Ný hugsun gegn geggjaðri sóun á matvælum

  Íslendingar hafa löngum hent gríðarlega miklu magni af úrvals matvælum.  Matvælum sem eru í góðu lagi en nálgast merkingarnar "Best fyrir" og "Síðasti söludagur".  Báðar merkingarnar gefa upp dagsetningu sem stendur fyrir allt annað en síðasta neysludag.  Alltof margir rugla þessu saman.

 

 

  Ég hef horft upp á starfsmenn 10-11 henda í ruslagáma þessar ágætu vörur í miklum mæli.  Það er dapurleg sjón.  Þarna er um verðmæti að ræða.  Á sama tíma á fátækt fólk í vandræðum með að láta enda ná saman.  Það stendur í öllum veðrum í langri röð fyrir utan húsnæði Mæðrastyrksnefndar og Fjölskylduhjálpar Íslands.  

  Fyrir nokkrum árum mættu ábúðafullir embættismenn í Fjölskylduhjálpina og stöðvuðu dreifingu á úrvals góðum kartöfluflögum sem voru komnar á dagsetningu.  Vel að merkja dagsetningu sem vísaði á síðasta söludag en átti langt í síðasta neysludag.

  Það þarf hugarfarsbreytingu, vakningu og uppreisn hérlendis gegn því að matvælum í góðu lagi sé hent í ruslagáma.  Nú hafa verslanir Krónunnar tekið upp á því að selja útrunnin matvæli á spottprís.  Það er til fyrirmyndar.  Þetta er algengt erlendis og nýtur vinsælda.

  Einnig er til fyrirmyndar að hjá N1-bensínsjoppunni á Blönduósi fá gestir gjarnan hálfétna matarskammta.  Það gerist þannig að afgreiðsla á skyndibitanum (kjúlli eða hamborgari og franskar) fer öll úr skorðum á álagstímum.  Þegar greint er úr flækjunni þá er hálfétnum matarskömmtum komið snöfurlega í réttar hendur.  Hver matarskammtur nýtist þannig til fulls.  

   

Sala á útrunnum mat gengið vel

Athugasemdir

[Sigurður I B Guðmundsson, 21.8.2015 kl. 13:10]

Það er spurning hvort verð á matvöru mundi ekki lækka ef skilaréttur verslana til birgja yrði aflagður??

[Landfari, 21.8.2015 kl. 14:10]

Varslunin Kostur í Kópavogi gefur viðskiptavinum vörurnar þegar þær eru útrunnar á dagsetningu.

Þannig var það allavega síðast þegar ég fór þar að morgni dags.

[Jens Guð, 21.8.2015 kl. 18:48]

Sigurður I B,  í dag henda verslanir og birgjar um þriðjungi af matvælum.  Hvaða leið sem verður farin til að lækka þetta hlutfall veitir svigrúm til verðlækkunar.    

[Jens Guð, 21.8.2015 kl. 18:49]

Landfari,  þetta eru góðar fréttir.  Ég versla stundum í Kosti en hef ekki orðið var við þetta.  Kannski af því að ég hef ekki skimað eftir þannig vörum.