlægt var reyndist við nánari skoðun eiga uppruna í svínum og kálfum.  Það er varasamt að vera með líffæri úr þessum skepnum.  

  Ekki má gleyma pendúlum og andaglasi við sjúkdómsgreiningu.  

  Hér má sjá árangursríka lausn við höfuðverk:

Kastljós „þvældi veiku fólki um bæinn“

Athugasemdir

[Stefán (IP-tala skráð) 4.3.2015 kl. 13:24]

Snákaolíusölumenn, grasalæknar, kuklarar, heilarar eða hvað þetta fólk er nú kallað, sem þykist hafa lausnir á öllum vanda og níðist svo bara á fárveiku eða jafnvel dauðvona fólki í taumlausri græðgi og eða geðveiki.

[Bjarni Gunnlaugur (IP-tala skráð) 4.3.2015 kl. 17:37]

Þetta myndband vekur snarlega upp tvær spurningar:

1. Hvert var hlutverk bakveika aðstoðarmannsins?

2. Skyldi sjúklingnum hafa batnað hausverkurinn?

[Sigurður K Hjaltested (IP-tala skráð) 4.3.2015 kl. 18:15]

Það mætti lækna marga stjórnmálamenn með þessari

aðferð..

[Hörður Þ. Karlsson (IP-tala skráð) 5.3.2015 kl. 04:44]

Sigurður K.og Jens; þessi aðferð dugar engann veginn á stjórnmálamenn (og konur), þar sem þetta er lækning við HAUSverki, þá er nauðsynlegt að hafa eitthvað þarna uppi í toppstykkinu til að verkja í...

Þetta svínvirkar hinsvegar á okkur starfsmenn á plani. Ég þekki þetta vel frá ferðum mínum um Afríku undanfarin ár og í raun nauðsynlegt að hafa aðgang að svona lækningum þar sem magnyl finnst barasta ekki

Kveðja sunnan úr álfum

[Stefán (IP-tala skráð) 5.3.2015 kl. 10:24]

Hvað t.d. með alla þessa rándýru blómadropa sem hómópatar eru að selja, eru þeir að gera einhverjum eitthvað gagn, eða hómópatarnir  ?

[Jens Guð, 6.3.2015 kl. 21:14]

  Stefán,  það er ekki til fyrirmyndar að pranga inn á dauðvona fólk snákaolíu eða kranavatni.  

[Jens Guð, 6.3.2015 kl. 21:16]

  Bjarni,  ég held að sjúklingurinn hafi fengið "öðruvísi" hausverk eftir þessa töfralausn.  

[Jens Guð, 6.3.2015 kl. 21:17]

Sigurður,  góður!  

[Jens Guð, 6.3.2015 kl. 21:18]

Hörður,  þú hittir naglann á höfuðið!

[Jens Guð, 6.3.2015 kl. 21:19]

Stefán (#5),  þetta er allt della sem stenst enga skoðun.