Gróf vörusvik

 

  Fyrst skal tekið fram að ég veit sjálfur lítið sem ekkert um málið.  Þannig er að kunningi minn hafði samband við mig.  Hann var í mikilli geðshræringu og miður sín.  Eiginlega nánast í taugaáfalli og ekki í jafnvægi.  Langt frá því.

  Á barns- og unglingsárum fékk hann mikið dálæti á breskri hljómsveit,  Smokie.  Söngvarinn og aðal lagahöfundurinn,  Chris Norman, var í sérstöku uppáhaldi.  Margir fleiri kunnu vel við Smokie.  Hljómsveitin átti fjölda vinsælla laga á áttunda áratugnum.

  Svo týndist Smokie og var eins og tröllum gefin.  Féll í gleymskunnar dá.  Pönkið kom,  nýbylgjan,  rapp,  tölvupopp,  grugg,  nu-metal og allskonar

  Um liðna helgi tróð Smokie óvænt upp á hljómleikum í Reykjavík.  Að vísu með aðdraganda en óvænt að því leyti að hljótt hafði verið um hana svo lengi sem yngri menn muna.

  Kunningi minn sá sér leik á borði.  Nú var lag að endurupplifa bernskuna,  hella sér í nostalklígju og sjá og heyra goðið Chris Norman á sviði.

  Fljótlega runnu á vininn tvær grímur.  Hann hélt sig þekkja alla liðsmenn Smokie í útliti.  Svo og söngstíl Chris og músíkstíl hinna í hljómsveitinni.  En þetta var ekki alvöru Smokie.  Þetta var dæmigert krákuband (cover/tribute).  Enginn Chris Norman.  Ekki sólógítarleikarinn Alan Silson.  Ekki trommarinn Pete Spencer.  Kunninginn hafði keypt kött í sekknum. 

  Á sviðinu voru aðeins session menn og gamli Smokie bassaleikarinn.  Kunninginn sagði með grátstaf í kverkum:  "Þetta var eins og Bill Wyman kæmi með session lið og héldi hljómleika undir nafni The Rolling Stones!" 

  Wyman hefur reyndar haldið úti ágætri hljómsveit,  Rhythm Kings.  Sem samt vissulega er ekki The Rolling Stones.  En 1000 sinnum áheyrilegri en Smokie-leiðindin. 

Athugasemdir

[Sigurður I B Guðmundsson, 16.3.2015 kl. 21:04]

Svipað og þegar þeir Doug Clifford og Stu Cook ætluðu að slá í gegn sem "comeback" Creedenc Clearwater Revival en John Fogerty fór í mál við þá og vann það mál. Svo kom John sjálfur til Íslands og hélt enga smá tónleika i Laugardalshöll í sínu eigin nafni en hann var og er hinn eini sanni CCR.

[Jens Guð, 16.3.2015 kl. 21:57]

  Sigurður I B,  John Fogerty var CCR.  En hvað áttu hinir að gera þegar hann var ekki lengur með í bandinu?  Þeir reyndu að sprikla undir CCR flagginu.  Í hans óþökk.  

  Til gamans má geta að John Fogerty lenti sömuleiðis í vandræðum með útgáfufyrirtækið sem átti útgáfurétt á tónlist CCR.  Hann var fyrsti og eini tónlistarmaðurinn sem var dreginn fyrir dómstóla fyrir að stela lagi frá sjálfum sér.  

  Um tíma störfuðu þrjár hljómsveitir undir nafninu The Byrds.  Ein þeirra hélt hljómleika á Broadway í Ármúla.  Allar þrjár samt án aðal kallanna.  Þetta var allt snúið dæmi vegna þess að af 11 liðsmönnum The Byrds voru 6 dánir.  Samt var The Byrds alltaf fyrst og fremst Roger McGuinn.  

[Ásthildur Cesil Þórðardóttir, 17.3.2015 kl. 00:56]

Suzy Quarto ein af mínum uppáhalds, og hve oft tókum við ekki þetta lag á böllum í denn. og líka Creedenc clearwater revival, nú er maður í nostalgíukasti. 

[Stefán (IP-tala skráð) 17.3.2015 kl. 14:06]

Tónlist CCR var mikil snilld sem lifir, en Smokie var hallærislegt band sem líklega fáir vilja vita af í dag.

[Jens Guð, 17.3.2015 kl. 19:37]

 Ásthildur Cesil,  ég á plötur með Suzy.  Hún hefur átt hressilega spretti;  rennir sér auðveldlega í rifinn öskursöng þegar sá gállinn er á henni,  spilar ágætlega á bassa og er töffari.

 Ég á allar plöturnar með CCR og einnig allar sólóplötur John(s) fogeerty(s).  Það voru nokkuð mörg CCR lög á prógramminu hjá hljómsveitunum Trico og Frostmarki sem ég var í á unglingsárum.  Í fyrra áttum við í Trico 45 ára re-union og rykið var dustað af CCR lögum.

[Jens Guð, 17.3.2015 kl. 19:37]

  Stefán,  ég tek undir þetta.

[Ásthildur Cesil Þórðardóttir, 17.3.2015 kl. 21:57]

Já þetta fólk allt saman voru sannir töffarar. 

[Sindri Þór Hilmarsson (IP-tala skráð) 18.3.2015 kl. 19:02]

Chris Norman er enn að í mússík, reyndar nokkuð háður gömlu Smokie efni en er þó líka með nýtt og ferska stráka í kringum sig. Vilji menn fá Smokie nostalgíu í dag væri réttara að flytja þann hóp inn.

[Jens Guð, 18.3.2015 kl. 20:55]

 Ásthildur Cesil,  svo sannarlega.  

[Jens Guð, 18.3.2015 kl. 20:56]

Sindir Þór,  ég ætla að það sé rétt hjá þér.