Svona er PIN-númerum stolið og hve auðvelt er að verjast því. Ekki gefa vonda kallinum peningana þína!

  Mikill áróður er rekinn fyrir því að fólk leggi PIN-ið á minnið.  Allflestir nota greiðslukort í stað reiðufés.  Það er til að hagnaður bankanna sé viðunandi.  Þeir fá prósentur af hverri kortafærslu.  

  Gallinn við kortin og PIN-ið er hversu auðvelt er að stela númerinu og misnota.  Vondi kallinn gerir það.  Hann kaupir sér hitamyndavél í næstu Apple-búð;  festir hana á bakhlið iPhones síns.  Svo tekur hann mynd af takkaborði PIN-tækisins án þess að nokkur taki eftir.  Hitamyndavélin sýnir á hvaða tölustafi var ýtt af næsta kúnna á undan og í hvaða röð.

  Með sömu aðferð er hægt að komast yfir leyninúmer við inngöngudyr,  öryggishólfa og allskonar.

  Góðu fréttirnar eru að auðvelt er að verjast þessu.  Það er gert með því að villa um fyrir vonda kallinum.  Til að mynda með því að styðja á fleiri takka en þá sem hýsa leyninúmerið. Hamast á þeim hverjum á fætur öðrum.  Þá fær hitamyndavélin rangar upplýsingar.  

Athugasemdir

[Erlendur (IP-tala skráð) 26.5.2015 kl. 13:17]

Rétt er það að bankar fá greiðslu af notkun korta, það sem ég kalla hagkvæmisskatt, en okkur er náttúrulega í sjálfsvald sett hvort við notum þau, eða hvað?

[Stefán (IP-tala skráð) 26.5.2015 kl. 14:24]

Margt er nú gert fyrir þjófa og afætur, við sjáum t.d. hvernig þeim var raðað í æðstu stöður í bankakerfinu.

[Jens Guð, 26.5.2015 kl. 22:04]

  Erlendur,  enda velja flestir sjálfviljugir að fá sér greiðslukort.  Fólk vill styðja við bankana;  auðvelda þeim að hafa efni á því að gera vel við bankastjórana.  Bæði með milljóna króna mánaðarlauns svo og bílafríðindi og sitthvað fleira.

[Jens Guð, 26.5.2015 kl. 22:04]

Stefán,  þeir smala sér sjálfir í æðstu stöður.  Þar eru bestu launin.

[Stefán (IP-tala skráð) 27.5.2015 kl. 09:21]

Það sorglegasta og skaðlegasta á Íslandi í dag er að stjórnmálaflokkur með 8 % fylgi skuli stjórna öllu, enda er ástandið eftir því.

[Eyjólfur G Svavarsson, 27.5.2015 kl. 11:01]

Hefur þú lent í þessu, ég hef aldrei lent í svona og veit ekki um neinn. er það hitinn frá fingrinum eða myndast hiti frá rafmagni?

[Jens Guð, 27.5.2015 kl. 20:18]

Stefán,  það er von að allt sé í rugli.  Samkvæmt æðstu ráðamönnum er þjóðin veruleikafirrt.  

[Jens Guð, 27.5.2015 kl. 20:24]

Eyjólfur,  ég nota ekki kort.  Þetta er ný græja sem nemur varmann er fingurnir skilja eftir á takkaborðinu.  Þetta er sýnt í myndbandinu sem fylgir færslunni.     

[Tobbi (IP-tala skráð) 30.5.2015 kl. 09:53]

Hverju eru menn annars bættari þótt þeir finni út pin númer á korti ef þeir hafa ekki kortið sjálft?

[Jens Guð, 30.5.2015 kl. 16:51]

  Tobbi,  frá því að útgáfa á greiðslukortum hófst hefur verið auðvelt (fyrir vonda menn) að komast yfir kortanúmer.  Tölvurnar okkar eru fullar af njósnabúnaði sem leitar uppi kortaupplýsingar.  Þær ganga kaupum og sölum neðanjarðar. Það er heldur ekkert mál að taka mynd af kortinu.  Það hefur löngum verið hægt að afrita segulröndina. Það er jafn auðvelt og að drekka vatn að afrita segulröndina í gegnum fatnað og lokað veski.

  PIN-númer er vörn gegn þessu.  Án númersins hafa upplýsingarnar takmarkað notkunargildi í dag.

  Þegar vondi kallinn stendur fyrir aftan þig í biðröð getur hann núna með hitamyndavélinni náð mynd af kortinu eða afritað segulröndina og fullkomnað þjófnaðinn með því að mynda PIN-númerið.

  Möguleikarnir eru ótal fleiri.  Til að mynda hafa öryggismyndavélar verslana verið nýttar af vondu fólki til að ná kortaupplýsingum.  Ýmsum afritunarbúnaði hefur verið komið fyrir í hraðbönkum og svo framvegis.