Hryðjuverkamenn aðhlátursefni í Færeyjum

25.7.2015 | 07:16

Hryðjuverkamenn aðhlátursefni í Færeyjum

Í júní komu liðsmenn hryðjuverkasamtakanna Sea Shepherd til Færeyja. Þeir komu á tveimur stórum skipum, Birgittu Bardot og Sam Simoni. Meðferðis voru nokkrir litlir spíttbátar (uppblásnar gúmmítuðrur með mótor). Erindið er að hindra hvalveiðar Færeyinga í sumar. Það hefur algjörlega misheppnast.

Fyrsta hvalvaða sumarsins var veidd síðla nætur fyrir framan trýnið á hrjótandi hryðjuverkamönnum. Þeir áttu að standa næturvakt. Í tíðindaleysi fyrri parts nætur kallaði draumalandið á þá og hafði betur. Ekkert hafði borið til tíðinda á þeim hálfa mánuði sem var liðinn frá komu SS til eyjanna. Kæruleysi var komið í mannskapinn.

Nú í vikubyrjun varð vart annarrar hvalvöðu. Þá tóku SS-liðar við sér. Mættu á svæðið á Sam Simoni, hentu út spíttbáti og ætluðu að bruna af stað og fæla vöðuna. Í sömu svifum handtók lögreglan þá tvo SS-liða sem í tuðrunni voru. Tuðran var gerð upptæk og fólkinu stungið í varðhald. Þá greip um sig ofsahræðsla hjá þeim sem eftir voru á Sam Simoni. Af ótta við að skipið yrði einnig gert upptækt var í angist sett á fullt stím alla leið til Hjaltlandseyja. Þar hefur skipið síðan verið í felum.

SS-liðar halda fram öðru. Þeir segja að skyndilegur flótti Sam Simonar - á sama augnabliki og spíttbátur var gerður upptækur og SS-liðar færðir í járn - eigi sér augljósa og einfalda skýringu: Skipstjórinn hafi einmitt á þessu andartaki fengið þá snjöllu hugmynd að sækja vistir til Hjaltlandseyja; fremur en fylgjast með einhverju sem skipti engu máli. Eins og til að mynda hvaladrápi.

Hitt skipið, Birgitta Bardot, dólaði úti fyrir færeyskum fjörðum. Í fyrradag urðu skipsverjar varir við stóra hvalvöðu. Í viðleitni til að kvikmynda hana og ljósmynda í návígi tókst ekki betur til en svo að vaðan lagði á flótta - beinustu leið upp í fjöru. Færeyingar brugðust við skjótt, ræstu sína mótorbáta og lokuðu marsvínunum (grind) leið úr fjörunni. Náðist þar að slátra hátt í 200 hvölum. Þökk sé aulahætti skipverja á Birgittu Bardot.

Í leiðinni voru fimm SS-liðar handteknir. Samtals hafa sjö SS-liðar verið sektaðir um hálfa milljón ísl. kr. hver og margvíslegur búnaður haldlagður.

Þegar konan sem fyrst var handtekin var færð fyrir dómara sór hún af sér öll tengsl við Sea Shepherd. Hún sagðist aldrei hafa heyrt á það fyrirbæri minnst. Hún væri aðeins óbreyttur ferðamaður á eigin vegum.

Klæðnaður hennar var merktur SS í bak og fyrir. Hún er formlega skráð sem skipverji á Sam Simoni. Fjöldi ljósmynda af henni er á heimasíðu SS. Hún hélt að saksóknari og dómari myndu ekki fatta þetta.

SS-liðar eru úr tengslum við raunveruleikann. Þeir lifa í fantasíuheimi. Lítið þarf til að ímyndunaraflið fari á flug. Þannig komu nokkrir þeirra auga á hnísu að leik á haffletinum. Skyndilega hvarf hún og sást ekki meir. SS-liðarnir sturluðust. Í örvæntingu hóuðu þeir í lögregluna og báðu um að dýralæknir yrði sendur á vettvang. Hnísan væri áreiðanlega slösuð. Hún hafi verið að biðja um hjálp á haffletinum en örmagnast. Þess vegna sæist ekkert til hennar lengur.

Í annað sinn varð á vegi SS-liða olíubrák á sjónum. Töldu þeir að um skemmdarverk væri að ræða. Óprúttnir aðilar væru að menga sjóinn til að drepa allt lífríki í honum. Löggan mætti á svæðið. Bletturinn reyndist innihalda innan við desílítra af olíu. Það þótti ekki vera nægilegt magn til að hefja rannsókn á málinu.

Ennþá taugaveiklaðri urðu SS-liðar er á vegi þeirra varð stór hvítur blettur á sjónum upp í fjöru. Töldu þeir fullvíst að þarna væri um gríðarmikið magn af eitri að ræða. Löggan kannaði málið. Í ljós kom að þetta var mjólkurblandað affallsvatn frá mjólkurbúi.

Margt fleira mætti upp telja sem valdið hefur SS-liðum óþarfa ofsakvíðakasti. Það þarf fátt til. Þeir höfðu meira að segja samband við lögregluna út af einni stakri bauju á hafi úti. Óttuðust að hún væri staðsetningarmerki fyrir eitthvað varhugavert sem lónaði undir henni. Kannski sprengju eða annað sem gæti valdið skipum SS tjóni. Löggan sinnti ekki því útkalli.

Meginflokkur: Matur og drykkur | Aukaflokkar: Lífstíll, Löggæsla, Stjórnmál og samfélag | Breytt 26.7.2015 kl. 09:33 | Facebook

Athugasemdir

Þessi gridardráp eru ógeðsleg og Færeyingum til skammar.

Helgi Jónsson (IP-tala skráð) 25.7.2015 kl. 16:29

Helgi, eins og svo margir aðrir hefur ekki minnstu glóru um hvað hann er að tala. Grindhvaladrápin eru með því "snyrtilegra", við aflífun dýra sem þekkist, Það er gengið mjög hreinlega til verks, til að gera "dauðstríð" skepnunnar sem allra styst. Það sem virðist helst fara fyrir brjóstið á "Náttúruverndar - Ayjatollunum" er hinn rauði litur á sjónum, sem óhjákvæmilega myndast og ekki er hægt að gera mikið við. Við getum borið Grindhvaladrápin saman við þegar stór hvalvaða syndir á land í Ástralíu.Þar birtast sjónvarpsmyndir um allan heim af "Náttúruverndar - Ayjatollum", sem reyna að halda lífinu í strönduðu hvölunum,sólahringum saman með því að hella yfir þá sjó. Smám saman drepast hvalirnir og "Náttúruverndar - Ayjatollarnir" ráfa grenjandi um ströndina og af þessu birtast mjög hjartnæmar myndir. Af þessum hundruðum hvala tekst kannski að koma tveim til þremur á flot aftur og þeir geta synt í burtu af veikum mætti. En hvalurinn er þannig gerður að utan um skinn hans er örfín "filma" sem verndar skinnið, en vanalega skemmist þessi "filma" svo mikið við strandið að hvalurinn er dauðadæmdur þegar hann siglir upp. Svo þessir hvalir sem er "bjargað" og komast á haf út, drepast fljótlega af sárum sínum. Í mínum huga eru, Grindhvaladráp Færeyinga MUN MANNÚÐLEGRI en það sem hér á undan er lýst...........

Jóhann Elíasson, 25.7.2015 kl. 17:44

Helgi, hann Jóhann svarar þessu ágætlega hér fyrir ofan. Ég er fæddur og uppalinn í sveit í útjaðri Hóla í Hjaltadal. Þar var töluvert um heimaslátrun. Ég vann öll mín unglingsár í Sláturhúsi Skagfirðinga á Sauðárkróki. Þar var lógað kindum, hestum og beljum. Skepnum sem bjuggu við misjafnar aðstæður alveg fram að slátrun. Grindhvalurinn er frjáls sinna ferða uns hann kemur upp í fjöru í Færeyjum. Hann er mænustunginn og veit varla af því. Kjötið er bragðgott.

Jens Guð, 25.7.2015 kl. 21:21

Jóhann, bestu þakkir fyrir þitt innlegg í umræðuna.

Jens Guð, 25.7.2015 kl. 21:22

þegar við vorum að alast upp Jens voru kindur reknar upp a vörubil svo svo maður með a pallinum til þess að passa að ekkert traedist undir samt var ekki lant að fara Sláturhús alstaðar nú er oldinn önnur og keyrt tímunum saman.samt er tad ekkert midad vid tad sem þekkist her i Astraliu þar sem kindur og beljur eru sett i skip i nokkra daga ,ég aetla nu bara að sleppa tvi að reina ad utskira hvernig er farid med kjúklinga og kalkúna allar tesar skepnur myndu ofunda kvalin eg held ad nafni minn Jónsson aetti bara ad eta grannmeti

Helgi Armannsson (IP-tala skráð) 26.7.2015 kl. 00:45

Þvílíkur skemmtilestur er þetta Jens minn hahahaha

Ásthildur Cesil Þórðardóttir, 26.7.2015 kl. 01:11

Þegar hvalurinn hefur verið alfriðaður, vantar þessum SS-liðum verkefni til að viðhalda sjálfum sér. Þá verða tekin fyrir, nautgripir, sauðfé, svín og hænsn uns ekkert má éta. Ekki einu sinni gras því þá étum við öll friðuðu dýrin út á gaddinn.

Axel Jóhann Hallgrímsson, 26.7.2015 kl. 13:04