Vegir morðingja og aðstoðarmanna þeirra eru órannsakanlegir

  Bandarísk kona heitir Joyce Mitc-HELL.  Hún vann í fangelsi í Nýju-Jórvík.  Þar reyndi ofbeldisfullur morðingi að kyssa hana.  Hún brást ókvæða við og útvegaði honum þegar í stað allskonar tæki og tól til að brjóta sér leið út úr fangelsinu við annan morðingja.

 Eiginmaður hennar til 14 ára tekur þessu með jafnaðargeði.  Mestu skiptir að kella stundaði lítið sem ekkert kynlíf með morðingjunum.  Og ennþá minna kynlíf með öðrum föngum. Til að taka af allan vafa sór hún við líf sona þeirra að hún væri nánast óspjölluð jómfrú.  

  Kallinn hafði aldrei hugmynd um að kella hefði aðstoðað morðingjana tvo við að flýja úr fangelsinu.  Þeir eru enn í dag eftirlýstustu morðingjar Bandaríkjanna.  Ekki nóg með það.  Þeir eru einnig taldir vera ofbeldisfullir. 

 Eftir að kella var handtekin og játaði við yfirheyrslur að hafa aðstoðað morðingjana við flóttann runnu tvær grímur á kallinn.  Undir annarri grímunni renndi hann í grun um að kella væri viðriðin strok fanganna.  Undir hinni grímunni var hann hinsvegar pollrólegur vitandi það að kella virti hjónaband þeirra í hvívetna.  Leitun væri að jafn trygglyndri og heiðarlegri konu.  

  Eina ósvaraði spurningin í stöðunni sé:  "Hvar eru morðingjarnir?"

 

„Hvernig gat hún gert þetta?“

Athugasemdir

[Sigurður I B Guðmundsson, 24.6.2015 kl. 16:38]

Kellingin felur þá mjög líklega í kjallarnum heim hjá sér eða úti í bílskúr!!!

[Jens Guð, 24.6.2015 kl. 22:07]

  Sigurður I B,  þarna komstu með það.  Leitarflokkurinn hefur aðallega verið að leita í Kanada,  í mörg þúsund kílómetra fjarlægð frá fangelsinu.  Vitaskuld hefur hann ekkert fundið - og rennir það styrkri stoð undir kenninguna um kjallara kellu.