Öðrum til viðvörunar

 

  Frökk og ósvífin dúfa gerði sér lítið fyrir og reyndi að smygla eiturlyfjum inn í Le Reforma fangelsi í Kosta Ríka.  Ekkert fer framhjá árvökulum augum lögreglunnar.  Síst af öllu eiturlyfjasmygl dúfna.  Hún var því snarlega snúin niður í jörðina af laganna vörðum.  Þar voru henni lesin réttindi sín og hún síðan handtekin,  sjálfri sér til niðurlægingar og háðungar.  

  Að öllu jöfnu hefði lögreglan ekki séð ástæðu til að greina fjölmiðlum frá málinu.  Hinsvegar getur hún ekki á sér setið og kýs að blása málið upp með myndbirtingu og öllu.  Fyrst og síðast öðrum dúfum til aðvörunar.  Skilaboðin eru skýr:  Svona gera dúfur ekki.  Að minnsta kosti ekki án afleiðinga.

  Eftir helgi verður dúfan færð fyrir dómara.  Hann mun ákveða hversu margra ára dvöl á bak við lás og slá bíður hennar.

  Á myndinni fyrir ofan má sjá hálft hundrað af þeim tæplega þúsund vel þjálfuðu og hugrökku lögreglumönnum sem handtóku dúfuna. 

Smygldúfa handtekin

Athugasemdir

[Sigurður I B Guðmundsson, 16.8.2015 kl. 19:46]

 Vonandi var þetta ekki Benjamín dúfa??

[Reykvíkingur (IP-tala skráð) 17.8.2015 kl. 09:24]

Engin eiturefni í kannabis og flokkast það því ekki undir orðskrípið eiturlyf. það gerir hinsvegar rettan í kjaftinum á þér...☺

[Snorri Hansson, 17.8.2015 kl. 11:57]

Við skulum vona að dúfan fái góðan lögfræðing.

[Tobbi (IP-tala skráð) 17.8.2015 kl. 17:32]

Er hægt að handtaka einhvern handalausan? En kannski voru laganna verðir þeir sem hendurnar höfðu?

[Jens Guð, 18.8.2015 kl. 06:48]

Sigurður I B,  vonandi ekki.  

[Jens Guð, 18.8.2015 kl. 06:49]

Reykvíkingur,  takk fyfir fróðleikinn.  Ég vissi ekki að súkkulaðiretta væri eiturlyf.  

[Jens Guð, 18.8.2015 kl. 06:50]

Snorri,  mér skilst að hún vilji verja sig sjálf.

[Jens Guð, 18.8.2015 kl. 06:53]

Tobbi,  ég legg út af frétt mbl.is.  Einmitt vegna þess að mér þykir fyrirsögnin brosleg,  "Smygldúfa handtekin".