Snýst þetta allt um fégræðgi?

 

  Í umræðunni um kjaraviðræður,  verkföll,  launakröfur,  skattabreytingar,  styttingu vinnuvikunnar,  hækkað matarverð,  magabólgur og djöflatertur hafa lægstu laun borið á góma.  Sumum hefur orðið tíðrætt um að ástæða sé til að hækka lægstu laun.  Jafnvel um einhverja þúsundkalla á næstu þremur árum.  

  Aðrir hafa brugðist hinir verstu við.  Þeirra viðhorf er það að hærri laun greidd ómenntuðum skófluskríl muni gera útaf við menntun í landinu.  Þá verði keppikefli allra að tilheyra hópi ómenntaða skrílsins. Það verði eftirsóknarverðasta takmark lífsins.

  Kannski er kenningin rétt.  Kannski sýnir enginn námi áhuga nema til þess að fá hærra kaup en ómenntaði skríllinn.  

  Þetta þarf að rannsaka.  Einkum vegna þess að margir eru svo vitlausir að þeir rjúka í annað nám en það sem skilar þeim síðar meir hæstu tekjum.  Einhverjir eru meira að segja svo vitlausir að þeir leggja á sig nám sem nýtist þeim lítið sem ekkert á vinnumarkaði.  Hvað þá að það skili þeim feitum launatékka.

  Getur verið að Kári Stefánsson hafi hangið í skólum áratugum saman einungis vegna þeirrar vissu að á endanum myndi hann fá góð laun?  Kannski hafði hann aldrei áhuga á taugalífræði og erfðarannsóknum.  Hvað veit ég.

  Þegar ég ungur settist á skólabekk í Myndlista- og handíðaskóla Íslands þá hafði ég ekki hugmynd um að vera rekinn áfram af löngun í hærri laun en þau sem ég fékk ómenntaður í Álverinu í Straumsvík.  Svo gekk það ekki einu sinni eftir.  Í heimsku minni hélt ég að skólagangan í MHÍ réðist af löngun til að læra skrautskrift,  olíumálun,  vatnslitun,  ljósmyndun,  myndskreytingu,  auglýsingateikningu og eitthvað svoleiðis bull. Nú veit ég betur.

 Fólki er ekki sjálfrátt.  Að minnsta kosti sumu fólki.  Það veit ekki af hverju það stundar nám í einhverju.  Það heldur að námið snúist um að fræðast um eitthvað sem viðkomandi hefur gríðarlegan huga á.  En svo í raun snýst þetta um fégræðgi:  Að komast á annan launataxta en ómenntaði skríllinn.

       

„Háskólahugtakið útþynnt“

Athugasemdir

[Ásthildur Cesil Þórðardóttir, 31.5.2015 kl. 19:48]

Sammála, og svo það sé alveg skýrt það er ekkert minna virði að moka skurðina en að vinna við skrifborðið.  Þetta er bara spurning um hvað hentar manni ekki satt?

[Jóhann Kristinsson, 31.5.2015 kl. 21:18]

Framboð og eftirspurn stjórnar launum, ef það er meiri eftirspurn eftir fólki að moka skurði heldur en möppudýr, þá fá þau sem grafa skurði hærra kaup.

Jens Guð, þú ert vel gefinn maður og getur þess vegna svarað spurningunni sjálfur.

[Jens Guð, 1.6.2015 kl. 11:14]

Ásthildur Cesil,  jú,  ég ætla það.

[Jens Guð, 1.6.2015 kl. 11:20]

  Jóhann,  það er skortur á leiksskólakennurum.  Það er offramboð á flugmönnum hérlendis.  Síðarnefndi hópurinn er með lágmark tvöfalt hærri laun.  Jafnvel þrefalt.  

  Launamunurinn ræðst af mörgu öðru en framboði og eftirspurn.  Til að mynda hver er viðsemjandinn.  Einnig hvernig ábyrgð starfsstétta er skilgreind.  Líka á hverjum verkföll þeirra bitna.  Og svo framvegis.  Og svo framvegis.